အင်္ဂလန်သို့လာချင်သည့် ဂွါဒီယိုလာကို ကလော့ပ်သတိပေး

ဇန်န၀ါရီ ၁၁၊ ၂၀၁၆
M-Media

– အင်္ဂလန်ပရီးမီးယားလိဂ်မှာ ဘောလုံးကို ရူးသွပ်သည့်လိဂ်တစ်ခုဖြစ်ပြီး ဂွါဒီယိုလာအနေဖြင့် ထိုအတွက် ပြင်ဆင်ထားသင့်သည်ဟု လီဗာပူးလ်နည်းပြ ကလော့ပ်က သတိပေးပြောကြားလိုက်သည်။

ဂွါဒီယိုလာမှာ ယခုနှစ်ကုန်တွင် ဘိုင်ယန်မြူးနစ်မှ ထွက်ခွာတော့မည်ဖြစ်ပြီး ပရီးမီးယားလိဂ်သို့ လာရောက်ချင်သည်ဟု ဖွင့်ဟထားသည်။ ပရီးမီးယားလိဂ်အသင်းကြီး အများအပြားကလည်း ဂွါဒီယိုလာအား ပစ်မှတ်ထားနေပြီး ထိုအထဲတွင် မန်စီးတီးမှာ ရေပန်းအစားဆုံးဖြစ်နေသည်။ ကလော့ပ်ကမူ ပရီးမီးယားလိဂ် ဓလေ့နှင့်ပတ်သက်၍ သတိပေးခဲ့သည်။

“(ပရီးမီးယားလိဂ်မှာ) ပွဲအများကြီး ကစားရပြီး၊ ဘောလုံးမှ ဘောလုံး ဖြစ်နေတာပါ။ ရာသီအကြိုပြင်ဆင်မှုမှာ အပြစ်အနာအဆာမရှိဖို့ လိုသလို၊ ရှည်လျားတဲ့ရာသီအတွက်လည်း ပြင်ဆင်ရပါတယ်။ ကျွန်တော်တို့ ဒါကိုသိပါတယ်။ ဒါပေမယ့် ခံစားမှုကတော့ မတူပါဘူး။ ပက်ပ် (ဂွါဒိယိုလာ) ဟာ တော်တော်အတွေ့အကြုံရှိတဲ့သူပါ။ ကစားသမား နည်းနည်းလေးဝယ်ပြီး အသင်းကောင်းတစ်သင်းဖြစ်အောင် လုပ်မယ်ဆိုတာ သေချာပါတယ်” ဟု ကလော့ပ်က ပြောကြားခဲ့သည်။

ထို့ပြင် ပရီးမီးယားလိဂ်ကိုလည်း ၎င်းက ထည့်သွင်းချီးကျူးခဲ့သည်။

“ဒီကအကြောင်းပြောရင်တော့ အကောင်းကြီးပဲဖြစ်မှာပါ။ ကြီးကျယ်တဲ့ တိုင်းပြည်၊ သဘောထားကြီးတဲ့ ပြည်သူတွေရှိတယ်။ အစားအသောက်ကလည်း လူတိုင်းပြောတာထက် ပိုကောင်းပါတယ်။ ရာသီဥတုကတော့ အားလုံး ပြောသလိုပဲ မကောင်းပါဘူး”

Ref: Goal