မိုဒီ၏ အာဏာ အရှိန်ဖြင့် ဟိန္ဒူ အမျိုးသားရေး အစွန်းရောက်ဝါဒ အားကောင်းလာ

အောက်တိုဘာ ၂၁ ၊ ၂၀၁၅
M-Media

– ၂၀၁၄ ခုနှစ် မေလတွင် လက်ယာယိမ်း BJP ပါတီခေါင်းဆောင် ဟိန္ဒူ အမျိုးသားရေးဝါဒီ နရန်ဒရာမိုဒီ ဝန်ကြီးချူပ် ဖြစ်လာကတည်းက ဟိန္ဒူ အမျိုးသားရေး အုပ်စုများမှာ နိုင်ငံတစ်ဝှမ်းရှိ ဘာသာရေး လူနည်းစုများအပေါ် အကြမ်းဖက်မှုများ ပြုလုပ်လာခဲ့ကြသည်။

ထိပ်တန်း ခရစ်ယာန်လူ့အခွင့်အရေးအဖွဲ့တစ်ခု၏ အဆိုအရ မိုဒီ ရွေးကောက် တင်မြှောက်ခံရပြီးချိန်မှ ယခုနှစ် သြဂုတ်လအထိ ဟိန္ဒူ အမျိုးသားရေးဝါဒီများ၏ တိုက်ခိုက်မှုမှာ အနည်းဆုံး ၆၀၀ နီးပါး ရှိခဲ့သည်ဟု သိရသည်။ ထိုတိုက်ခိုက်မှုများထဲမှ ၁၄၉ ခုမှာ ခရစ်ယာန်များအပေါ် ကျူးလွန်ခဲ့ခြင်းဖြစ်ပြီး ကျန်သည့်အကြိမ်များက နိုင်ငံအတွင်းရှိ မွတ်စလင်လူ့အဖွဲ့အစည်းအပေါ် ကျူးလွန်ခဲ့ကြခြင်း ဖြစ်သည်။

ဝေဖန်သူများက ထိုတိုက်ခိုက်မှုများကို ဟိန္ဒူအမျိုးသားရေးနှင့် နိုင်ငံရေးဖိအားပေးအုပ်စု Rashtriya Swayamsevak Sangh (RSS ) ကို သစ္စာခံသည့် အစွန်းရာက်အုပ်စုများက စီစဉ်ကျူးလွန်ကြခြင်းဖြစ်သည်ဟု ဆိုသည်။

ဝန်ကြီးချုပ် နရန်ဒါရာ မိုဒီက RSS ၏ ရာသက်ပန်အဖွဲ့ဝင်ဖြစ်ပြီး ၂၀၁၄ ခုနှစ်ရွေးကောက်ပွဲတွင် မိုဒီ၏ BJP ပါတီ အနိုင်ရရှိရေး ကူညီရာတွင် RSS အဖွဲ့ဝင်များ၏ ထောက်ပံ့မှုက အရေးပါခဲ့သည်။ ရလဒ်ကို အရင်းတည်၍ ထိုစဉ်ကတည်းက မိုဒီ၏ အစွန်းရောက်ဆုံး အမျိုးသားရေး အားပေးသူများမှာ ပုံမှန်လိုလို လမ်းပေါ်သို့ ထွက်ကြပြီး အကြမ်းဖက်မှုများနှင့် လှုံ့ဆော်မှုများကိုသုံး၍ ဟိန္ဒူစစ်စစ် အိန္ဒိယနိုင်ငံဖြစ်ရမည်ဟု ဟစ်ကြွေးကြလေတော့သည်။

မွတ်စလင်များကိုလည်း အတင်းအဓမ္မ ဟိန္ဒူထဲသို့ ပြောင်းခိုင်းသည်။ အမဲသားစားသည်ဟုဆိုကာ အိမ်များကို မီးရှို့ပြီး လူများကိုလည်း သတ်ကြဖြတ်ကြလေသည်။ ဟိန္ဒူအယူဝါဒတွင် နွားက အထူးအခြေအနေတွင် ရှိလေသည်။

