ဗလီဝန်းရှေ့ ဆိုင်ခန်းငှားခ ၂၅၀၀ ကျပ်မှ သုံးသောင်း သို့ တိုးတောင်းလို့ ဂေါပကကို မြင်းခြံမှာဆန္ဒပြ

စက်တင်ဘာ ၂၁ ၊ ၂၀၁၆
M-Media
သတင်း- သီဟ

မန္တလေးတိုင်းဒေသကြီး မြင်းခြံမြို့တွင် မြင်းခြံဗလီဝန်းရှေ့ဆိုင်ခန်းများ ဈေးနှုန်းတိုးမြှင့် ကောက်ခံမှုကို မကျေနပ်သည့် အပေါ် ခွင့်ပြုမိန့်တောင်းကာ ဆန္ဒထုတ်ဖော်မှု တရပ် ယနေ့ စက်တင်ဘာ ၂၁ ရက်နေ့ တွင် ဖြစ်ခဲ့ပါတယ်။

ဆိုင်ခန်းခ တစ်ခန်းကို တစ်လလျှင် ၂၅၀၀ ကျပ်မှ ၃၀၀၀၀ (သုံးသောင်း) ကျပ်တိုးမြှင့်မှုအပေါ် မကျေနပ်သည့် အတွက် ဈေးနှုန်းလျှော့ပေးရန်နှင့် လက်ရှိ ဝတ်ကျောင်းတော် ဂေါပကအဖွဲ့ နှုတ်ထွက်ပေးရန် ဆန္ဒပြခဲ့ခြင်းဖြစ်ပါတယ်။

ဖြစ်စဉ်မှာ ၁၉၉၅မှာ ဗလီဝန်းရှေ့ဆိုင်ခန်းတွေ ဆောက်တော့ ဗလီဂေါပကအဖွဲ့မှာ ရံပုံငွေ ချို့တဲ့တာကြောင့် ဆိုင်ခန်းငှားလိုသူများထံမှ စပေါ်ငွေ ၁၁၅၀၀၀ ကျပ် လက်ခံကာ ဆိုင်များကို ဆောက်လုပ်ခဲ့ကြောင်း သိရပါတယ်။

ထိုဆိုင်ခန်းများကို ငှားရမ်းထားသူများကို တစ်လလျှင် ငွေကျပ် ၂၀၀၀-၂၅၀၀ နှုန်းထားဖြင့် နှစ်ပေါင်း (၂၀) ခန့်ငှားထားပေး ခဲ့ပြီး ဖြစ်ကြောင်း၊ ဂေါပကမှ လွန်ခဲ့သော နှစ်လခန့်မှစတင်ပြီး လက်ရှိခေတ်ကာလ အနေအထားအရ ဆိုင်ခန်းတစ်ခန်းကို တစ်လလျှင်  ၃၀၀၀၀ ကျပ် တိုးမြှင့်ကောက်ခံခဲ့ကြောင်းသိရသည်။

ဆိုင်ခန်း ၃၉ ခန်းအနက် အခန်း ၂၀မှာ ဈေးနှုန်းသစ်ကို သဘောတူလက်ခံခဲ့ပြီး ဂေါပကအဖွဲ့နှင့် စာချုပ်ချုပ်ဆိုပြီး ပါပြီ ၁၉ ခန်းမှာမူ နှုန်းထားသစ်ကို လက်မခံလို့  ညှိနှိုင်းနေရဆဲပါ။ တစ်လ ၂၅၀၀ ကျပ်ဖြင့် ငှားထားသော အခန်းများထဲမှာ အချို့ဆိုင်ငှားတွေက တစ်ဆင့်ပြန်ငှားထားတာမျိုးတွေ ရှိပါတယ်။  အချို့ဆို တစ်လကို ကျပ်ငါးသောင်း ခြောက်သောင်းနဲ့ တစ်ဆင့်ပြန်ငှားထားပါတယ်။ တစ်ဆင့်ပြန်ငှားသည့် သူများတွင် ဆန္ဒထုတ်ဖော်မှုကို ဦးဆောင်သူပိုင်းမှလည်း ပါတယ်။ စပေါ်ပေးခဲ့သူများထဲတွင် ယခုအခါ ဆိုင်ခန်းခြောက်ခန်းပဲ ကျန်တော့တယ်။ အဲဒီ ၆ ခန်းမှာ ၃ ခန်းက ဈေးနှုန်းသစ်ကို သဘောတူ စာချုပ်ပြီးပါပြီ။ ကျန် (၃) ခန်းက လက်မခံသည့် ၁၉ ခန်းထဲမှာ ပါ ပါတယ်။ လို့ တာဝန်ရှိသူတဦးက ဖြစ်စဉ်ကို ရှင်းပြပါတယ်။

