အာဆင်နယ်၊ ချယ်ဆီး၊ ရိုးမားနဲ့ ဂျန့်တို့ ရှုံးထွက်အဆင့်ကို တက်ရောက်နိုင်ခဲ့တဲ့ ကြာသာပတေးနေ့မနက် ချန်ပီယံလိဂ်ပွဲများ

ဒီဇင်ဘာ ၁၀၊ ၂၀၁၅
M-Media

– ဒီနေ့မနက်မှာကစားခဲ့တဲ့ ချန်ပီယံလိဂ် အုပ်စုနောက်ဆုံးပွဲစဉ်မှာတော့ အာဆင်နယ်ဟာ လိုချင်တဲ့ဂိုးတွေနဲ့ အနိုင်ရခဲ့ပြီး နောက်တစ်ဆင့်တက်နိုင်ခဲ့သလို၊ ချန်ပီယံလိဂ် ၁၆ သင်းအဆင့်မှာ ဘယ်လ်ဂျီယံကလပ်တွေ ၁၅ နှစ်တာ မပါဝင်နိုင်မှုကိုလည်း ဂျန့်အသင်းက အဆုံးသတ်ပေးခဲ့ပါတယ်။

အုပ်စု E

ရိုးမား ၀-၀ BATE
လေဗာကူဆင် ၁-၁ ဘာစီလိုနာ

အာဆင်နယ်ဂိုးသမားဟောင်း ရှက်ဇက်နီရဲ့ လက်စွမ်းပြမှုနဲ့အတူ ရိုးမားတို့ သရေကျပြီး အုပ်စုဒုတိယနဲ့ နောက်တစ်ဆင့်တက်ရောက်နိုင်ခဲ့တာ ဖြစ်ပါတယ်။ ၂၀၁၃-၁၄ ချန်ပီယံလိဂ်မှာ ဇင်းနစ်အသင်းက အနည်းဆုံးအမှတ် ၆ မှတ်နဲ့ နောက်တစ်ဆင့်တက်ရောက်ခဲ့တဲ့ မှတ်တမ်းကို ရိုမားတို့က ထပ်မံရရှိခဲ့ပြီး ပေးဂိုး ၁၆ ဂိုးနဲ့ ရှုံးထွက်ရောက်တဲ့ အသင်းအားလုံးမှာ ဂိုးအများဆုံးပေးခဲ့ရတဲ့ အသင်းလည်း ဖြစ်ခဲ့ပါတယ်။

လေဗာကူဆင်ကတော့ ရိုးမားနဲ့ ဆန့်ကျင်ဖက်ပါ။ ရေကုန်ရေခန်းကစားခဲ့ပေမယ့် သရေသာရခဲ့တာကြောင့် ထိပ်တိုက်တွေ့ဆုံမှုအရ အမှတ်တူနေတဲ့ ရိုးမားကို နေရာဖယ်ပေးလိုက်ရပါတယ်။ ဘာစီလိုနာရဲ့ ဂျာမနီဂိုးသမား မာ့ခ် အန်ဒရီတာ စတီဂျန်က လေဗာကူဆင်ရဲ့ အပိုင်ကန်သွင်းခွင့် ၉ လုံးလောက်ကို အကောင်းဆုံး ကာကွယ်သွားနိုင်ခဲ့တာကလည်း အိမ်ရှင်တို့ကို ကြမ္မာငင်စေခဲ့ပါတယ်။ ဘာကာအတွက် မက်ဆီက မိနစ် ၂၀ မှာ အဖွင့်ဂိုးသွင်းခဲ့ပြီး မန်ယူတိုက်စစ်မှူးဟောင်း ဟာနန်ဒက်ဇ်က ၂၃ မိနစ်မှာ လေဗာကူဆင်အတွက် ချေပဂိုး ပြန်သွင်းပေးခဲ့ပါတယ်။

အုပ်စု F

အိုလံပီယာကော့စ် ၀-၃ အာဆင်နယ်
ဒိုင်နမိုဇာဂရဘ် ၀-၂ ဘိုင်ယန်

၃ ဂိုးပြတ် ဒါမှမဟုတ် ၃ ဂိုး ၂ ဂိုးနဲ့အထက် နိုင်မှ အိုလံပီယာကော့စ်ကိုကျော်ပြီး အုပ်စုဒုတိယနဲ့ နောက်တစ်ဆင့် တက်နိုင်မယ့် အာဆင်နယ် ဂျရူးရဲ့ ဟက်ထရစ်ဂိုးနဲ့ လိုချင်တဲ့ရလဒ်ကို ရရှိခဲ့ပါတယ်။ ပထမပိုင်း မိနစ် ၂၀ ကျော်လောက်အထိ အိမ်ရှင်ရဲ့ ဖိအားပေးမှုကို ခံခဲ့ရတဲ့ အာဆင်နယ် နောက်ပိုင်းမှာ ကစားကွက်မိလာပြီး ၂၉၊ ၄၉ မိနစ်တွေမှာ ဂျရူးက ၂ ဂိုးသွင်းပေးခဲ့ကာ ၆၇ မိနစ်မှာလည်း ပင်နယ်တီကနေ သူကပဲ တတိယမြောက်ဂိုးကို ထပ်သွင်းပေးခဲ့ပါတယ်။ ဒီပွဲအနိုင်ကြောင့် အာဆင်နယ်ဟာ ရှုံးထွက်အဆင့်ကို ၁၆ နှစ်ဆက်တိုက် တက်ရောက်နိုင်ခဲ့တာဖြစ်ပြီး အိုလံပီယာကော့စ်ကတော့ ယူရိုပါတစ်နေရာနဲ့သာ ကျေနပ်ခဲ့ရပါတယ်။

