ပါလက်စတိုင်းများ နေရပ်စွန့်ခွာရအောင် အစ္စရေးက ဘယ်လို ဖိနှိပ်ချုပ်ချယ်နေသလဲ

– ဂျေရုစလင်ကုန်းမြင့်များ၏ အရှေ့တောင်ဘက် ဆူရ် ဘာဟာရ် ဆင်ခြေဖုံးရပ်ကွက်တွင် ချိုင့်ခွက်များပြည့်နေသော လမ်းအဆုံး တောင်ကုန်းလေးပေါ်၌ ဆာရာ အလ် ဒွါယတ်၏ နေအိမ်က တိတ်ဆိတ်ကာ ထီးထီးကြီး ရှိနေလေသည်။

အိမ်ရှေ့အ၀င်အ၀တွင်တော့ အစ္စရေးက မကြာသေးမီကာလအတွင်း ဖမ်ထားသည့် ထိုဒေသတစ်ဝိုက်မှ ဆယ်ကျော်သက်လူငယ် ၅ ဦး၏ ဓာတ်ပုံများပါဝင်သော စာတမ်းတစ်ခုကို ချိတ်ဆွဲထားသည်။ ၎င်းတို့အထဲမှ တစ်ဦးမှာ ဒွါယတ်၏ သားဖြစ်သူ အသက် ၁၉ နှစ်အရွယ် အေဘဒ်ဖြစ်သည်။

၎င်းတို့ ၅ ဦးမှာ ပြီးခဲ့သည့်စက်တင်ဘာက ဂျူးနှစ်သစ်ကူးအကြိုနေ့တွင် ရဲတပ်ဖွဲ့နှင့် ပါလက်စတိုင်းလူငယ်များအကြား ရုန်းရင်းဆန်ခတ်မှု ဖြစ်ပွားပြီးနောက် အဝေးပြေးလမ်းမတွင် အစ္စရေးမှ ကားများကို ကျောက်ခဲဖြင့်ပစ်ပေါက်သည်ဟု စွပ်စွဲခံထားရပြီး ထိုလုပ်ရပ်ကြောင့် ကားသမားတစ်ဦး သေဆုံးခဲ့သည်ဟု ဆိုသည်။

ကြားနားမှုများတွင် မပြီးပြတ်သေးသော်လည်း ၎င်းတို့၏ မိသားစုများကိုတော့ အစ္စရေးအာဏာပိုင်များက နေအိမ်များမှ မောင်းထုတ်ခဲ့ကြသည်။ ထိုလုပ်ရပ်မှာ ပါလက်စတိုင်းတို့၏ လွတ်မြောက်ရေးကြိုးပမ်းမှုကို ဟန့်တားရန် ရည်ရွယ်သည့် အစ္စရေး၏ ဖိနှိပ်မှုပုံစံ အသစ်ဖြစ်သည်။

“အိမ်တွေသိမ်းမယ်ဆိုတဲ့ နို့တစ်စာရောက်လာတဲ့အခါ ကျွန်မတို့ဟာ ပရိဘောဂပစ္စည်းအားလုံးကို အပြင်ထုတ်ထားခဲ့ပါတယ်။ အခုအချိန်မှာတော့ အဲဒီပစ္စည်းတွေဟာ ပတ်ဝန်းကျင်ကလူတွေဆီမှာ ပြန့်နှံ့နေပါတယ်” ဟု သူမ၏အိမ်ကို ပြတင်းပေါက်မှ သံပြားဟ၍ ကြည့်ရှုပြီးနောက် ဆာရာက ပြောကြားခဲ့သည်။

သူမ၏ အိမ်သော့များကို အစ္စရေးအာဏာပိုင်များက ဖျက်ဆီးခဲ့ပြီး အ၀င်တံခါးမကို ၀ရိန်ဖြင့် အသေပိတ်ခဲ့သည်။ လွန်ခဲ့သည့် ၁၅ နှစ်ကတည်း မုဆိုးမတစ်ယောက်အဖြစ် ရပ်တည်ခဲ့ရသည့် ဆာရာနှင့် သူမ၏ အသက် ၂၄ နှစ်အရွယ် သမီးဖြစ်သူတို့မှာ ထိုဒေသရှိ တိုက်ခန်းကျဉ်းလေးသို့ ပြောင်းရွှေ့နေထိုင်နေရသည်။ အဆိုပါတိုက်ခန်းလေးကို အိမ်နီးချင်းတစ်ဦးမှ ၎င်းတို့အား ဂရုဏာသက်သောကြောင့် နေထိုင်ရန် ပေးထားခြင်းဖြစ်သည်။

