ပါလက်စတိုင်း နယ်မြေများ အစ္စရေး သိမ်းယူနေမှု စည်းစည်းလုံးလုံး ဆန့်ကျင်ရန် မွတ်စလင်မ် ကမ္ဘာကို အီရန် တိုက်တွန်း

မတ် ၈၊ ၂၀၁၆
M-Media

– ပါလက်စတိုင်းနယ်မြေတွေကို အစ္စရေးက သိမ်းပိုက်ထားမှုနဲ့ပက်သက်ပြီး ဆန့်ကျင်ရာမှာ ကမ္ဘာတစ်ဝန်းက မွတ်စလင်တွေ စုစည်းညီညွှတ်ကြဖို့ အီရန်နိုင်ငံခြားရေးဝန်ကြီး မိုဟာမက် ဂျာဗဒ် ဇာရစ်ဖ်က တောင်းဆိုလိုက်ပါတယ်။

“မတူညီမှုတွေကို ဘေးဖယ်ပြီး မွတ်စလင်ဆိုတဲ့ခေါင်းစဉ်အောက်မှာ နယ်မြေသိမ်းပိုက်မှု ပုံစံအားလုံးကို အဆုံးသတ်စေဖို့ မူဘောင်တစ်ခုချပြီး လက်တွေ့လုပ်ကိုင်မှုတွေ ဆောင်ရွက်ရတော့မှာ ဖြစ်ပါတယ်” လို့ ဇာရစ်ဖ်က အင်ဒိုနီးရှားနိုင်ငံ ဂျကာတာမှာ ကျင်းပတဲ့ ပါလက်စတိုင်းဆိုင်ရာ ငါးကြိမ်မြောက် အိုအိုင်စီအထူးအစည်းအဝေး ဒုတိယမြောက်နေ့ဖြစ်တဲ့ တနင်္ဂနွေနေ့မှာ ပြောကြားခဲ့ပါတယ်။

ပါလက်စတိုင်းပြည်သူတွေ အပြည့်အ၀လွတ်မြောက်ဖို့ ရည်ရွယ်ပြီး မွတ်စလင်နိုင်ငံတွေအနေနဲ့ အစ္စရေးရဲ့ မတရားကျူးကျော်မှုတွေကို ကာကွယ်တားဆီးဖို့ လိုအပ်နေပြီဖြစ်ကြောင်း၊ ပါလက်စတိုင်းပိုင်နက်တွေကို အစ္စရေးက ကျူးကျော်သိမ်းပိုက်နေတာဟာ နိုင်ငံတကာဥပဒေကို ဗြောင် ချိုးဖောက်နေတာဖြစ်ကြောင်း ၎င်းက ထည့်သွင်းပြောကြားခဲ့ပါတယ်။

နောက်ပြီး ကမ္ဘာ့ငြိမ်းချမ်းရေးနဲ့ လုံခြုံရေးကို ခြိမ်းခြောက်နေတဲ့ အစ္စရေးရဲ့ လုပ်ရပ်တွေကို အရေးယူဖို့ ကုလသမဂ္ဂ လုံခြုံရေးကောင်စီက ပျက်ကွက်နေတယ်လို့လည်း ဇာရစ်ဖ်က ဝေဖန်ခဲ့ပါတယ်။ ကမ္ဘာတစ်ဝှမ်း အစိုးရတွေက အစ္စရေးရဲ့ မတရားလုပ်ရပ်တွေအပေါ် လစ်လျူရှုတာနဲ့ပတ်သက်ပြီးလည်း အီရန်နိုင်ငံခြားရေးဝန်ကြီးက မီးမောင်းထိုးပြခဲ့ပြီး အိုအိုင်စီအဖွဲ့ဝင် နိုင်ငံတွေအနေနဲ့ ပါလက်စတိုင်းကိစ္စမှာ ဆက်လက်ပြီး စိတ်နှစ်မြှုပ် လုပ်ဆောင်သွားရမယ်လို့လည်း ဆိုပါတယ်။

နောက်ဆုံးမှာတော့ ပါလက်စတိုင်းတွေရဲ့ အစ္စရေးအား တွန်းလှန်နေမှုကို အီရန် အစ္စလာမ့်သမ္မတနိုင်ငံက ဆက်လက် အားပေးထောက်ခံ ပံ့ပိုးသွားမယ်လို့ ဇာရစ်ဖ်က နိဂုံးချုပ် ပြောကြားခဲ့ပါတယ်။

၂၀၁၅ သြဂုတ်လက ဂျေရုဆလင်မှာရှိတဲ့ အလ်-အက်ဆွာ ဗလီဝတ်ကျောင်းတော်ကို ၀တ်ပြုဖို့ဝင်ရောက်လာတဲ့ ပါလက်စတိုင်းပြုသူတွေကို အစ္စရေးက အင်အားသုံး တားဆီးပိတ်ပင်ရာကနေ ပါလက်စတိုင်းပိုင်နက်တွေမှာ တင်းမာမှုတွေ ဖြစ်ပေါ်ခဲ့ပြီး၊ အဲဒီတင်းမာမှုတွေအတွင်းမှာ အစ္စရေးတပ်ဖွဲ့တွေရဲ့ လက်ချက်ကြောင့် အမျိုးသမီးနဲ့ ကလေးငယ်များအပါအ၀င် ပါလက်စတိုင်းပြည်သူ ၁၉၀ ကျော်လောက် အသက်ဆုံးရှုံးခဲ့ရပါတယ်။

Ref; Presstv