နယူးဇီလန်၏ ထိပ်တန်းနည်းပညာတက္ကသိုလ်မှ ပညာသင်ဆုကို မြန်မာနိုင်ငံဖွားတစ်ဦး ရရှိ

မတ် ၂၆၊ ၂၀၁၆
M-Media

– နယူးဇီလန်၏ ထိပ်တန်း နည်းပညာတက္ကသိုလ် Wintec မှ ချီးမြှင့်သည့် Gordon Chesterman ပညာတော်သင်ဆုကို မြန်မာနိုင်ငံမှ ဒုက္ခသည်အဖြစ် လာရောက်နေထိုင်သည့် ကျောင်းသူတစ်ဦးက ရရှိခဲ့သည်ဟု သိရသည်။

အသက် ၂၇ နှစ်အရွယ် ဖြူဖြူလွင်ကျော်ဖြစ်ပြီး အသုံးချ သတင်းအချက်အလက် နည်းပညာ ဘာသာရပ်ဖြင့် ဘွဲ့ရရှိထားသူ ဖြစ်သည်။ မုဆိုးမဖြစ်သူ မိခင်နှင့် နေထိုင်ရသည့် သူမမှာ ၂၀၀၈ ခုနှစ်က မလေးရှားသို့ ဒုက္ခသည်အဖြစ် ရောက်ရှိခဲ့ပြီးနောက် ၂၀၁၃ ခုနှစ်တွင် နယူးဇီလန်၌ နေရာချထားပေးခြင်း ခံခဲ့ရသည်။

ထို့နောက် Wintec ၏ အင်္ဂလိပ်ဘာသာစကား သင်ကြားပေးသည့်အစီအစဉ်ကို တက်ရောက်ခဲ့သည်။ သူမမှာ မြန်မာနိုင်ငံတွင် ကွန်ပျူတာတက္ကသိုလ်မှ ဘွဲ့ရခဲ့သူဖြစ်ပြီး Wintec တွင် အသုံးချ သတင်းအချက်အလက်နည်းပညာ အထူးပြုဖြင့် တက်ရောက်ကာ နယူးဇီလန်၌ ထပ်မံဘွဲ့ရခဲ့သည်။

“ဒီနယ်ပယ်မှာ အလုပ်အကိုင်အခွင့်အလမ်း ကောင်းမွန်တယ်ဆိုတာ ကျွန်မသိပါတယ်။ ကွန်ပျူတာနဲ့ပတ်သက်ပြီး ကျွန်မ အခြေခံ တတ်ကျွမ်းထားပြီး ဖြစ်ပေမယ့် မြန်မာနိုင်ငံက ပညာရေးက ဒီမှာနဲ့မတူပါဘူး။ ကျွန်မရဲ့ အိပ်မက်က ၀ဘ်ဆိုက်ဖန်တီးသူတစ်ယာက် ဖြစ်ဖို့ပါ။ ကျွန်မရဲ့ ကျွမ်းကျင်မှုကို အကူအညီဖြစ်စေမယ့် အခွင့်အလမ်း နယူးဇီလန်မှာ ရတဲ့အတွက် ကျေနပ်မိပါတယ်။ အခုတော့ ဒီနေရာကို ကျွန်မရဲ့ ဇာတိလို့ ခံစားရပါပြီ။ ဒီ ပညာတော်သင်ဆုဟာ ကျွန်မရဲ့ဘ၀ကို ပြောင်းလဲပေးမှာပါ။ ဒါက ကျွန်မကို ယုံကြည်မှုမြင့်မားစေတယ်။ ကျွန်မ ရှေ့ဆက်လျှောက်ဖို့၊ ကျွန်မရဲ့ လေ့လာမှုကို အဆုံးသတ်နိုင်ဖို့ လိုအပ်နေတဲ့ အားတစ်ခုလည်း ဖြစ်ပါတယ်” ဟု ဖြူဖြူလွင်ကျော်က ပြောကြားခဲ့သည်။

ကန်ဒေါ်လာ ၁၅၀၀၀ တန်ဖိုးရှိ ပညာတော်သင်ဆုအား ဗုဒ္ဓဟူးနေ့က ဂေါ်ဒွန်ချက်စတာမန်ကိုယ်တိုင် ချီးမြှင့်ပေးခဲ့ခြင်းဖြစ်ပြီး၊ ဖြူဖြူလွင်ကျော်၏ ပညာရပ်အပေါ် စိတ်ဝင်စားမှု၊ လူ့အဖွဲ့အစည်းအား ကူညီမှု၊ ခေါင်းဆောင်မှုစွမ်းရည် ရှိမှုတို့အတွက် အထင်ကြီး လေးစားခဲ့ရသည်ဟု ချက်စတာမန်က ပြောကြားခဲ့သည်။

Ref: Wintec