မကြာမီပင် ထိုတိုက်ခန်းအတွက် အိမ်ငှားခကို ပေးရတော့မည်ဖြစ်သည်။ အိမ်ယာဈေးနှုန်းများ ခေါင်ခိုက်နေသည့် ဂျေရုစလင်တွင် အိမ်ငှားခအတွက် ရေရှည်တတ်နိုင်မည်မဟုတ်ဟု ဆာရာက ၀န်ခံခဲ့သည်။

အစ္စရေးအာဏာပိုင်များ၏ နေအိမ်သိမ်းမှုကို ခံလိုက်ရသော ဆာရာ အလ် ဒွါယတ်

“အိမ်ပြင်တာကို ကျွန်မတို့ စလုပ်နေပါတယ်။ အေဘဒ်က အလုပ်ရပြီး အိမ်ကို ထောက်ပံ့နိုင်ရုံ ရှိပါသေးတယ်။ ကျွန်မတို့ အကြွေးတွေ ဆပ်နေရတုန်းပါပဲ။ (ပြီးခဲ့တဲ့လ) အိမ်ကို သူတို့လာပိတ်တုန်းက ဒါဟာ တိုက်ခိုက်မှုတွေ ဆက်မလုပ်ဖို့ တခြားသူတွေကို အသိပေးတာဖြစ်တယ်လို့ ပြောခဲ့ပါတယ်” ဟု အသက် ၅၉ နှစ်အရွယ် ဆာရာက ပြောကြားခဲ့သည်။

ပြီးခဲ့သည့်နှစ် အောက်တိုဘာလကတည်းက အစ္စရေး၊ ဂျေရုစလင်အပါအ၀င် အစ္စရေးက ကျူးကျော်ပိတ်ဆို့ထားသော ပါလက်စတိုင်းပိုင် အနောက်ဖက်ကမ်းနှင့် ဂါဇာကမ်းမြှောင်ရှိ နယ်မြေများတွင် ဖြစ်ပွားသော တင်းမာမှုများက တိုက်ခိုက်မှုများအဖြစ် ပြောင်းလဲသွားသည်။

ုထိုကာလအတွင်း အစ္စရေးစစ်တပ်က ဆန္ဒပြသူများ၊ ဘေးတွင်ရပ်ကြည့်သူများ၊ တိုက်ခိုက်သည်ဟု စွပ်စွဲခံရသူများအပါအ၀င် ပါလက်စတိုင်းပြည်သူ ၂၀၆ ဦးကို သတ်ဖြတ်ခဲ့ပြီး ဓားထိုးမှု၊ သေနတ်ဖြင့်ပစ်မှုတို့ကြောင့် အစ္စရေး ၃၃ ဦး သေဆုံးခဲ့သည်။

အစ္စရေးဝန်ကြီးချုပ် ဘင်ဂျမင် နေတန်ယာဟုက တိုက်ခိုက်သည်ဟု စွပ်စွဲခံရသည့် ပါလက်စတိုင်းများနှင့် ၎င်းတို့၏ မိသားစုများကို တိုက်ရိုက်ပစ်မှတ်ထားသည့် အရေးယူမှု အမြောက်အများပြုလုပ်ရန် ကြေငြာခဲ့သည်။ ထိုအထဲတွင် တိုက်ခိုက်သည်ဟု စွပ်စွဲခံရသူများ၏ နေအိမ်များကို ဖြိုချခြင်း၊ ချိတ်ပိတ်ခြင်း၊ အစ္စရေးက ကျူးကျော်သိမ်းပိုက်ထားသည့် အရှေ့ဂျေရုစလင်တွင် ပါလက်စတိုင်းပြည်သူများ၏ နေထိုင်ခွင့်အား ရုပ်သိမ်းခြင်းတို့ ပါဝင်သည်။

