အာရုံခံစားနိုင်သည့် လက်အတုကို သိပ္ပံပညာရှင်များ ဖန်တီးနိုင်

မတ် ၁၃၊ ၂၀၁၆
M-Media

– လက်မရှိသူတွေရဲ့ လက်မောင်းအာရုံကြောတွေနဲ့ ချိတ်ဆက်ကာ မျက်နှာပြင်တွေရဲ့ ချောမွတ်မှု၊ ကြမ်းတမ်းမှုကို သိရှိခံစားနိုင်တဲ့ လက်အတုကို ဖန်တီးနိုင်ခဲ့ပြီလို့ ဆွစ်ဇာလန်နဲ့ အီတလီက သိပ္ပံပညာရှင်တွေက ပြောကြားလိုက်ပါတယ်။

အဲဒီလက်အတုဟာ ခွဲစိတ်စရာမလိုဘဲ၊ ဒီအတိုင်း ပုံမှန်တပ်ဆင်လိုက်ရုံနဲ့ အချိန်နဲ့ တစ်ပြေးညီ မျက်နှာပြင်တွေကို ထိတွေ့ခံစားနိုင်မှာဖြစ်ပြီး လက်အတုနယ်ပယ်မှာတော့ ထင်ရှားတဲ့ အောင်မြင်တိုးတက်မှုတစ်ခုလည်း ဖြစ်ပါတယ်။

ယခုတီထွင်မှုကြောင့် အာရုံခံတုံ့ပြန်နိုင်တဲ့ ကိုယ်လက်အင်္ဂါတု ထုတ်လုပ်ရာမှာ အရှိန်မြှင့်တင်ရေး ကူညီပေးနိုင်ဖို့ မျှော်လင့်ရပြီး၊ ဝေဒနာရှင်တွေရဲ့ ယခင်စွမ်းရည်မျိုးကို ပြန်လည်ရရှိအောင် လုပ်ဆောင်နိုင်မယ့် အလားအလာလည်း ရှိနေပါတယ်။

၂၀၀၄ ခုနှစ်က မီးရှုးမီးပန်း ပစ်လွှတ်မှုကြောင့် လက်တစ်ချောင်းလုံး ဒဏ်ရာရကာ ဖြတ်တောက်ဖြစ်ခဲ့ရတဲ့ ဝေဒနာရှင် ဒဲနစ် အာဘို ဆိုရန်ဆင်ဟာ သာမန်ကိုင်တွယ်လို့ရတဲ့ လက်အတုကို နှစ်ပေါင်းများစွာ အသုံးပြုခဲ့ရပြီး ၂၀၁၄ ခုနှစ်အရောက်မှာတော့ အီတလီ သုတေသနပညာရှင်တွေက သူ့ကို အာရုံခံနိုင်တဲ့ လက်အတုနဲ့ အစားထိုးပေးခဲ့ပါတယ်။

အဲဒီ လက်အတုမှာပါဝင်တဲ့ အာရုံခံကိရိယာကို ချိတ်ဆက်ဖို့ ဆိုရန်ဆင်ရဲ့ လက်မောင်းမှာ လျှပ်စစ်ငုတ်များ ထည့်သွင်းခဲ့ရပါတယ်။ ဆိုရန်ဆင်ကတော့ တကယ့်လက်အစစ်လိုပဲ ထိတွေ့ခံစားနိုင်ကာ ပစ္စည်းမျိုးစုံထဲကနေ လိမ္မော်သီးနဲ့ ဘေ့စ်ဘောတို့ကို ခွဲခြားသိမြင်နိုင်ခဲ့တယ်လို့ ဆိုပါတယ်။

နောက်ထပ်လေ့လာမှုတစ်ခုမှာတော့ သိပ္ပံပညာရှင်တွေဟာ ကြမ်းတမ်းတဲ့ မျက်နှာပြင်နဲ့ ချောမွေ့တဲ့မျက်နှာပြင် ခွဲခြားဖို့ ဖန်တီးခဲ့ကြပြီး ဆိုရန်ဆင်ကို တပ်ဆင်ပေးခဲ့ပါတယ်။ အဲဒီနောက် မျက်လုံးအ၀တ်စည်းထားပြီး စမ်းသပ်မေးမြန်းခဲ့ရာ မျက်နှာပြင်ခြားနားမှုကို ၉၆ ရာခိုင်နှုန်းခန့် မှန်ကန်စွာ ဖြေဆိုနိုင်ခဲ့ပါတယ်။

Ref: IINA