ဘူရန်ဒီတွင် လူအစုလိုက်အပြုံလိုက် မြှုပ်နှံထားသည့်နေရာများ တွေ့ရှိ

ဇန်န၀ါရီ ၃၀၊ ၂၀၁၆
M-Media

– ပြီးခဲ့တဲ့နှစ်အတွင်း နိုင်ငံရေးအကြမ်းဖက်မှုကြောင့် လူအများအပြားသေဆုံးခဲ့ရတဲ့ ဘူရန်ဒီနိုင်ငံ မြို့တော်အနီးမှာ လူအစုလိုက်အပြုံလိုက် မြှုပ်နှံထားနိုင်ဖွယ်ရာရှိတဲ့ နေရာ ၅ ခုကို တွေ့ရှိခဲ့တယ်လို့ နိုင်ငံတကာလူ့အခွင့်အရေးအဖွဲ့တစ်ခုဖြစ်တဲ့ Amnesty International က ယခုတစ်ပတ်မှာ ပြောကြားလိုက်ပါတယ်။

ကောင်းကင်ဓာတ်ပုံတွေနဲ့ ဗီဒီယိုခြေရာခံချက်တွေကို ကြည့်ခြင်းအားဖြင့် မြို့တော်ဘူဂျန်ဘူရာရဲ့ ဆင်ခြေဖုံး ဘူရင်ဂါဒေသက နေရာတွေမှာ လူအစုလိုက်အပြုံလိုက် မြှုပ်နှံထားတယ်ဆိုတာ သက်သေခံနေတယ်လို့ အဲဒီ လူ့အခွင့်အရေးအဖွဲ့က ထည့်သွင်းပြောကြားခဲ့တာပါ။

“လုံခြုံရေးတပ်ဖွဲ့တွေရဲ့ သတ်ဖြတ်မှုနဲ့ အမှန်တရားထွက်ပေါ်လာမှာကို ဖုံးဖိဖို့ အာဏာပိုင်တွေက ရည်ရွယ်ချက်ရှိရှိ လုပ်ဆောင်နေတယ်ဆိုတာ ဒီဓာတ်ပုံတွေက ပြသနေပါတယ်”လို့ အရှေ့အာဖရိကဆိုင်ရာ Amnesty International အဖွဲ့ ဒါရိုက်တာ မူသိုနီ ၀မ်ရယ်ကီက ဆိုပါတယ်။

ဘူရွန်ဒီစစ်တပ်ကတော့ ၂၀၁၅ ခုနှစ် ဒီဇင်ဘာ ၁၁ ရက်နေ့မှာ စစ်အခြေစိုက်စခန်းတွေကို တိုက်ခိုက်တဲ့အတွက် အနည်းဆုံး လက်နက်ကိုင် ၁၂ ယောက်လောက်ကို ပစ်သတ်ခဲ့တယ်လို့ ထုတ်ပြန်ခဲ့ပါတယ်။ အချို့သော ရင်းမြစ်တွေကတော့ အဆိုပါ ဖြိုခွင်းမှုအတွင်းမှာ လူ ၈၇ ယောက်ကျော်လောက် အသတ်ခံခဲ့ရတယ်လို့ ဆိုပါတယ်။

အာဖရိကနိုင်ငံတစ်နိုင်ငံဖြစ်တဲ့ ဘူရန်ဒီနိုင်ငံမှာ သမ္မတ နူကူရန်ဇီဇာက အခြေခံဥပဒေနဲ့ဆန့်ကျင်ပြီး တတိယအကြိမ်မြောက် သမ္မတတာဝန် ထမ်းဆောင်မယ်လို့ ပြောကြားခဲ့တဲ့ ၂၀၁၅ ခုနှစ် ဧပြီလနှောင်းပိုင်းကစလို့ နိုင်ငံရေး မတည်မငြိမ်မှုတွေ ဖြစ်ခဲ့တာဖြစ်ပါတယ်။

ကုလသမဂ္ဂလူအခွင့်အရေး အကြီးအကဲ ဇီအစ် ရာအဒ် အလ်-ဟူစိန်က အာဏာပိုင်တွေဟာ အိမ်အတွင်းရှာဖွေစစ်ဆေးခြင်း၊ ဖမ်းဆီးထိန်းသိမ်းခြင်း၊ သေဒဏ်စီရင်ခြင်း စတဲ့နည်းတွေနဲ့ မငြိမ်မသက်မှုတွေကို တုံ့ပြန်ခဲ့တယ်လို့ ပြောကြားခဲ့ပါတယ်။

ကုလသမဂ္ဂကရရှိခဲ့တဲ့ အာကာသဓာတ်ပုံတွေကို ယခုလအစောပိုင်းက ဆန်းစစ်လေ့လာကြည့်ရာမှာ အနည်းဆုံးလူအစုလိုက်သေဆုံးမှု ၉ ခုထက်မနည်းရှိခဲ့တယ်လို့ ဆိုပါတယ်။ အဲဒီအထဲမှ ဘူဂျမ်ဘူရာမြို့ တစ်ဝိုက်က လူအစုလိုက်သေဆုံးမှုတစ်ခုဆိုရင် သေဆုံးသူ ၁၀၀ ကျော်ပါဝင်တယ်လို့ ပြောကြားခဲ့ပါတယ်။

ဘူရန်ဒီနီုင်ငံမှာ ဖြစ်ပွားခဲ့တဲ့ အကြမ်းဖက်မှုတွေကြောင့် အနည်းဆုံး ၄၃၉ ဦး သေဆုံးခဲ့ပြီး ပြည်သူ ၂၄၀၀၀၀ လောက်ကလည်း ပြည်ပကို ထွက်ပြေးပုန်းရှောင်နေတယ်လို့ ကုလသမဂ္ဂက ပြောကြားခဲ့ပါတယ်။

Ref: Presstv