လူ့အခွင့်အရေးရှေ့နေတစ်ဦးဖြစ်ပြီး အလ်-ကွဒ်စ် တက္ကသုိုလ်၏ Community Action စင်တာမှ ဒါရိုက်တာဖြစ်သူ မူနီရ် နူဆိုက်ဘာဟ်က ဆာရာ၏ သားဖြစ်သူနှင့် ၎င်းနှင့်အတူ စွပ်စွဲခံရသည့် အသက် ၁၇ နှစ်အရွယ် အဘူကက်ဖ်၊ အသက် ၁၈ နှစ်အရွယ် မွတ်စ်တာဖာ အတ်ထရက်ရ်ှတို့မှာ အစ္စရေး၏ ထိုဖိနှိပ်မှုအသစ်များအတွက် နမူနာစမ်းသပ်မှုဖြစ်သည်ဟု ပြောကြားခဲ့သည်။ ၎င်းတို့ ၃ ဦး၏ နေထိုင်ခွင့်ကို အစ္စရေးပြည်ထဲရေးဝန်ကြီးက ဇန်န၀ါရီလတွင် ရုပ်သိမ်းခဲ့ပြီး ထိုကိစ္စအား လက်ရှိအချိန်တွင် တရားရုံး၌ အယူခံဝင်ထားလေသည်။

“သူတို့ဟာ ကျောက်ခဲနဲ့ ပစ်ပေါက်မှုအတွက် ပထမဆုံး နေထိုင်ခွင့်ရုပ်သိမ်းခံရမယ့်အန္တရာယ်နဲ့ ရင်ဆိုင်နေရပါတယ်။ ပြီးတော့ သူတို့ရဲ့ မိသားစုဟာလည်း ကျောက်ခဲနဲ့ပေါက်မှုအတွက် အိုးအိမ်စွန့်ခွာရတဲ့ ပထမဆုံး မိသားစုတွေပါပဲ” ဟု နူဆိုက်ဘာဟ်က ပြောကြားခဲ့သည်။

အေဘဒ်၏ ရှေ့နေထံသို့ အစ္စရေး ပြည်ထဲရေးဝန်ကြီးဌာနကမှ ပေးပို့သော စာတွင် “အစ္စရေး၌ အမြဲတမ်းနေထိုင်ခွင့်မှာ နေထိုင်သူနှင့် နိုင်ငံအကြား ဆက်သွယ်မှုပေါ်တွင် အခြေခံသည်” ဟု ဖော်ပြထားသည်။

၁၉၆၇ ခုနှစ် အရှေ့ဂျေရုစလင်အား အစ္စရေးက ကျူးကျော်သိမ်းပိုက်ပြီးနောက်ပိုင်း ထိုဒေသတွင်ရှိသည့် ပါလက်စတိုင်းပြည်သူများအား နိုင်ငံသားထက် အမြဲတမ်းနေထိုင်ခွင့်ရသူများအဖြစ်သာ သတ်မှတ်ခဲ့ကာ ထိုသို့သတ်မှတ်မှုမှာ နိုင်ငံခြားတိုင်းပြည်တစ်ခုသို့ ပြောင်းရွှေ့အခြေချသူများအဆင့်ဖြစ်သည်။ ထိုအချိန်မှစ၍ ပါလက်စတိုင်းပြည်သူ ၁၄၀၀၀ ကျော်မှာ နေထိုင်ခွင့်ကို ရုပ်သိမ်းခံခဲ့ရသည်။

ထိုနှစ်များအတွင်း အမြဲတမ်းနေထိုင်ခွင့်အား ရုပ်သိမ်းမှု အကြောင်းအရင်းများမှာ များပြားသည်။ လွန်ခဲ့သည့် နှစ် ၂၀ အရင်က အစ္စရေးပြည်ထဲရေးဝန်ကြီးဌာနမှာ နိုင်ငံရပ်ခြားတွင် ၇ နှစ်၊ သို့မဟုတ် ထိုထက်ပို၍ နေထိုင်သူများ၊ အခြားနိုင်ငံသားအဖြစ် ရသူ ပါလက်စတိုင်းများ၏ နေထိုင်ခွင့်ကို ရုပ်သိမ်းခဲ့သည်။

သို့သော်လည်း အော်စလိုသဘောတူညီချက်ပြီးနောက် ပေါ်လစီအသစ်တစ်ခုကို အစ္စရေးက ဖန်တီးခဲ့ပြီး ထိုပေါ်လစီအရ အစ္စရေးအပြင်ဘက် ဥပမာအားဖြင့် အနောက်ဖက်ကမ်းနှင့် ဂါဇာတို့တွင် အသက်မွေးဝမ်းကြောင်းပြုသူများအား အမြဲတမ်းနေထိုင်ခွင့်ကို ရုပ်သိမ်းခဲ့သည်။ အမြဲတမ်းနေထိုင်ခွင့် ရုပ်သိမ်းခံရသူ ၁၄၀၀၀ တွင် ၁၁၀၀၀ မှာ ထိုပေါ်လစီကြောင့်ဖြစ်သည်။