တစ်ချိန်တည်းမှာပင် ဟိန္ဒူအမျိုးသားရေးဝါဒီများက အချို့ပြည်နယ်ရှိ ကျောင်းပြဌာန်းစာအုပ်များကို ပြင်ဆင်ကြပြီး၊ မိန်းကလေးငယ်များနှင့် ယောက်ျားလေးငယ်များအတွက် စခန်းသွင်းလေ့ကျင့်မှုများ ပြုလုပ်ပေးကာ ၎င်းတို့၏ လုပ်ရပ်များတွင် ကလေးများကို ပြောင်ပြောင်တင်းတင်းပင် သွတ်သွင်းရန် ကြိုးစားလာကြသည်။

ဟိန္ဒူနိုင်ငံစစ်စစ် လိုချင်သူများကို ရှာဖွေရန်နှင့် ၎င်းတို့၏ နိုးကြားမှုက ကမ္ဘာ့ လူဦးရေအထူထပ်ဆုံး ဘာသာရေးမနွယ်သော ဒီမိုကရေစီကျင့်သုံးသည့် အိန္ဒိယနိုင်ငံ၏ အနာဂတ်အတွက် မည်သည့် အဓိပ္ပါယ်ရှိသည်ကို ဖော်ထုတ်ရန် ဟိန္ဒူဒါရိုက်တာနှင့် ဂျာနစ်လစ်အမျိုးသမီး မန်ဒါကီရီ ဂါလော့တ်အား မိမိတို့က တောင်းဆိုခဲ့သည်။

ဂါလော့တ်၏ အမြင်
———————–
စက်တင်ဘာ ၂၈ ရက်နေ့တွင် အသက် ၅၂ နှစ်အရွယ် မွတ်စလင်အမျိုးသား မိုဟာမက် အက်ခ်လားက်မှာ အမဲသားစားသည်ဆိုသော ကောလဟလဖြင့် ဟိန္ဒူလူအုပ်စုကြီး၏ ရိုက်သတ်မှုကို ခံခဲ့ရသည်။

၎င်း၏ အသက် ၂၂ နှစ်အရွယ် သားဖြစ်သူက ထိုတိုက်ခိုက်မှုအတွင်း ဒဏ်ရာအများအပြား ရရှိခဲ့သည်။ အပ်ချုပ်စက်နှင့် ခေါင်းကို အရိုက်ခံရခြင်းဖြစ်ပြီး ဆေးရုံတွင် ဦးခေါင်းကို အဓိကခွဲစိတ်မှု ၂ ကြိမ်တိုင်တိုင် ပြုလုပ်ခဲ့ရလေသည်။

ဟိန္ဒူအယူဝါဒတွင် နွားက မြင့်မြတ်သည့် တိရစ္ဆာန်ဖြစ်သည်ဟု ယူဆပြီး နိုင်ငံတစ်ဝှမ်းတွင် ကျယ်ကျယ်ပြန့်ပြန့် ကိုးကွယ်ကြလေသည်။ အိန္ဒိယရှိ ပြည်နယ်အများအပြားတွင် ကျွဲနွားသတ်ဖြတ်မှု ထိန်းချုပ်သည့် ဥပဒေများကို ပြဌာန်းထားကြသည်။ သို့သော်လည်း ထိုဥပဒေကို ပိုမို တင်းတင်းကြပ်ကြပ် ပြဌာန်းရန် မကြာမီကာလအတွင်း ဟိန္ဒူအမျိုးသားရေးဝါဒီများက တောင်းဆိုလာကြပြီး အမဲသားအား ပိတ်ပင်ရန်ပင် ဆော်သြလာကြတော့သည်။ မတ်လအတွင်းက ဝန်ကြီးချူပ် မိုဒီ၏ BJP ဟိန္ဒူအမျိုးသားရေးပါတီ အာဏာရှိသည့် မဟာရက်ရ်ှထရာပြည်နယ်မှ အစိုးရမှာ ထိုအတိုင်း လုပ်လာခဲ့ပြီး အမဲသား ရောင်းချမှုနှင့် စားသုံးမှုတို့ကို ပိတ်ပင်ခဲ့လေသည်။