ဂေါပကနှင့် ဆိုင် ၁၉ ခန်းအကြား အထွေထွေအုပ်ချုပ်ရေးပိုင်းမှ ညှိနှိုင်းပေးရာ တစ်လ ၅၀၀၀ ကျပ်သာပေးနိုင်မည်ဟုသာ အကြောင်းပြန်ခဲ့ပြီး ဈေးရောင်းဈေးဝယ်ရှိရာ နေရာကောင်းဖြစ်သဖြင့် တိုးပေးရန် ထပ်မံညှိနှိုင်းရာ မတိုးပေးနိုင်ကြောင်းဖြစ်ခဲ့သဖြင့် ညှိနှိုင်းမှု မပြီးမြောက်ခဲ့ပါ။

လိပ်ခဲတည်းလည်းဖြစ်နေ၍ ဂေါပကအဖွဲ့မှ စပေါ်ငွေ ပြန်အမ်းပေးမည်ဆိုရာ စပေါ်တင်ခဲ့တဲငွေက ၁၉၉၅ က ရွှေ ငါးကျပ်သားနှုန်းဖြစ်ခဲ့၍ ယနေ့ရွှေဈေးနှင့် အညီလိုချင်သည်ဟု အရေးဆိုနေတယ်လို့ ပြောပါတယ်။

ရွှေပေါက်ဈေးနဲ့အညီဆိုသည့် ကိစ္စမှာလည်း ထွေအုပ်တာဝန်ရှိသူများက ထိုစဉ်က စပေါ်ငွေကို ဂေါပကအဖွဲ့မှာ အဓမ္မတောင်းဆိုခဲ့ခြင်းမျိုး ရှိခဲ့လား စုံစမ်းမေးမြန်းရာ မိမိတို့ စိတ်ဆန္ဒနဲ့ အညီသာ ပေးခဲ့ကြောင်း ထိုဆိုင်များမှ ဝန်ခံခဲ့ပါတယ်။
ညှိနှိုင်းမှုဖြင့်မအောင်မြင်ခဲ့သဖြင့် ဥပဒေအတိုင်းသာ ရှေ့ဆက်ဆောင်ရွက်ရန် အုပ်ချုပ်ရေးပိုင်းမှ အကြံပြုခဲ့တယ်လို့ သိရပါတယ်။

ဈေးနှုန်းဟောင်းမှာ ယခုပေါက်ဈေး ဆိုင်ခန်းတည်နေရာ အနေအထား ဈေးကွက်တို့နှင့် ယှဉ်လျှင် နည်းလွန်းနေပြီး အဆိုပြု ဈေးနှုန်းသစ်မှာ သင့်တော်သော်လည်း ၃၉ဆိုင်အနက် ဈေးကွက်အားနည်းတဲ့ ဆိုင်နှစ်ဆိုင် သုံးဆိုင် အတွက်မှု အခက်အခဲ ဖြစ်နိုင်ကြောင်း သိရှိရပါတယ်။

ယနေ့  ဆန္ဒဖော်ထုတ်သူ ဆိုင်ခန်းဌားရမ်းသူများတွင်  အစ္စလာမ်ဘာသာဝင်တွေသာမက အခြားဘာသာဝင်များလည်း ပါဝင်ကြောင်း သိရှိရတယ်။

“အများနဲ့ အဖွဲ့နဲ့ လုပ်ရတာမျိုးဆိုတော့ စံကွဲလို့ မရဘူးထင်တယ်။ အဲ့ဒီဆိုင်တွေက ဈေးကွက်နှင့် ကိုက်ညီမှုရှိတဲ့ကုန်တင်ဖို့၊ အရောင်းအဝယ်ဖြစ်နိုင်တဲ့ ဆိုင်မျိုးပြောင်းဖို့၊ သို့မဟုတ် အခြားသူကို သင့်လျော်တဲ့ ဈေးနှုန်းတစ်ခုနဲ့ တစ်ဆင့်ပြန်ငှားတာမျိုး လုပ်ဖို့ အကြံပေးလိုပါတယ်။” ရပ်မိရပ်ဖတစ်ဦးက အကြံပေး မှတ်ချက်ပြုပါတယ်။

လက်ရှိ ဂေါပကအဖွဲ့မှာ တိုင်းအဆင့် ဘာသာရေးအဖွဲ့ကြီးများ၏ ကြီးကြပ်မှုဖြင့် အရွယ်ရောက် ဗလီဂျမအသ်ဝင် အစ္စလာမ်ဘာသာဝင်များမှ မဲစနစ်ဖြင့် ရွေးချယ်တင်မြောက်ထားသည့် အဖွဲ့ဖြစ်ကြောင်း သိရသည်။