၂၀၀၆ ခုနှစ်တွင် ပါလက်စတိုင်း ဥပဒေပြုကောင်စီ၌ ရွေးချယ်ခံရသူ ၃ ဦးမှာ ဂျေရုစလင်တွင် နေထိုင်ခွင့် ရုပ်သိမ်းခံခဲ့ရပြီး “နိုင်ငံတော်ကို သစ္စာဖောက်ဖျက်ခြင်းကြောင့်” ဟု ခေါင်းစဉ်တပ်ခဲ့သည်။ ၎င်းတို့ကိစ္စကို တရားရုံးချုပ်တွင် ဆိုင်းငံ့ထားသည်။

“ဒီအမတ်တွေက အစ္စရေးရဲ့ လုံခြုံရေးအတွက် ခြိမ်းခြောက်မှုတစ်ခုဖြစ်တယ်လို့ ဘယ်သူမှ မယူဆကြပါဘူး။ ဒါပေမယ့် သူတို့ရဲ့ နိုင်ငံရေးပတ်သက်မှုအတွက် ဂျေရုစလင်မှာ နေထိုင်ခွင့်ကို ရုပ်သိမ်းခံခဲ့ရတာပါ” ဟု နူဆိုက်ဘာဟ်က ဆိုပြီး ထိုသတ်မှတ်ချက်ဖြင့် နေထိုင်ခွင့် ရုပ်သိမ်းခံရသည့် ကိစ္စမှာ ၁၃ ခုရှိသည်ဟု ထည့်သွင်းပြောကြားခဲ့သည်။

“၂၀၀၆ ကိစ္စမှာ နိုင်ငံတော်သစ္စဖောက်မှုဆိုတဲ့ စွဲချက်ကို အခြေခံပြီး တရားရုံးချုပ်က နေထိုင်ခွင့် ရုပ်သိမ်းမယ်ဆိုရင်တော့ လုံခြုံရေးကြောင့်မဟုတ်ဘဲ နိုင်ငံရေးအကြောင်းပြချက်ကြောင့် တရားရုံးချုပ်က ပထမဆုံး နေထိုင်ခွင့် ရုပ်သိမ်းတာမျိုးဖြစ်တာကြောင့် ဆက်လက်စောင့်ကြည့်ရမယ့် ကိစ္စပါပဲ။ ဂျေရုစလင်က ပါလက်စတိုင်းအားလုံးဟာ ဒီသတ်မှတ်ချက်အရ နေထိုင်ခွင့် ရုပ်သိမ်းခံရမယ့်အန္တရာယ် ရှိနေပါတယ်။ ဘာ့ကြောင့်လည်းဆိုတော့ အရှေ့ဂျေရုစလင်က ပါလက်စတိုင်း ပြည်သူတွေဟာ ကျူးကျော်သိမ်းပိုက်မှုက ယာယီသာဖြစ်ပြီး အစ္စရေးကို တိုင်းတစ်ပါး နယ်ချဲ့အဖြစ် သတ်မှတ်ထားလို့ပါ”

မွတ်စ်တာဖာ အတ်ထရက်ရှ်၏ ဖခင်ဖြစ်သူ အဘူ ၀ါလစ်ဒ်ကတော့ ထိုပေါ်လစီကို ခံပြင်းဒေါသထွက်နေသည်။

“သစ္စာစောင့်သိတာတာလား။ ဘာသစ္စာလဲ။ ကျွန်တော်တို့ အစ္စရေး မြူနီစီပယ်ကို အခွန်တွေပေးနေတယ်။ ဒါပေမယ့် ပြန်ရတာ ဘာမှမရှိပါဘူး။ အစ္စရေးဝန်ကြီးချုပ်ကို လုပ်ကြံခဲ့တဲ့ ယီဂဲလ် အေမီရ်က နိုင်ငံသားအဖြစ် ရုပ်သိမ်းခံခဲ့ရလား” ဟု ၁၉၉၅ ခုနှစ်က ၀န်ကြီးချုပ် ယစ်ဇ်ဟက် ရာဘင်အား လုပ်ကြံခဲ့သည့် အစ္စရေး အစွန်းရောက်တစ်ဦးအား ရည်ညွှန်း၍ အဘူ ၀ါလစ်ဒ်က ပြောကြားခဲ့သည်။