လမ်းပေါ်တွင်လည်း ဟိန္ဒူအမျိုးသားရေး ၀ါဒီများ ထွက်ပေါ်လာက အခြားပြည်နယ်များတွင် ထိုဥပဒေအ တိုင်း ပြဌာန်းပေးရန် တောင်းဆိုကြလေတော့သည်။ ပြီးခဲ့နှစ်ကစ၍  နိုင်ငံတစ်ဝှမ်းတွင် ဟိန္ဒူအမျိုးသားရေးဝါဒီများ ထိုကိစ္စများနှင့်ပတ်သက်၍ ကိုယ့်လက်ကိုယ်ခြေ လုပ်လာကြသည်။ အစွန်းရောက်အုပ်စု Bajrang Dal မှ ခေါင်းဆောင်ဖြစ်သူ အက်ဂျူ ခိုဟန်က ၎င်းတို့အုပ်စု၏ ကင်းလှည့်မှုတွင် လိုက်လံရိုက်ကူးရန် မိမိတို့အား ခွင့်ပြုခဲ့သည်။ ခိုဟန်မှာ ဟိန္ဒူအမျိုးသားရေး လှုပ်ရှားမှုတွင် ၎င်းတို့က ခြေလျင်တပ်သားများဖြစ်သည်ဟု မှတ်ယူထားသူဖြစ်သည်။

၎င်းတို့အုပ်စု မြို့တွင်းရှိ လမ်းတစ်လျှောက် ကားများကို စစ်ဆေးခြင်းနှင့် နွားပေါ်ရန် ယူဆောင်လာသူများကို ရှာဖွေခြင်းလုပ်ငန်းစဉ်တွင် မိမိတို့က လိုက်ပါသွားခဲ့လေသည်။ ဖမ်းမိသူများ ဘာဖြစ်မည်ဆိုသည်နှင့်ပတ်သက်၍ ခိုဟန်က ပွင့်ပွင့်လင်းလင်းပင် ပြောသည်။

“သူတို့ အသတ်ခံရမည် မဟုတ်သော်လည်း အသက်ထွက်လုမတတ် အရိုက်ခံရမည်ဟူ၏”

ခိုဟန်နှင့် ၎င်းကဲ့သို့သော လူများကို တွန်းအားဖြစ်စေသည့် အရာကတော့ ဟိန္ဒူများမှာ ဖယ်ကျဉ်ခံနေရပြီး ၎င်းတို့၏ ဇာတိမြေတွင်ပင် ဘုံပျောက်နေသည်ဆိုသည့် အယူအဆပင် ဖြစ်လေသည်။

“ကျွန်တော်တို့ပိုင်ဆိုင်တာကို ပြန်ယူဖို့ အချိန်ကြပါပြီ။ ဟင်ဒူစတန်ဒေသဟာ ဟိန္ဒူတွေအတွက်လို့ ကျွေးကြော်ဖို့ပေါ့ဗျာ” ဟု ခိုဟန်က မိမိတို့အား မကြာခဏ ပြောခဲ့လေသည်။

တကယ်တော့ ဘာသာရေးတရားများ အပေါ် ယုံကြည်သက်ဝင်မှု ကိန်းဂဏန်းက ခိုဟန်ကျွေးကြော်မှုမှ ခြားနားသည့် အခြေအနေမျိုး ဖြစ်နေသည်။ ယခုလက်ရှိတွင် ဟိန္ဒူဘာသာမှာ အိန္ဒိယနိုင်ငံတွင် အလွန်အမင်းများပြားသည့် အဓိက ဘာသာရေးအုပ်စုကြီးဖြစ်ပြီး နိုင်ငံလူဦးရေ၏ ၇၉.၈ ရာခိုင်နှုန်းအထိပင် ရှိလေသည်။ ဒုတိယအကြီးဆုံး ဘာသာဝင်အုပ်စုက မွတ်စလင်များဖြစ်ပြီး ၁၄.၂၈ ရာခိုင်နှုန်း ရှိနေလေ၏။

