မြန်မာနိုင်ငံရှိ အစ္စလာမ်ဘာသာဝင် လူ့အဖွဲ့အစည်းအား ထိခိုက်စေသည့် သူရဦးအောင်ကို၏ မှတ်ချက်အတွက် မြန်မာနိုင်ငံလုံးဆိုင်ရာ အစ္စလာမ်ဘာသာရေးအဖွဲ့ကြီးက ကန့်ကွက်စာထုတ်ပြန်

ဧပြီ ၃၊ ၂၀၁၆
M-Media

– VOA နှင့် အင်တာဗျူးတွင် သာသနာရေးနှင့် ယဉ်ကျေးမှုဝန်ကြီး သူရဦးအောင်ကိုက မြန်မာနိုင်ငံအတွင်းရှိ အစ္စလာမ်ဘာသာဝင် လူ့အဖွဲ့အစည်းအား ထိခိုက်နစ်နာစေသည့်၊ စော်ကားသည့် မှတ်ချက်အတွက် မြန်မာနိုင်ငံလုံးဆိုင်ရာ အစ္စလာမ်ဘာသာရေးအဖွဲ့ကြီးက သာသနာရေးဝန်ကြီးဌာနသို့ ကန့်ကွက်စာနှင့် သမိုင်းအထောက်အထားများ ပေးပို့ခဲ့သည်ဟု သိရသည်။

ဧပြီလ ၁ ရက်နေ့က ပြုလုပ်ခဲ့သည့် အဆိုပါအင်တာဗျူးတွင် စစ်အာဏာရှင်လက်ထက်နှင့် စစ်တပ်ကျောထောက်နောက်ခံပြု သမ္မတဦးသိန်းစိန်အစိုးရ လက်ထက်တွင် မြန်မာနိုင်ငံအတွင်း ဗုဒ္ဓဘာသာမဟုတ်သော အခြားဘာသာဝင်များကို ဖိနှိပ်ခြင်း၊ ခွဲခြားခြင်းနှင့်ပတ်သက်၍ မေးမြန်းရာ ၀န်ကြီး သူရဦးအောင်ကိုက “ဧည့်နိုင်ငံသားတွေ အများစုကိုးကွယ်တဲ့ အစ္စလာမ်ဘာသာ၊ ဟိန္ဒူဘာသာအပါအ၀င် အခြား ဘာသာငယ်တွေအပေါ်မှာတော့ဖြင့် ထူးပြီးတော့မှ ဖိနှိပ်ချုပ်ချယ်တာမျိုး မရှိခဲ့ပါဘူး” ဟု ပြန်လည်ဖြေကြားခဲ့သည်။

ထိုသို့ဖြေကြားမှုမှာ မြန်မာနိုင်ငံတွင်း ရှေးပဝေသဏီကတည်းက နေထိုင်ခဲ့ကြကာ တိုင်းပြည်အတွက် ကျရာအခန်းကဏ္ဍမှ တာဝန်ကျေပွန်ခဲ့သည့် အစ္စလာမ်ဘာသာဝင်လူ့အဖွဲ့အစည်းအား ထိခိုက်နစ်နာစေသောကြောင့် အစ္စလာမ်ဘာသာဝင်များနှင့် လူမျိုးဘာသာမခွဲခြားသည့် ပြည်သူများက သူရဦးအောင်ကိုအား ဝေဖန်ရှုတ်ချခဲ့ကြသည်။

မြန်မာနိုင်ငံရှိ အစ္စလာမ်ဘာသာဝင်လူ့အဖွဲ့အစည်းကို ကိုယ်စားပြုသည့် အစ္စလာမ်ဘာသာရေးအဖွဲ့ကြီးကလည်း သာသနာရေးနှင့် ယဉ်ကျေးမှုဝန်ကြီးဌာနသို့ လိပ်မူ၍ ဧပြီ ၃ ရက်နေ့ (ယနေ့) ရက်စွဲဖြင့် ကန့်ကွက်စာ တစ်စောင် ထုတ်ပြန်ခဲ့သည်။

