ကနေဒါရှိ အစ္စလာမ့်အသိပညာပေး ရွေ့လျားအဖွဲ့ အောင်မြင်

သြဂုတ် ၁၀၊ ၂၀၁၆
M-Media

– ကနေဒါနိုင်ငံအတွင်း အစ္စလာမ်ကြောက်ရောဂါကို အဆုံးသတ်စေရန် ရည်ရွယ်ကာ အစ္စလာမ်နှင့်ပတ်သက်၍ အသိပညာပေးမှုများ ပြုလုပ်နေ ရွေ့လျားမွတ်စလင်လူငယ်အဖွဲ့ Mobile Muslim Exhibition မှာ အောင်မြင်မှုများ ရရှိနေပြီး လက်ရှိ နိုင်ငံအလယ်ပိုင်း ရက်ဂျီနာမြို့သို့ ရောက်ရှိနေသည်ဟု သိရသည်။

စေတနာ့ဝန်ထမ်း ဒါဇင်နှင့်ချီပါဝင်သည့် အဆိုပါအဖွဲ့မှာ ကနေဒါနိုင်ငံတစ်ဝှမ်းရှိ လူ့အဖွဲ့အစည်းများတွင်း အစ္စလာမ်နှင့် ပတ်သက်သည့် အပြုသဘောဆောင်သော သတင်းစကားများ ရရှိနိုင်ရန်နှင့် ထင်မြင်ယူဆချက်အမှားများ ပပျောက်စေရန် ဆောင်ရွက်နေခြင်းဖြစ်သည်။

အဆိုပါအဖွဲ့၏ လှုပ်ရှားမှာ နိုင်ငံအရှေ့ပိုင်း နယူးဘရွန်စ်ဝစ်ပြည်နယ် စိန့်ဂျွန်မြို့မှ စတင်ခဲ့ခြင်းဖြစ်ပြီး ရက်ပေါင်း ၄၀ ကြာမြင်ခဲ့ပြီဖြစ်ပြီး နိုင်ငံ၏ နိုင်ငံအနောက်အစွန်းရှိ ဘရစ်တစ်ရှ် ကိုလံဘီယာပြည်နယ် ဗစ်တိုးရီးယားမြို့တွင် အဆုံးသတ်မည်ဖြစ်သည်။

Mobile Muslim Exhibition အဖွဲ့မှ ရက်ဂျီနာဆိုင်ရာအဖွဲ့မှ ရှေ့ဆောင်အီမာမ်ဖြစ်သူ ဇီရှန် အဟ်မဒ်က မိမိတို့အဖွဲ့မှာ မည်သူ့ကိုမဆို ကြိုဆိုသည်ဟု ပြောကြားခဲ့သည်။

“အစွန်းရောက်တွေက အစ္စလာမ်ကို အချိန်ကြာကြာ ပြန်ပေးဆွဲထားနိုင်မှာ မဟုတ်ဘူးလုိ့ ကျွန်တော် ပြောချင်ပါတယ်။ စစ်မှန်တဲ့မွတ်စလင်တွေဟာ စိတ်နှလုံးမှာ အေးချမ်းနေပြီး အဲဒီငြိမ်းချမ်းမှုကို ကျွန်တော်တို့ရဲ့ ကနေဒါပြည်သူတွေ၊ ပတ်ဝန်းကျင်ကသူတွေကို ဖြန့်ဝေပေးပါလိမ့်မယ်။ အားနာစရာမလိုဘဲ ကျွန်တော်တို့ကို အစ္စလာမ်နဲ့ပတ်သက်တဲ့ မေးခွန်းတွေ၊ အစ္စလာမ်သာသနာနဲ့ အမျိုးသမီးကဏ္ဍ၊ ဂျီဟတ်အကြောင်း စတာတွေ မေးနိုင်ပါတယ်”

ထို့ပြင် မိမိတို့အဖွဲ့မှာ မြို့ခံများ၏ နွေးထွေးစွာ ကြိုဆိုမှုကို ရရှိခဲ့သည့်အတွက် ကျေနပ်မိကြောင်း၊ မိမိနေထိုင်ရာဒေသကို ချစ်မြတ်နိုးခြင်းမှာ ဘာသာတရားတိုင်က သွန်သင်ထားသည့်ကိစ္စဖြစ်ကြောင်း ၎င်းက ထပ်လောင်းပြောကြားခဲ့သည်။

Ref; IINA