ပါလက်စတိုင်းပိုင်နက်အား အစ္စရေးက ထပ်မံသိမ်းယူမည့်အစီအစဉ်ကို နိုင်ငံတကာက ရှုတ်ချ

ဇန်န၀ါရီ ၂၁၊ ၂၀၁၆
M-Media

– ပါလက်စတိုင်းပိုင်အနောက်ဖက်ကမ်းရှိ ပါလက်စတိုင်းပိုင်နက်များအား သိမ်းယူမည့် အစီအစဉ်တစ်ခုကို အစ္စရေးက ထုတ်ပြန်လိုက်ပြီး ထိုအစီအစဉ်အား ကုလနှင့် အမေရိကန်တို့က ရှုတ်ချပြောဆိုလိုက်သည်။

ဂျော်ဒန်မြစ်အနီးရှိ ပါလက်စတိုင်းမြို့ အာရီဟာမှ မြေဧက ၃၇၀ ခန့်ကို စိုက်ပျိုးမြေအဖြစ် သိမ်းယူရန် အစ္စရေးက စီစဉ်ခြင်းဖြစ်ပြီး ယမန်နေ့က ထိုအစီအစဉ်ကို ကြေငြာခဲ့သည်။ ကုလသမဂ္ဂ အထွေထွေအတွင်းရေးမှူးချုပ် ဘန်ကီမွန်ကမူ ထိုလုပ်ရပ်မှာ နိုင်ငံတကာ ဥပဒေများနှင့် မညီညွတ်ဟု ပြောကြားခဲ့သည်။

“အနောက်ဖက်ကမ်းက မြေဧက ၃၇၀ ကို သူတို့ပိုင်တဲ့မြေဆိုပြီး အစ္စရေးက ကြေငြာတယ်ဆိုတဲ့ သတင်းတွေနဲ့ပတ်သက်ပြီး အထွေထွေအတွင်းရေးမှူးချုပ်က အလွန်အမင်း စိုးရိမ်မိပါတယ်။ ဒီလို တရားမ၀င် အခြေချတည်ဆောက်မှုတွေဟာ နိုင်ငံတကာဥပဒေကို ချိုးဖောက်မှုတစ်ခုဖြစ်ပြီး ပြဿနာကို သံတမန်နည်းလမ်းအရ အဖြေရှာဖို့ကိစ္စကို အစ္စရေးက ထောက်ခံတယ်ဆိုတဲ့ လူသိရှင်ကြား ကြေငြာထားမှုနဲ့လည်း ဆန့်ကျင်နေပါတယ်” ဟု ကုလမှ ထုတ်ပြန်သည့် ကြေငြာချက်တွင် ဖော်ပြထားသည်။

အမေရိကန်အစိုးရ ပြောရေးဆိုခွင့်ရှိသူကလည်း အစ္စရေး၏ထိုလုပ်ရပ်မှာ နှစ်နိုင်ငံအဖြေအတွက် ကတိက၀တ်နှင့် ဆန့်ကျင်နေသည်ဟု ပြောကြားခဲ့သည်။

“တရားမ၀င်အခြေချမှုကို အရှိန်မြှင့်စေတဲ့ ဘယ်လို ဆောင်ရွက်ချက်မျိုးမဆို ကျွန်တော်တို့ ပြင်းပြင်းထန်ထန် ဆန့်ကျင်ပါတယ်။ အဲဒါတွေဟာ နှစ်နိုင်ငံအဖြေနဲ့ သဟဇာတမဖြစ်ဘူးလို့လည်း ကျွန်တော်တို့ ယုံကြည်ပါတယ်။ ပြီးတော့ အစ္စရေးအစိုးရရဲ့ ကတိက၀တ်ကို မေးခွန်းထုတ်စရာလည်း ဖြစ်လာပါတယ်” ဟု ပြောရေးဆိုခွင့်ရှိသူ မာ့က် တိုနာက ပြောကြားခဲ့သည်။

အစ္စရေးအာဏာပိုင်များက ပါလက်စတိုင်းများအပေါ် ဆက်ဆံမှုနှင့် ပါလက်စတိုင်းတို့၏ မြေများ သိမ်းယူမှုကို အစ္စရေးနိုင်ငံဆိုင်ရာ အမေရိကန် သံအမတ်ကြီး ဒန် ရှာပီရိုက ယခုသီတင်းပတ်အစောပိုင်းတွင် ဝေဖန်ရှုတ်ချခဲ့သည်။ ထို့ပြင် ပါလက်စတိုင်းပိုင် အနောက်ကမ်းနှင့်ပတ်သက်၍ အစ္စရေး၏ ရေရှည်သဘောထားကို မေးခွန်းထုတ်ခဲ့ပြီး၊ ပါလက်စတိုင်းပိုင်နက်များအတွင် အစ္စရေးက ဆောက်လုပ်နေသော တရားမ၀င်အခြေချအိမ်ယာများနှင့်ပတ်သက်၍ အမေရိကန်အစိုးရ စိုးရိမ်ကာ၊ နားမလည်နိုင်အောင်ဖြစ်ရသည်ဟု ရှာပီရိုက ထည့်သွင်းပြောကြားခဲ့သည်။

Ref: PressTV