၁၆ သင်းအဆင့်တက်မယ့် လေးသင်း ပေါ်ထွက်လာတဲ့ ယနေ့မနက် ချန်ပီယံလိဂ်ပွဲများ

နိုဝင်ဘာ ၂၆၊ ၂၀၁၅
M-Media

– ဒီနေ့မနက်ကစားခဲ့တဲ့ ချန်ပီယံလိဂ် ပထမအုပ်စု ၄ ခုရဲ့ ပဉ္စမမြောက်ပွဲမှာတော့ နောက်တစ်ဆင့်တက်မယ့် အသင်းလေးသင်း ပေါ်ထွက်လာခဲ့ပြီး အက်သလက်တီကို၊ ဘင်ဖီကာ၊ ဂျူဗင်တပ်စ်နဲ့ ပီအက်စ်ဂျီတို့ပဲ ဖြစ်ပါတယ်။ ဗန်ဂါးလ်ရဲ့ မန်ယူကတော့ ၁၆ သင်းအဆင့် ရောက်ရှိရေးအတွက် အုပ်စုအနောက်ဆုံးပွဲအထိ ရုန်းကန်ရမှာ ဖြစ်ပါတယ်။

အုပ်စု A

ရှက်တာဒိုးနက် ၃-၄ ရီးယဲလ်မက်ဒရစ်
မာလ်မို ၀-၅ ပီအက်စ်ဂျီ

ရော်နယ်ဒိုခြေစွမ်းပြတဲ့ ရီးယဲလ် ၅၂ မိနစ်မှာတင် လေးဂိုးပြတ်ခဲ့ပေမယ့် ၇၇ မိနစ်ကနေ ၈၃ မိနစ်အထိ ၇ မိနစ်တွင်းမှာ ၃ ဂိုး လွယ်လွယ်ပေးလိုက်ရတာက ဘင်နီတက်ဇ်လက်ထက်မှာ ပိုကျစ်လစ်လာတယ်ဆိုတဲ့ ရီးယဲလ်နောက်တန်းအတွက် မေးခွန်းထုတ်စရာ ဖြစ်ခဲ့ပါတယ်။ ရီးယဲလ်အတွက် ဂိုးတွေကိုတော့ ရော်နယ်ဒိုက ၂ ဂိုး၊ မိုဒရစ်နဲ့ ကာဗာဂျဲလ်တို့က ၁ ဂိုးစီ သွင်းယူပေးခဲ့တာ ဖြစ်ပါတယ်။

ပီအက်စ်ဂျီကတော့ မာလ်မိုကို အခက်အခဲမရှိ ၅ ဂိုးပြတ်အနိုင်ယူပြီး အုပ်စုဒုတိယနေရာကိုရယူကာ နောက်တစ်ဆင့်ကို တက်ရောက်သွားခဲ့ပါတယ်။ ပီအက်စ်ဂျီအတွက် ဂိုးတွေကိုတော့ ဒီမာရီယာက ၂ ဂိုး၊ ရာဘီယော့၊ အီဗာရာဟီမိုဗစ်နဲ့ လူးကက်စ်တို့က တစ်ဂိုးစီ သွင်းယူပေးခဲ့တာဖြစ်ပါတယ်။

အုပ်စု B

မန်ယူ ၀-၀ ပီအက်စ်ဗီ
စီအက်စ်ကေအေ ၀-၂ ၀ုလ်ဖ်ဘာ့ဂ်

အိုးထရက်ဖို့ဒ်မှာ မန်ယူတို့ အသာရခဲ့ပေမယ့် ဂိုးမသွင်းနိုင်ခဲ့တာကတော့ စိတ်ပျက်စရာပါပဲ။ ပီအက်စ်ဗီအတွက်တော့ သရေရလဒ်ဟာ ထိုက်တန်ခဲ့ပြီး ၁၆ သင်းအဆင့်အတွက်လည်း မျှော်လင့်ချက် ပိုရှိလာပါတယ်။ ၈ မှတ်ရထားတဲ့ မန်ယူက နောက်ဆုံးပွဲမှာ အုပ်စုကို ၉ မှတ်နဲ့ ဦးဆောင်နေတဲ့ ၀ုလ်ဖ်ဘာ့ဂ်နဲ့ တွေ့ရမှာဖြစ်ပြီး အနိုင်ကစားနိုင်မှ နောက်တစ်ဆင့်ကို လွတ်လွတ် ကျွတ်ကျွတ် တက်ရောက်နိုင်မှာ ဖြစ်ပါတယ်။ ၇ မှတ်နဲ့ တတိယနေရာရနေတဲ့ ပီအက်စ်ဗီကတော့ အုပ်စုတက်ဖို့ မျှော်လင့်ချက်မရှိတော့တဲ့ စီအက်စ်ကေအေနဲ့ ကစားရမှာ ဖြစ်တာကြောင့် အလားအလာ ပိုကောင်းနေပါတယ်။

