ပရိတ်သတ်တွေရဲ့ မျှော်လင့်ချက်ကို မဖြည့်နိုင်တဲ့ လီဗာပူးလ်၊ မော်ရင်ဟို ဖိအားလျော့ခဲ့ပြီး၊ ရူနီ ဂိုးပေါက်ပြန်တွေ့တဲ့ ပရီးမီးယားလိဂ် ပွဲစဉ် ၉

အောက်တိုဘာ ၁၉၊ ၂၀၁၅
M-Media

– ဒီတစ်ပတ်ပရီးမီးယားလိဂ်မှာ နည်းပြသစ်နဲ့ အားလုံးက စောင့်ကြည့်နေကြတဲ့ လီဗာပူးလ်အသင်း သရေသာ ရခဲ့ပြီး၊ ချယ်ဆီးကတော့ ဇယားအောက်နားက အက်စတွန်ဗီလာကို အနိုင်ရကာ အသက်ရှူချောင်ခဲ့ပါတယ်။

စနေနေ့မှာ ပထမဆုံး ကစားခဲ့တဲ့ လီဗာပူးလ်တို့ ဒီရာသီမှာ မတွေ့ရသေးတဲ့ ကစားအားမျိုးကို ပြန်တွေ့ခဲ့ရပါတယ်။ ပထမပိုင်း စောစောပိုင်း အချိန်တွေမှာ ကစားပုံ တော်တော်လေးကောင်းခဲ့တဲ့လီဗာပူးလ် အကောင်းဆုံး အခွင့်အရေး နှစ်ကြိမ်လောက် ရခဲ့ပါသေးတယ်။ ဒါပေမယ့် ဂိုးအဖြစ်တော့ မပြာင်းလဲနိုင်ခဲ့ပါဘူး။ နောက်ပိုင်းမှာ စပါးက သူတင်ကိုယ်တင် ပြန်ကစားနိုင်ခဲ့ပေမယ့် သရေနဲ့သာ အဆုံးသတ်ခဲ့ရပါတယ်။

ဒီယေဂိုကော်စတာရဲ့ဂိုး၊ အလန်ဟူတန်တို့ရဲ့ ကိုယ့်ဂိုးကိုယ်သွင်းမှုနဲ့ အက်စတွန်ဗီလာကို ၂ ဂိုးပြတ် အနိုင်ရခဲ့ပေမယ့် ချယ်ဆီးတို့ကစားပုံက လိုအပ်ချက်တွေအများကြီး ရှိနေတုန်းပါပဲ။ ပွဲအပြီးမှာလည်း မော်ရင်ဟိုက အသင်းသားတွေ ကိုယ့်ကိုယ်ကို ယုံကြည်မှုနည်းလာလေ စွမ်းဆောင်ရည်က ကျသွားလေပဲလို့ ညည်းတွားခဲ့ပါတယ်။ ငါးပွဲဆက်တိုက် အရှုံးနဲ့ရင်ဆိုင်ခဲ့ရတဲ့ ဗီလာနည်းပြ တင်ရှားဝုဒ်အပေါ်မှာတော့ ဖိအားတွေ များလာပြီဖြစ်ပါတယ်။

ပြီးခဲ့တဲ့ပွဲမှာ အာင်ဆင်နယ်ကို အရှုံးပေးခဲ့ရတဲ့ မန်ယူတို့ အဲဗာတန်ကို အဝေးကွင်းမှာ ရှနိုက်ဒါလင်၊ ဟာရဲရားနဲ့ ရူနီတို့ရဲ့ဂိုးတွေနဲ့ ဂိုးပြတ်အနိုင်ရခဲ့ပါတယ်။ မန်ယူဂိုးသမား ဒီဂီယာဟာ အကောင်းဆုံး ပုံစံကို ပြသနိုင်ခဲ့ပြီး လူကာကူ၊ ရော့စ်ကာကလေတို့ရဲ့ ကန်သွင်းချက်တွေအပါအ၀င် အိမ်ရှင်အသင်းရဲ့ အပိုင်ဂိုးသွင်းခွင့်အချို့ကို ကာကွယ်နိုင်ခဲ့တာကြောင့်လည်း မန်ယူတို့ ရလဒ်ပြတ်သားခဲ့တာ ဖြစ်ပါတယ်။ ရူနီကတော့ ၂၀၀၇ ခုနှစ်နောက်ပိုင်း အသင်းဟောင်းဘက်ကို ပထမဆုံး ဂိုးပြန်သွင်းနိုင်ခဲ့တာပါပဲ။