အစွန်းရောက် ဟိန္ဒူအုပ်စုများ၏ လှုပ်ရှားမှုများကို မိမိက လိုက်လံစောင့်ကြည့်နေသည်မှာ ယခုဆိုလျှင် နှစ်ပေါင်း အတော်ကြာခဲ့ပြီဖြစ်သည်။ သို့သော်လည်း လွန်ခဲ့သည့် ၁၈ လလောက်တွင်မှ လက်မခံနိုင်ဖွယ်ရာ၊ သည်းမခံနိုင်ဖွယ်ရာ ကိစ္စများ တစ်ခါတစ်ရံတွင် ၎င်းတို့၏ “ဟင်ဒူစတန်” (ဟိန္ဒူနိုင်ငံ) တိုင်းပြည်ဖြစ်ရမည်ဟူသော သဘောထားမှ သွေဖယ်သည့် မည်သူ့ကိုမဆို အကြမ်းဖက်မှုများ ပြုလုပ်သည်ကို ပို၍ တွေ့လာရသည်။

ဝန်ကြီးချုပ်မိုဒီ အာဏာရခဲ့သည့် ၂၀၁၄ ခုနှစ် မေလမှ ယခုနှစ် သြဂုတ်လအကြား ဟိန္ဒူအစွန်းရောက်များက လူနည်းစုများအပေါ် တိုက်ခိုက်မှု ၆၀၀ ကျော်ကို ထိပ်တန်း ခရစ်ယာန်လူ့အခွင့်အရေး အဖွဲ့တစ်ဖွဲ့က မှတ်တမ်းပြုစုထားသည်။ ထိုတိုက်ခိုက်မှုများထဲမှ ၁၄၉ ခုမှာ ခရစ်ယာန်များကို ပစ်မှတ်ထားခြင်းဖြစ်ပြီး ကျန်အကြမ်းဖက် တိုက်ခိုက်မှုများက မွတ်စလင်များ အပေါ် ကျူးလွန်ကြခြင်း ဖြစ်လေသည်။

နွားသားစားသည်ဟု စွပ်စွဲကာ တိုက်ခိုက်ခံခဲ့ရသည့် အက်ခ်လားက်တို့ အမှုက အူတာပရာဒက်ရ်ှပြည်နယ်ရှိ မြို့တော် နယူးဒေလီနှင့် ကီလိုမီတာ ၁၀၀ ပျော့ပျော့သာဝေးသော ဘီဆာရာမြို့တွင် ဖြစ်ပွားခဲ့ခြင်းဖြစ်သည်။ ခရစ်ယာန်အဖွဲ့မှ မှတ်တမ်းယူထားသည့် တိုက်ခိုက်မှုများထဲမှ အများအပြားမှာ ဤပြည်နယ်တွင် ဖြစ်ပွားခဲ့သည်။

အက်ခ်လားက်အား သတ်ဖြတ်မှုဖြင့် ဖမ်းဆီးထားသည့် လူ ၁၁ ဦးမှ ၈ ဦးမှာ ဒေသတွင်း BJP စည်းရုံးရေးမှူး ဆန်ဂျေးရာနာနှင့် တိုက်ရိုက် အဆက်အသွယ်ရှိသူများဖြစ်ပြီး ၁ ဦးက ၎င်း၏သား ဖြစ်နေသည်။

သို့သော်လည်း အစိုးရရုံးစိုက်ရာနေရာနှင့် မလှမ်းမကမ်းတွင် ဖြစ်ပွားခဲ့ပြီး အမုန်းတရားအခြေခံ ရာဇ၀တ်မှုအဖြစ် ထင်ရှားနေသော်လည်း အရေးယူရန်၊ ဖြေရှင်းရန် ဆော်သြမှုကို ၀န်ကြီးချုပ် မိုဒီတစ်ယောက် မသိချင်ယောင် ဆောင်နေလေသည်။ နိုင်ငံတစ်ဝှမ်း ကျယ်ကျယ်ပြန့်ပြန့် ဆန့်ကျင်မှုများ ပြုလုပ်နေပြီး မိုဒီကတော့ သိသိသာသာပင် နှုတ်ဆိတ်နေ၏။

အခြားသော BJP ပါတီဝင်များက ထိုကိစ္စနှင့်ပတ်သက်၍ ခပ်ကြမ်းကြမ်းပင် မှတ်ချက်ပေးခဲ့ကြသည်။ လွှတ်တော်အမတ်တစ်ဦးဖြစ်သူ ဆက်ရှီ မဟာရဂ်ျက ၎င်းအနေဖြင့် နွားကို ကာကွယ်ရန်အတွက် လူသတ်ရန် ဆန္ဒရှိပြီး၊ သတ်လည်းသတ်သွားမည်ဟု ဗြောင်ပြောခဲ့သည်။

