အင်ဒိုနီးရှားတွင် ဟာလာလ်စီးပွားရေးဇုန်တစ်ခု တည်ဆောက်မည်

သြဂုတ် ၆၊ ၂၀၁၆
M-Media

– အင်ဒိုနီးရှားနိုင်ငံမှာ ပင်လယ်ဆိပ်ကမ်းတစ်ခုနဲ့ စက်မှုဇုန်တစ်ခုပါဝင်တဲ့ ဟလာလ်စီးပွားရေးဇုန်ကို မကြာခင် တည်ဆောက်သွားတော့မှာဖြစ်တယ်လို့ နိုင်ငံအတွင်းက ထိပ်တန်း စီးပွားရေးလုပ်ငန်းရဲ့ တာဝန်ရှိသူတစ်ဦးက ပြောကြားလိုက်ပါတယ်။

“အင်ဒိုနီးရှားမှာ ဟာလာလ်ထုတ်ကုန်ဈေးကွက်ဟာ အင်မတန်ကြီးမားပါတယ်၊ အင်ဒိုနီးရှားနဲ့ ကမ္ဘာပေါ်ရှိ လူ့အဖွဲ့အစည်း အလွှာတိုင်းဟာ ဟာလာလ်နည်းကျ စားသောက်နေထိုင်မှုပုံစံကို သွားနေတာကြောင့် ဈေးကွက်တောင်းဆိုမှုကလည်း မြင့်မားနေပါတယ်” လို့ PT Jakarta Industrial Estate စက်မှုလုပ်ငန်းရဲ့ ဒါရိုက်တာတစ်ဦးဖြစ်သူ ပူလိုဂါဒေါင် ဆစ်သာက ဂျကာတာမြို့မှာ သြဂုတ်လ ၂ ရက်ကနေ ၄ ရက်နေ့အထိ ကျင်းပခဲ့တဲ့ ၁၂ ကြိမ်မြောက် ကမ္ဘာ့အစ္စလာမ့် စီးပွားရေးဖိုရမ်မှာ ပြောကြားခဲ့တာပါ။

နောက်ပြီးတော့ အခုဆောက်လုပ်မယ့် ဟလာလ်စီးပွားရေးဇုန်မှာ နိုင်ငံအတွင်းက ပို့ကုန်ပဲဖြစ်ဖြစ်၊ သွင်းကုန်ပဲဖြစ်ဖြစ် အစားအစာ၊ အ၀တ်အထည်၊ အလှကုန်နဲ့ ဆေးဘက်ဆိုင်ရာထုတ်ကုန်တွေ အပါအ၀င် နေ့စဉ်လူနေမှုဘ၀ဆိုင်ရာ ထုတ်ကုန်များကို ဟာလာလ်သတ်မှတ်ချက်စံနှုန်းနဲ့ ကိုက်ညီအောင် ဆောင်ရွက်သွားမယ်လို့လည်း သူက ထပ်လောင်း ပြောကြားခဲ့ပါတယ်။

အဲဒီ ဟလာလ်စီးပွားရေးဇုန်ကို ဂျာကာတာမြို့ Tanjung Priok ပင်လယ်ဆိပ်ကမ်းမြို့လေးမှာ ဖန်တီးသွားမှာဖြစ်ပြီး ကုန်ပစ္စည်းတွေကို စစ်ဆေးဆောင်ရွက်မယ့် ဟလာလ်ဇုန်ကိုတော့ Rawamangun မှာ ထားရှိမှာ ဖြစ်တယ်လို့ ဆိုပါတယ်။

“ဒါ့ကြောင့် အသားလို အထူးကိုင်တွယ်ရမယ့် ကုန်ပစ္စည်းတွေ ဆိပ်ကမ်းကို ဆိုက်ရောက်လာတာနဲ့ အခြားကုန်ပစ္စည်းတွေကနေ အဲဒါတွေကို ခွဲထားမှာဖြစ်ပြီး ထပ်မံစစ်ဆေးဖို့အတွက် ဟာလာလ်ဇုန်ကို ပို့ဆောင်သွားမှာဖြစ်ပါတယ်။ ပြီးတော့ ထုတ်ကုန်တစ်ခုချင်းစီကို ဟာလာလ်စံနှုန်းနဲ့ညီအောင် စစ်ဆေးဖို့အတွက် ဟာလာလ်ဇုန်မှာ အလုပ်လုပ်မယ့် ၀န်ထမ်းတွေကို လေ့ကျင့်ပေးတာမျိုးတွေကိုလည်း ကျွန်တော်တို့ လုပ်ဆောင်သွားမှာပါ” လို့ ဆစ်သာ က ဆိုပါတယ်။

ဒီဟာလာလ်ဇုန်တစ်ခုလုံးမှာ အသုံးပြုမယ့် စနစ်တွေဟာ ဒစ်ဂျစ်တယ်စနစ်တွေဖြစ်မယ်လို့လည်း သိရပါတယ်။

Ref : IINA