ဆူရ် ဘာဟာရ်ကိစ္စတွင် လိုက်ပါဆောင်ရွက်နေပြီး အစ္စရေးလူ့အခွင့်အရေးအဖွဲ့ဖြစ်သော Hamoed မှ ရှေ့နေတစ်ဦးဖြစ်သူ အဘီရ် ဂျူဘရန်-ဒက်ဝါရ်က “နိုင်ငံတော် သစ္စာဖောက်မှု” အပါအ၀င် နိုင်ငံသားအဖြစ်မှ ရုပ်သိမ်းသော သတ်မှတ်ချက်များစွာ ရှိသော်လည်း ထိုသတ်မှတ်ချက်များက အမြဲတမ်းနေထိုင်ခွင့်ရသူများအပေါ် သက်ရောက်မှုမရှိဟု ပြောကြားခဲ့သည်။

“နိုင်ငံသားအဖြစ် ရုပ်သိမ်းခံရသူက နိုင်ငံမဲ့ဖြစ်သွားပါတယ်။ ဒါပေမယ့် ပြည်ထဲရေးဝန်ကြီးက သူ့ကို အမြဲတမ်းနေထိုခွင့် ပေးရပါတယ်”

အစ္စရေးပြည်ထဲရေးဝန်ကြီးက ထိုကိစ္စနှင့်ပတ်သက်၍ အလ်-ဂျာဇီးရား၏ မေးမြန်းမှုကို ဖြေကြားခဲ့ခြင်းမရှိပေ။

ဧပြီလအဆုံးပိုင်း၌ အစ္စရေး ရှေ့နေချုပ်က ဆူရ် ဘာဟာရ်ကိစ္စတွင် အမြဲတမ်းနေထိုင်ခွင့်ရုပ်သိမ်းမှုကို ယာယီ ဆိုင်းငံ့ခဲ့ပြီး ၂၀၀၆ ခုနှစ်ကိစ္စကို တရားရုံးချုပ်က ဆုံးဖြတ်ချက်ချပြီးသည်အထိ စောင့်ဆိုင်းရန် သတ်မှတ်ခဲ့သည်။

B’Tselem အပါအ၀င် လူ့အခွင့်အရေးအဖွဲ့များက ပါလက်စတိုင်းတို့၏ နေအိမ်များ ဖြိုချမှု၊ အဆောက်အဦးဆောက်လုပ်ခွင့် မပေးမှု၊ မိသားစု ပြန်လည်ပေါင်းစည်းရေး ကန့်သတ်ထားမှုများနှင့် တံတိုင်းများကာရံထားမှု စသည်တို့မှာ ဂျေရုစလင်မှ ပါလက်စတိုင်းများ အိုးအိမ်စွန့်ခွာကာ ထွက်သွားစေရန်နှင့် ဂျူးအများစု တည်ရှိရေးအတွက် အစ္စရေးက ကျင့်သုံးနေသည့် များစွာသော နည်းလမ်းများတွင် ပါဝင်သည်ဟု ထောက်ပြခဲ့သည်။ ထိုလုပ်ရပ်များမှာ နိုင်ငံတကာ ဥပဒေကို ချိုးဖောက်ခြင်းလည်းဖြစ်သည်။

“ဒီပေါ်လစီအသစ်ဟာ အရှေ့ဂျေရုစလင်မှာ ပါလက်စတိုင်းပြည်သူတွေ နေအိမ်စွန့်ခွာစေဖို့၊ ထွက်သွားတဲ့အရေအတွက် ပိုများလာဖို့အတွက် ထပ်တိုးလိုက်တဲ့ နည်းလမ်းသစ်တစ်ခုပါပဲ။ ကျွန်တော်တို့ကတော့ စိုးရိမ်သောက ဖြစ်နေပါတယ်” ဟု နူဆိုက်ဘာဟ်က ထည့်သွင်းပြောကြားခဲ့သည်။

Ref: Aljazeera

(Al-Jazeera တွင် ဖော်ပြသည့် How Israel forces more Palestinians out of Jerusalem ဆောင်းပါးကို လေးမောင်က ဆီလျော်အောင် ဘာသာပြန်ဆိုသည်။)