ဝက်ဖို့ဒ်ကွင်းမှာ အမှားအယွင်းမရှိဘဲ ၃ မှတ်ရယူနိုင်ခဲ့ပေမယ့် အာဆင်နယ်ဟာ ပထမပိုင်းမှာ ရရှိခဲ့တဲ့ အခွင့်အရေးတွေကို အသုံးမချနိုင်ခဲ့ဘဲ အနိုင်ဂိုး ၃ ဂိုးစလုံးကို ဒုတိယပိုင်းကျမှ ရခဲ့တာဖြစ်ပါတယ်။ ဂိုးတွေကိုတော့ ဆန်းချက်၊ ဂျရူးနဲ့ ရမ်ဆေးတို့က သွင်းပေးခဲ့တာဖြစ်ပါတယ်။

ဒီရာသီမှာ အသင်းကြီးတွေကို အဝေးကွင်းမှာ ဒုက္ခပေးတတ်တဲ့ ၀က်စ်ဟမ်းဟာ ဒီတစ်ပတ်မှာလည်း ခြေစွာနေတဲ့ ခရစ္စတယ်ပဲလေ့စ်ကို အဝေးကွင်းမှာ ၃ ဂိုး ၁ ဂိုးနဲ့ အနိုင်ကစားခဲ့ပါတယ်။ နောက်ဆုံး ၅ ပွဲမှာ ၄ ပွဲရှုံးခဲ့ပြီး ခြေစွမ်းပျက် နိုင်ပွဲပျောက်နေတဲ့ နယူးကာဆယ်က အံ့သြစရာကောင်းလောက်တဲ့ ကစားပုံကို ပြသခဲ့ပြီး နော်ဝစ်ခ်ျကို ဂိုးမိုးရွာခဲ့ပါတယ်။ အိမ်ရှင်တို့ရခဲ့တဲ့ ၆ ဂိုးမှာ ၄ ဂိုးကို ဂျီအော်ဂီနီယို ၀စ်ဂျနာလ်ဒမ်က သွင်းယူပေးခဲ့ပြီး အသင်းရဲ့ ဂန္တ၀င်တိုက်စစ်မှူး အလန်ရှီးယားရားပြီးနောက် တစ်ပွဲထဲမှာ ၄ ဂိုးသွင်းယူနိုင်တဲ့ ဒုတိယမြောက် နယူးကာဆယ်ကစားသမား ဖြစ်လာခဲ့ပါတယ်။

ဇယားထိပ်က မန်စီးတီးကတော့ အိမ်ကွင်းမှာ တန်းတက်ဘုန်းမောက်ကို သာသာယာယာပဲ ၅ ဂိုးသွင်းပြီး လိဂ်ကို ဆက်လက်ဦးဆောင်နေပါတယ်။
ဒီတစ်ပတ် ပရီးမီးယားလိဂ် ပွဲစဉ် ၉ ရဲ့ ရလဒ်များကတော့ အောက်ပါအတိုင်းဖြစ်ပါတယ်။

စပါး ၀-၀ လီဗာပူးလ်
ချယ်ဆီး ၂-၀ အက်စတွန်ဗီလာ
ခရစ္စတယ်ပဲလေ့စ် ၁-၃ ၀က်စ်ဟမ်း
အဲဗာတန် ၀-၃ မန်ယူ
မန်စီးတီး ၅-၁ ဘုန်းမောက်
ဆောက်သက်တမ် ၂-၂ လက်စတာ
ဝက်စ်ဘရွန်း ၁-၀ ဆန်းဒါးလန်း
ဝက်ဖို့ဒ် ၀-၃ အာဆင်နယ်
နယူးကာဆယ် ၆-၂ နော်ဝစ်ခ်ျ