သြဇီဗလီတစ်ခုက အစ္စလာမ့်အကြောင်း အသိပညာပေးလှုပ်ရှားမှု ပြုလုပ်

နိုဝင်ဘာ ၁၊ ၂၀၁၆
M-Media

– အစ္စလာမ်သာသနာအပေါ် နားလည်မှုလွဲမှားမှုများကို ဖယ်ရှားရန်အတွက် သြစတေးလျနိုင်ငံ ကွင်းစ်လန်းမြို့ရှိ ရော့က်သက်တမ် ဗလီဝတ်ကျောင်းတော်က တံခါးဖွင့်လှုပ်ရှားမှုတစ်ခု ပြုလုပ်ခဲ့ပြီး လူ ၂၀၀ ကျော် တက်ရောက်ခဲ့သည်ဟု သိရသည်။

တက်ရောက်လာသူများက အစ္စလာမ်နှင့် မွတ်စလင်အကြာင်းတို့ကို မေးမြန်းခဲ့ကြကာ ဗလီတာဝန်ရှိသူများက ပြန်လည်ရှင်းပြခဲ့သည်။ ဗဟိုကွင်းစ်လန်း အစ္စလာမ့်လူမှုအသိုက်အ၀န်းမှ တာဝန်ရှိသူ မွတ်စ်တာဖာ အလ်ကီရှင်ကမူ မိမိတို့ မွတ်စလင်လူ့အဖွဲ့အစည်းမှာ ထိုကဲ့သို့ တုံ့ပြန်မှုရသည့်အတွက် ၀မ်းမြောက်ဝမ်းသာ ဖြစ်မိသည်ဟု ပြောကြားခဲ့သည်။

“အချို့မေးခွန်းတွေက အလွန်ကောင်းပါတယ်၊ အမေးအဖြေလုပ်ပေးတာက အစ္စလာမ်သာသနာနဲ့ပက်သက်ပြီး နားလည်နိုင်ဖို့နဲ့ မဟုတ်မတရား ပြောဆိုမှုတစ်ချို့ကို ဖယ်ရှားဖို့ပဲဖြစ်ပါတယ်။ မထင်မှတ်ထားလောက်အောင် တုံ့ပြန်မှုတွေရခဲ့ပါတယ်။ ဘာကြောင့်လဲဆိုတော့ လူတွေက သူတို့ သိချင်၊ ပိုမိုနားလည်ချင်တဲ့မေးခွန်းတွေကို မေးလာလို့ပါပဲ၊ ပြီးတော့ ဒါဟာ ကျွန်တော်တို့ကြားက အဆီးအတားတွေကို ဖြိုချနိုင်ဖို့ အင်မတန်ကြီးမားတဲ့ အခွင့်အရေးတစ်ခုဖြစ်တယ်လို့ ကျွန်တော် ထင်ပါတယ်”

အဆိုပါ လှုပ်ရှားမှုတွင် ဧည်သည့်တော်အဖြစ် လာရောက်ခဲ့သည့် ဘရစ်ဘိန်းဒေသမှ အီမာမ် မိုဟာမက် အက်ရမ်ကမူ National Mosque Open Day တို့ကဲ့သို့ ဗလီဝတ်ကျောင်းတော် တံခါးဖွင့်လှုပ်ရှားမှုမှာ ငြိမ်းချမ်းမှုရှာဖွေရေးအတွက် လူ့အဖွဲ့အစည်းအား စုစည်းညီညွှတ်စေသည်ဟု ပြောကြားခဲ့သည်။

“တော်တော်လေးအောင်မြင်တယ်လို့ ကျွန်တော် ထင်ပါတယ်။ ကျွန်တော်တို့ရဲ့ ရည်မှန်းချက်တွေ၊ ရည်ရွယ်ချက်တွေကို အောင်မြင်ပါတယ်။ နောက်ဆက်တွဲ ဆောင်ရွက်မှုတွေကလည်း အပြုသဘောဆောင်မှုတွေ ရှိမယ်လို့ ကျွန်တော် မျှော်လင့်ပါတယ်။ ဒီလို တံခါးဖွင့်လှုပ်ရှားမှုရဲ့ အဓိက ရည်ရွယ်ချက်က နားလည်မှုတည်ဆောက်ဖိုနဲ့ အထင်အမြင်လွဲမှားမှုတွေကို ဖြေရှင်းဖို့ဖြစ်ပါတယ်”

မြို့တော်ကောင်စီဝင်တစ်ဦးဖြစ်သူ ရို့စ် ဆွဒ်ဒလင်းက ထိုလှုပ်ရှားမှုကို တက်ရောက်ခဲ့သူများထံမှ အပြုသဘောဆောင်သည့် တုံ့ပြန်မှုများ ရရှိခဲ့သည်ဟု ပြောကြားခဲ့သည်။

Ref : IINA