နိုင်ဂျာတွင် စစ်တပ်က အာဏာသိမ်းရန်ကြံစည်မှုကို အစိုးရက နှိမ်နင်း

ဒီဇင်ဘာ ၂၀၊ ၂၀၁၅
M-Media

– နိုင်ငံတော်အာဏာသိမ်းရန် ကြံစည်နေသည်ဟူသော သံသယဖြင့် စစ်တပ်အရာရှိ ၉ ဦးကို ဖမ်းဆီးလိုက်သည်ဟု အာဖရိကနိုင်ငံတစ်ခုဖြစ်သော နိုင်ဂျာအစိုးရက ယနေ့တွင် ကြေငြာခဲ့သည်။

ယခုသီတင်းပတ်အစောပိုင်းက ဖမ်းဆီးခဲ့ခြင်းဖြစ်ပြီး ၎င်းတို့အား တစ်လတာ စောင့်ကြည့်ခဲ့ခြင်းဖြစ်သည်ဟု ပြည်ထဲရေးဝန်ကြီး ဟာဆူမီ မာဆာအူဒူက ယနေ့တွင်ပြုလုပ်သည့် သတင်းစာရှင်းလင်းပွဲ၌ ပြောကြားခဲ့သည်။

“အာဏာသိမ်းဖို့ ကြိုးစားမှုအတွက် တာဝန်ရှိသူ အရာရှိ ၉ ဦးကို ဖမ်းဆီးလိုက်ပြီး၊ စစ်ခုံရုံးမှာ တရားစွဲဆိုသွားမှာပါ” ဟု ၀န်ကြီးက ပြောကြားခဲ့သည်။ ထိုကဲ့သို့ အာဏာသိမ်းမှုကို တားဆီးနိုင်ခဲ့ခြင်းမှာ ၎င်းတို့၏ အစီအစဉ်များကို ပုံမှန်သတင်းပို့နေသည့် သစ္စာရှိစစ်သားအချို့ကြောင့် ဖြစ်သည်ဟု မာဆာအူဒူက ဆိုသည်။

သမ္မတ မဟာမာဒူ အစ်ဆူဖူကမူ ကြာသာပတေးနေ့က ရုပ်သံမှတစ်ဆင့် ပြောကြားခဲ့သည့် မိန့်ခွန်း၌ အာဏာသိမ်းရန် ကြံစည်သူများမှာ လေကြောင်းအင်အားကို အသုံးပြုရန် စီစဉ်ထားသည်ဟု ဆိုသည်။ သို့သော်လည်း အတိုက်အခံအဖွဲ့ကမူ အစိုးရ၏ ပြာကြားမှုကို ငြင်းဆိုခဲ့ပြီး ဖေဖော်ဝါရီ ၂၁ ရက်နေ့တွင် ကျင်းပရန် စီစဉ်ထားသည့် ရွေးကောက်ပွဲအရင် နိုင်ငံရေးအခြေအနေကို ကြိုးကိုင်လိုသည့် ရည်ရွယ်ချက်ရှိနေသည်ဟု ပြောကြားခဲ့သည်။

Ref: Aljazeera