နောက်တစ်ဆင့် တက်ရောက်သွားပြီဖြစ်တဲ့ ဘိုင်ယန်က လီဝန်ဒေ့ါစကီးရဲ့ ဒုတိယပိုင်းသွင်းဂိုး ၂ ဂိုးနဲ့ ဒိုင်နမိုဇာဂရက်ဘ်ကို အနိုင်ရပြီး ၆ ပွဲမှာ ငါးပွဲအနိုင်ရတဲ့မှတ်တမ်းကို ရရှိခဲ့ပါတယ်။

အုပ်စု G

ချယ်ဆီး ၂-၀ ပေါ်တို
ဒိုင်နမိုကိဗ် ၁-၀ မက်ကာဘီ တဲလ်အဗီး

စတမ်းဖို့ဒ်ဘရစ်ခ်ျမှာကစားခဲ့တဲ့ ပေါ်တိုနဲ့ပွဲမှာ ချယ်ဆီးဟာ တောက်ပခဲ့ပြီး ၁၂ မိနစ်မှာ မာကာနိုရဲ့ ကိုယ့်ဂိုးကိုယ်သွင်းမှု၊ ၅၂ မိနစ်မှာ ၀ီလီယံရဲ့ ဂိုးတွေနဲ့ အနိုင်ရပြီး အုပ်စုဗိုလ်အဖြစ်နဲ့ ၁၆ သင်းအဆင့်ကို တက်ရောက်သွားခဲ့ပါပြီ။ ဒါဟာ ချယ်ဆီးအနေနဲ့ ၃ နှစ်ဆက်တိုက် အုပ်စုဗိုလ်အဖြစ် ရှုံးထွက်အဆင့်ကို တက်ရောက်နိုင်ခဲ့တာလည်းဖြစ်ပါတယ်။ အုပ်စု ပထမနေရာကို အချိန်အတော်ကြာ ဦးဆောင်လာနိုင်ခဲ့တဲ့ ပေါ်တိုကတော့ တတိယနေရာနဲ့ စခန်းသိမ်းခဲ့ပြီး ယူရိုပါမှာ ၀င်ရောက်ယှဉ်ပြိုင်ရပါတော့မယ်။

ဒိုင်နမိုကိဗ်က ဒီနီစ် ဂါမက်ရ်ှရဲ့ ၁၆ မိနစ်ဂိုးနဲ့ တဲလ်အဗီးကို အနိုင်ရပြီး ၁၆ နှစ်ဆက်တိုက် ရှုံးထွက်အဆင့်ကို မတက်ရောက်နိုင်တဲ့ ကံကြမ္မာဆိုးကို အဆုံးသတ်နိုင်ခဲ့ပါတယ်။ တဲလ်အဗီးကတော့ ချန်ပီယံလိဂ် အုပ်စုအဆင့်မှာ ၁ မှတ်မှမရတဲ့ ၁၇ ခုမြောက်အသင်း ဖြစ်လာပါတယ်။

အုပ်စု H

ဂျန့် ၂-၁ ဇင်းနစ်
ဗလင်စီယာ ၀-၂ လိုင်ယွန်

အိမ်ကွင်းမှာ ဂျန့်တို့ အကောင်းဆုံး ကစားခဲ့ပြီး အုပ်စုဒုတိယနဲ့ ထိုက်ထိုက်တန်တန် နောက်တစ်ဆင့်ကို တက်ရောက်နိုင်ခဲ့တာ ဖြစ်ပါတယ်။ ဒါဟာ ဘယ်လ်ဂျီယံကလပ်အသင်းတွေ ချန်ပီယံလိဂ် ၁၆ သင်းအဆင့်ကို ၁၅ နှစ်ကြာ မတက်ရောက်နိုင်တဲ့ မှတ်တမ်းကို ချိုးဖျက်နိုင်ခဲ့တာလည်း ဖြစ်ပါတယ်။ ဇင်းနစ်ကတော့ ချန်ပီယံလိဂ်မှာ အမှတ်အပြည့်ရတဲ့ ၇ သင်းမြောက်ဖြစ်မယ့် အခွင့်အရေးကို လက်လွှတ်ဆုံးရှုံးခဲ့ရပါတယ်။

ဗင်လင်စီယာနည်းပြအဖြစ် ပထမဆုံးယှဉ်ပြိုင်ရတဲ့ပွဲမှာ မန်ယူနောက်ခံလူဟောင်း ဂယ်ရီနဗီးလ်တစ်ယောက် မျက်နှာပန်းမလှခဲ့ပါဘူး။ လိုင်ယွန်ကို ဖိအားမပေးနိုင်တဲ့အပြင် ပထမပိုင်းနဲ့ ဒုတိယပိုင်းမှာ ၁ ဂိုးစီပေးလိုက်ရပါတယ်။ လိုင်ယွန်အတွက် ဒီနိုင်ပွဲဟာ ပထမဆုံးနိုင်ပွဲဖြစ်ခဲ့ပြီး ဗလင်စီယာကတော့ ယူရိုပါနဲ့သာ ကျေနပ်ခဲ့ရပါတယ်။