ရခိုင်ပြည်နယ်ဖွံ့ဖြိုးရေး ဆော်ဒီက IOM မှတစ်ဆင့် ကူညီမည်

နိုဝင်ဘာ ၇၊ ၂၀၁၆
M-Media

IOM နှင့်ပူးပေါင်းကာ ရခိုင်ပြည်နယ်တွင် အကူအညီပေးသွားမည့် KS-RELIEF

– ရခိုင်ပြည်နယ်ရှိ ကျေးရွာပေါင်း ၃၅ ရွာတွင် ဖွံ့ဖြိုးရေးစီမံကိန်းများ ဆောင်ရွက်ရန်အတွက် ဆော်ဒီအာရေဗျနိုင်ငံက ကူညီပေးသွားမည်ဟု သိရပြီး အိုအိုင်စီအဖွဲ့ကလည်း ဆော်ဒီ၏ ထိုလုပ်ရပ်ကို ထောက်ခံကြိုဆိုလိုက်သည်။

လယ်ယာစိုက်ပျိုးရေးကဏ္ဍ ဖွံ့ဖြိုးတိုးတက်ရေး၊ အသက်မွေးဝမ်းကြောင်းအလုပ်အကိုင်များ ရရှိရေးအတွက် လိုအပ်သည်များကို ဖြည့်ဆည်းရေး၊ လူနေမှုအဆင့်အတန်းမြင့်မားရေး၊ တရားမ၀င်ရွှေ့ပြောင်းသွားလာမှု လျှော့ကျစေရေး စသည့် ကဏ္ဍများတွင် ဆော်ဒီ၏ အကူအညီဖြင့် စီမံကိန်းများ ဖော်ဆောင်သွားမည်ဖြစ်သည်။

ထိုကိစ္စများတွင် ပူးပေါင်းဆောင်ရွက်ရန် ဘုရင်ဆလ်မန် ကယ်ဆယ်ရေးနှင့် လူသားချင်း စာနာထောက်ထားမှုဆိုင်ရာ အကူအညီပေးရေးစင်တာ (KS-RELIEF) မှာ ကမ္ဘာတစ်ဝှမ်း ပြောင်းရွှေ့အခြေချသူများကို ကူညီနေသည့် နိုင်ငံတကာ ပြောင်းရွှေ့အခြေအချသူများအဖွဲ့ IOM နှင့် သဘောတူလက်မှတ် ရေးထိုးခဲ့သည်။

အစ္စလာမ့်မစ်ပူးပေါင်းဆောင်ရွက်ရေးအဖွဲ့ OIC ကမူ ဆော်ဒီ၏ ထိုအားထုတ်မှုကို ထောက်ခံကြိုဆိုခဲ့ပြီး အခြားသော အိုအိုင်စီအဖွဲ့ဝင်နိုင်ငံများ၊ လူ့အဖွဲ့အစည်းအခြေပြု အသင်းအဖွဲ့များအနေဖြင့် မြန်မာပြည်သူများ၊ အထူးသဖြင့် ရခိုင်ပြည်နယ်မှ ပြည်သူများ၏ လိုအပ်ချက်များကို ဖြည့်ဆည်းပေးနိုင်ရေးအတွက် ဆော်ဒီကဲ့သို့ ကူညီထောက်ပံ့မှုများ ပြုလုပ်ကြရန်လည်း မေတ္တာရပ်ခံခဲ့သည်။

Ref: reliefweb.int