တူရကီရှိ ရဲစခန်းများတွင် ကားဗုံးကွဲမှု ဖြစ်ပွား

သြဂုတ် ၁၈၊ ၂၀၁၆
M-Media

– တူရကီနိုင်ငံအရှေ့ပိုင်းရှိ ရဲစခန်းများတွင် ယနေ့မနက်ပိုင်းက ကားဗုံးပေါက်မှုများ ဖြစ်ပွားခဲ့သောကြောင့် အနည်းဆုံး လူ ၆ ဦး သေဆုံးခဲ့ပြီး လူပေါင်း ၁၆၀ ခန့် ဒဏ်ရာရရှိခဲ့သည်ဟု သိရသည်။

အီလာဇစ်မြို့ရှိ ရဲစခန်းတစ်ခုတွင် ကားဗုံးကွဲမှုအတွင်း သေဆုံးသူ ၃ ဦး ရှိခဲ့ပြီး လူ ၁၂၀ ကျော် ဒဏ်ရာရရှိခဲ့ကာ ဗန်ပြည်နယ်ရှိ ရဲစခန်းတွင် ကားဗုံးပေါက်ကွဲမှုတွင်လည်း လူ ၃ ဦး ထပ်မံသေဆုံးခဲ့ကာ လူ ၄၀ ဒဏ်ရာရရှိခဲ့သည်။

တူရကီသတင်းအေဂျင်စီတစ်ခုဖြစ်သော Dogan ကမူ အီလာဇစ်မြို့ရှိ တိုက်ခိုက်မှုကိုမူ ပိတ်ပင်ခံထားရသည့် ကာ့ဒ်အလုပ်သမားများပါတီ PKK က ဆောင်ရွက်ခြင်းဖြစ်သည်ဟု ဖော်ပြခဲ့သည်။ ဗန်ပြည်နယ်ရှိ တိုက်ခိုက်မှုအတွက် မည်သည့်အဖွဲ့ကမှ တာဝန်ယူခြင်း မရှိသေးပေ။

PKK အဖွဲ့မှာ ကာ့ဒ်လူမျိုး အများစုရှိရာ နိုင်ငံအရှေ့တောင်ပိုင်းရှိ ရဲစခန်းများကို မကြာမကြာ တိုက်ခိုက်လေ့ရှိသည်။ တူရကီစစ်တပ်ကလည်း ထိုအဖွဲ့၏ ခြေကုပ်နေရာများအား လေကြောင်းမှ တိုက်ခိုက်မှုများ ပြုလုပ်ခဲ့သည်။

Ref: Press TV