အဆိုပါ ကန့်ကွက်စာတွင် ကမ္ဘာ့ဘာသာကြီးများဖြစ်သော၊ ဟိန္ဒူဘာသာ၊ ဗုဒ္ဓဘာသာ၊ ခရစ်ယာန်ဘာသာနှင့် အစ္စလာမ်ဘာသာတို့မှာ လွန်လေခဲ့သော နှစ်ပရိစ္ဆေဒရှည်ကြာစွာကပင် မြန်မာနိုင်ငံသို့ ရောက်ရှိလာခဲ့ကြောင်း၊ ယနေ့အချိန်အခါမှာ နိုင်ငံအတွင်းရှိ လူမျိုးစုံ၊ ဘာသာစုံပြည်သူများမှာ မိမိတို့ဆန္ဒပြု မဲပေးခဲ့သည့် အစိုးရ ပေါ်ပေါက်လာသည့်အတွက် များစွာ နှစ်ထောင်းအားရ ၀မ်းမြောက်နေကြသည့် အချိန်အခါသမယဖြစ်ကြောင်း ဖော်ပြထားသည်။

ထို့ပြင် ၀န်ကြီးသူရဦးအောင်ကို၏ ထိုမှတ်ချက်အတွက် ‘မြန်မာနိုင်ငံသား အစ္စလာမ်ဘာသာဝင်ထု တစ်ရပ်လုံးက အလွန်အမင်း စိတ်ထိခိုက်ရပါသည်’ ဟု ဖော်ပြကာ ထိုမှတ်ချက်အား အလေးအနက် ကန့်ကွက်ခဲ့သည်။

“မြန်မာနိုင်ငံ တိုင်းရင်းသား၊ နိုင်ငံသားများတွင် အစ္စလာမ်ဘာသာ သက်ဝင်ယုံကြည်ကိုးကွယ်သူများ ရှိနေပါလျက် ချန်လှပ်၍ အစ္စလာမ်ဘာသာဝင်များအားလုံးကို ဧည့်နိုင်ငံသားများသဖွယ် ပြောကြားခဲ့ခြင်းကို ဤ မြန်မာနိုင်ငံလုံးဆိုင်ရာ အစ္စလာမ်ဘာသာရေးအဖွဲ့ကြီးက (လုံးဝ) သဘောမတူကြောင်း အလေးအနက် ကန့်ကွက်တင်ပြအပ်ပါသည်” ဟု မြန်မာနိုင်ငံလုံးဆိုင်ရာ အစ္စလာမ်ဘာသာရေးအဖွဲ့ကြီး၏ ထိုကန့်ကွက်စာတွင် ထပ်လောင်း ဖော်ပြခဲ့သည်။

သာသနာရေးနှင့် ယဉ်ကျေးမှုဝန်ကြီး သူရဦးအောင်ကို၏ ထိုအငြင်းပွားဖွယ်မှတ်ချက်မှာ နိုင်ငံသားပြည်သူများအကြား နားလည်မှုလွဲမှားကာ ၀ိဝါဒ ကွဲပြားစေနိုင်သဖြင့် သာသနာရေးနှင့် ယဉ်ကျေးမှုဝန်ကြီးဌာနက အမှန်အတိုင်း ပြန်လည်ရှင်းလင်းဖော်ပြပေးရန်လည်း မြန်မာနိုင်ငံလုံးဆိုင်ရာ အစ္စလာမ်ဘာသာရေးအဖွဲ့ကြီးက ထည့်သွင်းတောင်းဆိုခဲ့သည်။

ထိုကန့်ကွက်စာနှင့်အတူ မြန်မာနိုင်ငံရှိ အစ္စလာမ်ဘာသာဝင်များ၏ ခိုင်မာသော သမိုင်းမှတ်တမ်းများ၊ စာအုပ်စာတမ်းများကိုလည်း မြန်မာနိုင်ငံလုံးဆိုင်ရာ အစ္စလာမ်ဘာသာရေးအဖွဲ့ကြီးက သာသနာရေးနှင့် ယဉ်ကျေးမှုဝန်ကြီးဌာနသို့ တစ်ပါတည်း ပေးပို့ခဲ့သည်။