အမေရိကန်-အီးယူ ကုန်သွယ်ရေးဇုန် ဆွေးနွေးမှုကို ဂျာမန်ပြည်သူများ ကန့်ကွက်

အောက်တိုဘာ ၁၁၊ ၂၀၁၅
M-Media

– လွတ်လပ်သော ကုန်သွယ်ရေးဇုန် ထူထောင်ရေးအတွက် ဥရောပသမဂ္ဂနှင့် အမေရိကန်တို့အကြား ဆွေးနွေးမှုကို ဆန့်ကျင်သည့်အနေဖြင့် သောင်းနှင့်ချီသော ဂျာမန်ပြည်သူများက ယမန်နေ့တွင် မြို့တော်ဘာလင်၌ ဆန္ဒပြခဲ့ကြသည်။

နိုင်ငံရေးပါတီများ၊ ကုန်သွယ်ရေးသမဂ္ဂများ၊ သဘာဝပတ်ဝန်းကျင် ထိန်းသိမ်းရေးနှင့် ဂလိုဘယ်လိုက်ဇေးရှင်းကို ဆန့်ကျင်သော အဖွဲ့များ စုစုပေါင်း ၂ သောင်းကျော်ခန့် တက်ရောက်ခဲ့ကာ အဓိက ရထားဘူတာမှ ကုန်သွယ်ရေးသဘောတူညီချက်ကို ဆန့်ကျင်သော ကျွေးကြော်သံများကို ကျွေးကြော်ကာ မြို့တစ်လျှောက် လှည့်လည် ဆန္ဒပြခဲ့ကြခြင်းဖြစ်သည်။

၂၀၁၃ ခုနှစ်မှ စတင်ခဲ့ပြီး ၂၀၁၆ ခုနှစ်တွင် အဆုံးသတ်ရန် ရည်ရွယ်ထားသည့် အမေရိကန်နှင့် ဥရောပ ၂၈ နိုင်ငံတို့၏ အဆိုပါ ကုန်သွယ်ရေးသဘောတူညီချက် ရရှိပါက ကမ္ဘာပေါ်တွင် အကြီးဆုံး ကုန်သွယ်ရေးဇုန်ကြီး ဖြစ်လာမည်ဖြစ်ပြီး ထောက်ခံသူများကမူ အဆိုပါ သဘောတူညီချက်က စီးပွားရေး တိုးတက်စေမည်ဖြစ်ပြီး အလုပ်အကိုင်အခွင့်အလမ်းများကို ဖန်တီးပေးနိုင်မည်ဟု ပြောကြားခဲ့ကြသည်။

Ref: Aljazeera