မွတ်စလင်ဆန့်ကျင်ရေးကို ကန့်ကွက်သည့် လှုပ်ရှားမှုတစ်ခုကို အမေရိကန် အမျိုးသမီးတစ်ဦး စတင်

ဧပြီ ၁၄၊ ၂၀၁၆
M-Media

– အမေရိကန်နိုင်ငံ ဖလော်ရီဒါပြည်နယ်ရဲ့ စိန့်သြဂတ်စတင်းကမ်းခြေမှာ ထောင်ထားတဲ့ အစ္စလာမ်ဆန့်ကျင်ရေးကြော်ငြာဘုတ်အတွက် ဆန့်ကျင်တဲ့ လှုပ်ရှားမှုတစ်ခုကို မွတ်စလင်မဟုတ်သူ အမျိုးသမီးတစ်ဦးက စတင်လိုက်တယ်လို့ သိရပါတယ်။

ဘက်ကီ ၀ီလီယံဆိုတဲ့ အမျိုးသမီးဖြစ်ပြီး အစ္စလာမ်ဘာသာကို သက်ဝင်ယုံကြည်သူတွေအပေါ် မိမိတို့လူ့အဖွဲ့စည်းက ပေးချင်တဲ့သတင်းစကားက ဒီလို အမုန်းတရားမျိုးမဟုတ်ဘူးလို့ သူမက ထည့်သွင်းပြောကြားခဲ့ပါတယ်။

“ဒါဟာကျမကို စိတ်အနှောင့်အယှက်ဖြစ်စေပါတယ်။ ကျွန်မသမီးနဲ့ ထိုင်နေတုန်းမှာ ဘယ်လို တွေးမိလဲဆိုတော့ ‘တကယ်လို့ ဒါဟာ ကျွန်မတို့ သက်ဝင်ယုံကြည်တဲ့ ဘာသာတရားဖြစ်နေရင် ကျွန်မ သမီးကို ဘယ်လိုရှင်းပြရမလဲ ဆိုတာပါပဲ’ ”

ဒါ့ကြောင့်သူမဟာ ပြီးခဲ့တဲ့ စနနေ့ကစပြီး ဒီလို အမုန်းတရား ပြန့်နှံ့စေတဲ့ လုပ်ဆောင်မှုတွေကို ရပ်တန့်ဖို့ တိုက်တွန်းစာတစ်စောင်ကို ရေးသားက အွန်လိုင်းကနေ ဖြန့်ချီခဲ့ပြီး အဲဒီ တိုက်တွန်းစာမှာ လူပေါင်း၂၀၀၀ ကျော်က လက်မှတ်ရေးထိုးခဲ့ပါတယ်။ အဲ့ဒီထဲက တစ်ချို့တွေဟာ အိန္ဒိယလို ဝေးလံတဲ့နေရာတွေကလည်း ပါဝင်ပါတယ်။

စိန့်သြဂတ်စတင်း အစ္စလာမ့်စင်တာက ရှေ့ဆောင်အီမာမ်ဖြစ်သူ အနတ်စ် ဘန်ဂျီလွန်ကတော့ ဒီလိုအမုန်းတရားကို ပြန့်နှံ့စေတဲ့ ကြော်ငြာဆိုင်းဘုတ်အတွက် မိမိတို့အနေနဲ့ အံအားသင့်ခဲ့ရကြောင်း၊ ဘယ်သူက ငွေကြေးစိုက်ထုတ်ပေးလဲဆိုတာ မသိရကြောင်း ပြောကြားခဲ့ပါတယ်။

ဒီလုပ်ရပ်ကို မွတ်စလင်မဟုတ်တဲ့ အမျိုးသမီးက ဆန့်ကျင်တယ်ဆိုတဲ့ အခြေအနေမျိုးဟာ မိမိရဲ့ နှလုံးသားကို ကိုင်လှုပ်လိုက်သလို ဖြစ်ခဲ့တယ်လို့လည်း ရှေ့ဆောင်အီမာမ်က ထည့်သွင်းပြောကြားခဲ့ပါတယ်။

“ကျွန်တော် သူမနဲ့ မဆုံတွေ့ဖူးပါဘူး။ သူတို့တွေဟာ ကျွန်တော်နေတဲ့ စိန့်သြဂတ်စတင်းက အကြင်နာ မေတ္တာနဲ့ ပြည့်ဝတဲ့ လူတွေပါပဲ။ ဒီလို မွတ်စလင်မဟုတ်တဲ့လူတစ်ယောက်ရဲ့လုပ်ရပ်မျိုးကို တွေ့မြင်လိုက်ရတာဟာ စိန့်သြဂတ်စတင်းမှာ နေထိုင်တဲ့သူတွေရဲ့ အကြင်နာတရားကို သက်သေပြလိုက်တာပါပဲ” လို့ အနတ်စ်က ပြောကြားခဲ့ပါတယ်။

ဘက်ကီ ၀ီလီယံကတော့ မတရားတဲ့ အဖြစ်အပျက်တစ်ခုကို မြင်တွေ့ပြီဆိုရင် ငြိမ်မနေသင့်ဘူးလို့ မှတ်ချက်ပြုခဲ့ပါတယ်။

“မတရားတဲ့အဖြစ်အပျက်တစ်ခုခုကို ရှင်တို့မြင်တွေ့လိုက်ရတဲ့အခါ မတရားလုပ်ခံရတဲ့သူဘက်က ရပ်တည်ပြီး တစ်ခုခုလုပ်ပါ။ ဘယ်လောက်သေးငယ်တဲ့လုပ်ရပ်ဖြစ်ဖြစ် ကိစ္စမရှိပါဘူး”

Ref: IINA