ဇီကာနောက်ဆက်တွဲ ဦးခေါင်းသေးရောဂါကို ဗီယက်နမ်တွင် ပထမဆုံး တွေ့ရှိ

အောက်တိုဘာ ၃၁၊ ၂၀၁၆
M-Media

– ခြင်မှကူးဆက်သော ဇီကာရောဂါနှင့် ဆက်စပ်နေသည့် ဦးခေါင်းသေးရောဂါကို တွေ့ရှိခဲ့ရသည်ဟု ဗီယက်နမ် ကျန်းမာရေးဝန်ကြီးဌာနက ယမန်နေ့တွင် ပြောကြားလိုက်ပြီး နိုင်ငံအတွင်း ပထဆုံး ဖြစ်ပွားမှုလည်း ဖြစ်သည်။

နိုင်ငံ အလယ်ပိုင်း ဒက်လက်မြို့၌ ကိုယ်ဝန်ဆောင်စဉ် ဇီကာပိုးတွေ့ရှိခဲ့သည့် မိခင်တစ်ဦး၏ လေးလသားကလေးငယ်တွင် အဆိုပါရောဂါ ဖြစ်ပွားခြင်းဖြစ်သည်။

“ဇီကာဗိုင်းရပ်စ်ကြောင့်ဖြစ်နိုင်တဲ့ ဦးခေါင်းသေးရောဂါဖြစ်ပြီး၊ ဒီလိုဖြစ်ရပ်မျိုး ဗီယက်နမ်မှာ ပထမဆုံးအကြိမ် ပေါ်ပေါက်ခဲ့တာပါ” ဟု ဆေးဘက်ဆိုင်ရာ အထွေထွေဦးစီးဌာနက ၎င်းတို့၏ တရားဝင်ဝဘ်ဆိုက်တွင် ကြေငြာခဲ့သည်။

ဗီယက်နမ်တွင် ယခုအချိန်ထိ ဇီကာဗိုင်းရပ်စ်ကူးစက်မှု စုစုပေါင်း ၉ ခု တွေ့ရှိခဲ့ပြီးဖြစ်ကြောင်း၊ နောက်ထပ်တွေ့ရှိမှုများကို လာမည့် ရက်အနည်းငယ်အတွင်း အတည်ပြုရန် မျှော်လင့်ထားကြောင်း ဦးစီးဌာန ညွှန်ကြားရေးမှူး ထရန်ဒက်ဖူးက ရိုက်တာသတင်းသို့ ယမန်နေ့တွင် ပြောကြားခဲ့သည်။

ဇီကာနှင့်ပတ်သက်၍ စိုးရိမ်ရမှုအဆင့်ကို ဗီယက်နိမ်နိုင်ငံက ယခုလအစောပိုင်းတွင် မြှင့်တင်ခဲ့ပြီး နိုင်ငံအတွင်းရှိ ကိုယ်ဝန်ဆောင်အမျိုးသမီးများအား စောင့်ကြည့်မှုကိုလည်း တိုးမြှင့်လုပ်ဆောင်ခဲ့သည်။

ယခုတွေ့ရှိရသည့် အဆိုပါဦးခေါင်းသေးရောဂါသည် ဇီကာနှင့်ဆက်နွယ်ကြောင်း အတည်ပြုနိုင်မည်ဆိုပါက ဗီယက်နမ်မှာ ထိုင်းနိုင်ငံအပြီး အရှေ့တောင်အာရှတွင် ၎င်းရောဂါတွေ့ရှိရသည့် ဒုတိယမြောက်နိုင်ငံ ဖြစ်လာမည်ဖြစ်သည်။

ဇီကာနှင့် ကလေးများ မွေးရာပါ ဦးနှောက်သေးရောဂါ ဆက်စပ်မှုကို ဘရာဇီးလ်နိုင်ငံတွင် ပထမဆုံး တွေ့ရှိခဲ့ရခြင်းဖြစ်ပြီး ဘရားဇီးလ်တွင် အဆိုပါဦးနှောက်သေးရောဂါ ဖြစ်ပွားမှု ၁၈၀၀ ကျော် ရှိခဲ့သည်။

Ref : Bangkokpost