ဝုလ်ဖ်ဘာ့ဂ်က အဝေးကွင်းမှာ အကောင်းဆုံး ခြေစွမ်းနဲ့ ၃ မှတ်ရယူနိုင်ခဲ့ပါတယ်။ နှစ်သင်းစလုံး ထိန်းကစားခဲ့တဲ့အတွက် အကြိတ်အနယ်သိပ်မရှိခဲ့ဘဲ ၀ုလ်ဖ်ဘာ့ဂ်ရတဲ့ဂိုးတွေကလည်း ဒုတိယပိုင်း ၆၇ မိနစ်နဲ့ ၈၈ မိနစ်တွေမှာ ရရှိခဲ့တာဖြစ်ပါတယ်။

အုပ်စု C

အက်သလက်တီကို ၂-၀ ဂါလာတာစာရေး
အက်စ်တာနာ ၂-၂ ဘင်ဖီကာ

အက်သလက်တီကိုက ဂါလာတာစာရေး အနိုင်ရတာကြောင့် အက်သလက်တီကိုရော ဘင်ဖီကာပါ နောက်တစ်ဆင့် တက်ရောက်သွားပြီဖြစ်ပါတယ်။ အိမ်ကွင်းမှာ ဖိကစားနိုင်ခဲ့တဲ့ အက်သလက်တီကိုအတွက် ဂရီဇ်မန်းတစ်ဦးတည်းက ၁၃ မိနစ်နဲ့ ၆၅ မိနစ်တွေမှာ ၂ ဂိုး သွင်းပေးခဲ့တာဖြစ်ပါတယ်။

ဘင်ဖီကာကတော့ အားအနည်းဆုံး အက်စ်တာနာကို ၂ ဂိုးအရှုံးနဲ့ နောက်က လိုက်ကစားခဲ့ရပြီး နောက်ပိုင်း ၂ ဂိုး ပြန်သွင်းနိုင်ခဲ့လို့သာ သရေကျခဲ့တာဖြစ်ပါတယ်။ အက်သလက်တီကိုရဲ့ အနိုင်ကြောင့် နောက်တစ်ဆင့်တက်တဲ့ ဘင်ဖီကာ အုပ်စုနောက်ဆုံးပွဲမှာ အုပ်စုဗိုလ် လုရမှာဖြစ်ပါတယ်။

အုပ်စု D

ဂျူဗင်တပ်စ် ၁-၀ မန်စီးတီး
မိုချန်ဂလာဘက်ခ်ျ ၄-၂ ဆီးဗီးလား

နောက်တစ်ဆင့်တက်သွားပြီးဖြစ်တဲ့ မန်စီးတီးကို မန်ဇူကစ်ရဲ့ စောစောပိုင်း ဂိုးတစ်ဂိုးနဲ့ အနိုင်ယူပြီး ဂျူဗင်တပ်စ်တို့ နောက်တစ်ဆင့် တက်သွားခဲ့ပါပြီ။

အုပ်စုကတက်ဖို့ အခွင့်အရေးမရှိတော့ပေမယ့် မိုချန်ဂလာဘက်ခ်ျတို့ ဂုဏ်သိက္ခာအတွက် အကောင်းဆုံးခြေစွမ်းကို ပြသခဲ့ပြီး ယူရိုပါချန်ပီယံကို ဂိုးပြတ်နဲ့ အနိုင်ယူနိုင်ခဲ့ပါတယ်။ ဆီးဗီးလားကတော့ နောက်တစ်ဆင့်တက်ရေး မျှော်လင့်ချက် ယဲ့ယဲ့လေး ပျက်သုဉ်းသွားခဲ့ပါတယ်။