မလေးရှား နိုင်ငံဖြတ်ကျော် မီးရထားလမ်းအတွက် တရုတ်ကူညီမည်

နိုဝင်ဘာ ၁၊ ၂၀၁၆
M-Media

– ရင်းဂစ် ၅၅ ဘီလီယံ ကုန်ကျပြီး မလေးရှားကျွန်းဆွယ်ရှိ ပြည်နယ်လေးခုကို ဆက်သွယ်ပေးမည့် အရှေ့ကမ်းရိုးတန်းမီးရထားလမ်း (ECRL) စီမံကိန်းအတွက် တရုတ်နိုင်ငံက ဘဏ္ဍာရေး ထောက်ပံ့ပေးသွားမည်ဟု မလေးရှား ဘဏ္ဍာရေးဝန်ကြီး ဒေါက်တာ အစ်ရ်ဝမ် ဆီရီဂါ အဘ်ဒူလာက ပြောကြားလိုက်သည်။

အဆိုပါ စီမံကိန်းအတွက် မူဘောင်သဘောတူညီချက်ကို ယနေ့တွင် မြို့တော်ပေကျင်း၌ လက်မှတ်ရေးထိုးသွားမည်ဖြစ်သည်။ မလေးရှား ၀န်ကြီးချုပ်နာဂျစ်ရာဇတ်ဦးဆောင်သည့် မလေးရှားကိုယ်စားလှယ်အဖွဲ့မှာ ၆ ရက်ကြာ ခရီးစဉ်အဖြစ် ပေကျင်းသို့ ရောက်ရှိနေသည်။

ယခုတည်ဆောက်မည့် အရှေ့ကမ်းရိုးတန်း မီးရထားလမ်းမှာ မလေးရှားကျွန်းဆွယ်၏ အရှေ့ဘက်နှင့် အနောက်ဘက်ကမ်းရိုးတန်းကြား သယ်ယူပို့ဆောင်ရေးကုန်ကျစရိတ်ကို သက်သာစေမည်ဖြစ်ပြီး ကုန်စည်များ၏ တန်ဖိုးကို လျှော့ကျစေကာ အချိန်လည်း ချွေတာနိုင်မည်ဟု အဘ်ဒူလာက ပြောကြားခဲ့သည်။

“ဒီစီမံကိန်းက မလေးနိုင်ငံသားတွေ အထူးသဖြင့် ကျေးလက်နေပြည်သူတွေအတွက် အလုပ်အကိုင်နဲ့ စီးပွားရေးအခွင့်အလမ်းတွေကို ပိုပြီး ဖန်တီးပေးနိုင်မှာပါ”

အဆိုပါ စီမံကိန်းအတွက် တရုတ်နိုင်ငံ၏ ငွေကြေးထောက်ပံ့မှုကို မလေးရှားက နှစ် ၂၀ အတွင်း ပြန်ဆပ်ရမည်ဖြစ်သည်။ အဘ်ဒူလာကမူ စီမံကိန်းမှာ နိုင်ငံ၏ သယ်ယူပို့ဆောင်ရေးကဏ္ဍကို ဖွံ့ဖြိုးတိုးတက်စေရန်သာမက ရထားလမ်းတစ်လျှောက်ရှိ မြို့ငယ်လေးများ အလျင်အမြန် ဖွံ့ဖြိုးတိုးတက်ရေးအတွက် အထောက်အကူ ဖြစ်စေမည်ဟု ထည့်သွင်းပြောဆိုခဲ့သည်။

စီမံကိန်းကို လာမည့်နှစ်တွင် စတင်ရန် မျှော်မှန်းထားပြီး ၂၀၂၂ ခုနှစ်တွင် အပြီးသတ်ရန် လျာထားသည်။

Ref; CNA