ခင်ပွန်းကို အရွဲ့တိုက်ထီထိုးရာမှ အမေရိကန်အမျိုးသမီးတစ်ဦး ဒေါ်လာ ၁ သန်းပေါက်

နိုဝင်ဘာ ၂၊ ၂၀၁၆
M-Media

– ထီအရမ်းထိုးလွန်းတဲ့ ခင်ပွန်းသည်ကို အရွဲ့တိုက်ချင်တဲ့စိတ်နဲ့ ဈေးကြီးကြီးထီတစ်စောင်ထိုးခဲ့တဲ့ ဇနီးသည်တစ်ဦးဟာ ကံကောင်းထောက်မစွာပဲ ဒေါ်လာ တစ်သန်းဆုကြီးပေါက်ခဲ့တဲ့ အံ့သြဖွယ်အဖြစ်အပျက်တစ်ခု အမေရိကန်ပြည်ထောင်စုမှာ ပြီးခဲ့တဲ့ ရက်ပိုင်းအတွင်း ဖြစ်ပွားခဲ့တယ်။

မြောက်ကယ်ရိုလိုင်းနားက ဂလန်ဒါ ဘလက်ဝဲလ်ဆိုတဲ့ အမျိုးသမီးဖြစ်ပြီး ခင်ပွန်းဖြစ်သူက ထီတွေထိုး ပိုက်ဆံဖြုန်းတီးနေတာကို လုံးဝ မနှစ်မြို့သူတစ်ယောက်ပါ။ ပြီးခဲ့တဲ့တစ်ပတ် စနေနေ့မှာတော့ သူမ အပြင်သွားကာနီး ခင်ပွန်းဖြစ်သူက ထီထိုးဖို့ မှာပါတယ်။ ဘလက်ဝဲလ်ကလည်း စိတ်ပေါက်ပေါက်နဲ့ ခါတိုင်းထက် တန်ဖိုးများတဲ့ ဒေါ်လာ ၁၀ တန် ကာရိုလိုင်းနား ခဲခြစ်သန်းထီကို ၀ယ်လာခဲ့ပါတော့တယ်။

“ကျွန်မ တော်တော် စိတ်တိုသွားပြီး ဘာထိုးထိုး ပေါက်မှာမဟုတ်ဘူးဆိုတာကိုပြဖို့ ခဲခြစ်ထီလက်မှတ်ကို ၀ယ်လာခဲ့ပါတယ်။ တစ်ခါတစ်လေကျရင် ကျွန်မ စိတ်ပေါက်ပေါက်နဲ့ ‘ရှင် ပိုက်ဆံတွေ ဖြုန်းနေတာပဲ’ လို့ ဆူစောင့်ပါတယ်” လို့ သူမက ဖွင့်ဟခဲ့ပါတယ်။

ဒါပေမယ့် သူဝယ်လာတဲ့ ဒီခဲခြစ်ထီလက်မှတ်က ကံကောင်းထောက်မစွာနဲ့ပဲ ဒေါ်လာ ၁ သန်းဆုကြီး ပေါက်ခဲ့ပါတယ်။ ခင်ပွန်းဖြစ်သူကို ထီထိုးတဲ့အတွက် ထပ်ပြီး ကြိမ်းမောင်းအုံးမလားဆိုတဲ့အခါ သူမက

“ထွက်ပြီးသားဆင်စွယ် ပြန်ဝင်ရတော့မှာပေါ့ရှင်။ ဒါပေမယ့် ၀င်ရကျိုးနပ်ပါတယ်” လို့ အပြုံးတစ်ပိုင်းနဲ့ ဘလက်ဝဲလ်က ပြောကြားခဲ့ပါတယ်။

သူမက ဒီငွေတွေနဲ့ အိမ်တွေ၊ မြေတွေဝယ်ဖို့စိတ်ကူးထားပြီး မြေးနှစ်ယောက် ကောလိပ်တက်ဖို့နဲ့ သမီးဖြစ်သူကို ကူညီဖို့ သုံးစွဲသွားမယ်လို့ ဆိုပါတယ်။

Ref : CNN