ဟိန္ဒူအယူဝါဒမှာ ကမ္ဘာပေါ်တွင် ကြီးကျယ်သည့် ဘာသာတရား တစ်ခုဖြစ်ပြီး ရှေ့ဆက်၍လည်း ထိုကဲ့သို့ပင် ဖြစ်သွားမည်ဖြစ်သည်။ နတ်ဘုရားအများအပြားကို ကိုးကွယ်သည့် ဟိန္ဒူတို့၏ အယူဝါဒက (တစ်ခါတစ်ရံ မိသားစု တစ်ခုတည်းမှာပင် ကိုးကွယ်သည့် နတ်ဘုရားများ မတူကြ) မတူညီသော အမြင်များအတွက် သဘောထားကြီးမှုကို ဖော်ကျူးနေသည်။ ထိုသဘောထားကြီးမှုမှာ မျိုးဆက်ပေါင်း များစွာကြာအောင် ဟိန္ဒူဝါဒ၏ အမှတ်အသား ဖြစ်ခဲ့သည်။

သို့သော်လည်း ဟိန္ဒူ အမျိုးသားရေးလှုပ်ရှားမှုက မိမိတို့၏ ဘာသာရေးအမှတ်သညာကို ပြန်ပေးဆွဲကာ အခြားသော အမြင်များကို မသိကျိုးကျွံပြု၍ တစ်ခါတစ်ရံ တိုက်ခိုက်၍ ၎င်းတို့၏ ကိုယ်ပိုင်အမြင်ဖြင့် ကျင့်သုံးရန် ကြိုးစားလာကြသည်။

အိန္ဒိယမှာ ကမ္ဘာပေါ်တွင် ဘာသာရေး မနွယ်သော ဒီမိုကရေစီကျင့်သုံးသည့် လူဦးရေ အများဆုံး နိုင်ငံဖြစ်သည်။ နိုင်ငံ၏ ဖွဲ့စည်းပုံအခြေခံဥပဒေက လူနည်းစုများ ၎င်းတို့၏ ဘာသာတရားကို ကြောက်ရွံ့ခြင်း မရှိဘဲ လွတ်လပ်စွာကျင့်သုံးရန် အာမခံပေးထားလေသည်။ သို့သော်လည်း ယနေ့ခေတ်တွင်မူ မွေးရာပါ အခွင့်အရေးဖြစ်သော လွတ်လပ်စွာ ဖော်ထုတ်ခွင့်နှင့် ကိုးကွယ်ယုံကြည်ခွင့်မှာ ခြိမ်းခြောက်ခံနေရသည်ဟူသော စိုးရိမ်မှုများ ရှိလာခဲ့လေသည်။

လူနည်းစုများအား တိုက်ခိုက်နေသော်လည်း ပြန်လည်ဆန်းသစ်လာသည့် ဟိန္ဒူ အမျိုးသားရေးဝါဒ ရှေ့တန်းတင်သော အဖွဲ့များမှာ ယခင်က ကြုံတွေ့ခဲ့ရဖူးသည်ထက် ပို၍ ထင်သာမြင်သာရှိကာ အန္တရာယ်အရိပ်အရောင် ပိုရှိနေသည်ဟု စာရေးဆရာများ၊ ပညာတတ်များက ရေးသားပြောဆိုနေကြလေသည်။ ဖြစ်ပျက်နေသည့် အခြေအနေထက် ၀န်ကြီးချုပ် မိုဒီ၏ ထိုကိစ္စအပေါ် ဆိတ်ဆိတ်နေခြင်းက ပို၍ ထိုထက် ပို၍ နိမိတ်မကောင်းပုံ ပေါ်နေလေ၏။

Aljazeera တွင် ဖော်ပြခဲ့သည့် India’s Hindu Fundamentalists ဆောင်းပါးကို မိုးဝေ ဆီလျော်အောင် ဘာသာပြန်ဆို တင်ဆက်သည်။