စပိန်ဂိုးမြူးမှုအတွက် နည်းပြ ကျေနပ်နေ

ဇွန် ၁၈၊ ၂၀၁၆
M-Media

– တူရကီအသင်းနှင့် ကစားခဲ့သည့် ယူရို ၂၀၁၆ အုပ်စုဒုတိယပွဲစဉ်တွင် ၃ ဂိုး သွင်းယူနိုင်ခဲ့မှုအတွက် ကျေနပ် ပျော်ရွှင်မိသည်ဟု စပိန်နည်းပြ ဒဲလ်ဘော့စကေးက ပြောကြားလိုက်သည်။

ယနေ့မနက်က ကစားခဲ့သည့် အဆိုပါပွဲတွင် လက်ရှိချိန်ပီယံ စပိန်အသင်းမှာ မိုရာတာ၏ သွင်းဂိုး ၂ ဂိုး၊ နိုလီတို၏ သွင်းဂိုး ၁ ဂိုးတို့ဖြင့် ၃ ဂိုပြတ်အနိုင်ရရှိခဲ့ပြီး ၂ ပွဲနိုင် ၆ မှတ်ဖြင့် ၁၆ သင်းအဆင့်သို့ တက်ရောက်သွားပြီဖြစ်သည်။

စပိန်မှာ ပြီးခဲ့သည့်လများအတွင်း ကစားခဲ့သည့်ပွဲများတွင် ဂိုးရရန် ရုန်းကန်ခဲ့ရပြီး အုပ်စုအဖွင့်ပွဲ ချက်အသင်းနှင့်ပွဲတွင်လည်း ပီကေး၏ ခေါင်းတိုက်ဂိုး ၁ ဂိုးတည်းဖြင့် အနိုင်ရရှိခဲ့သည်။ နည်းပြ ဒဲလ်ဘော့စကေးကမူ စပိန်းအသင်း ဂိုးပေါက်ပြန်ရှာတွေ့မှုအတွက် ၀မ်းမြောက်နေသည်။

“ကျွန်တော်တို့ရဲ့ ပထမရည်မှန်းချက်ဖြစ်တဲ့ နောက်တစ်ဆင့်တက်ရေးဟာ ပြီးမြောက်အောင်မြင်သွားခဲ့ပါပြီ။ ပြီးတော့ စွမ်းဆောင်ရည် ကောင်းမွန်အောင်လည်း ဆောင်ရွက်နိုင်ခဲ့ပါတယ်။ ကျွန်တော်တို့ဟာ တစ်ပွဲလုံးကို စိုးမိုးနိုင်ခဲ့ပြီး ရရှိဖို့ ရုန်းကန်ခဲ့ရတဲ့ ဂိုးတွေလည်း သွင်းယူနိုင်ခဲ့ပါတယ်။ အခုတော့ ခရိုအေးရှားနဲ့ပွဲကို အာရုံစိုက်ရမှာဖြစ်ပြီး နောက်ဆုံးဗိုလ်လုပွဲရောက်အောင် လုပ်နိုင်မလားဆိုတာကို ကြည့်ရမှာပါ” ဟု ဒဲလ်ဘော့စကေးက ပြောကြားခဲ့သည်။

Ref: Goal