အသုံးစားရိတ်လျှော့ချရေး ဗြိတိန်စစ်တပ်က တပ်ပိုင်မြေများ ထုတ်ရောင်းမည်

နိုဝင်ဘာ ၉၊ ၂၀၁၆
M-Media

ဗြိတိသျှကာကွယ်ရေးဝန်ကြီး မိုက်ကယ် ဖော်လန်

– စစ်တပ်၏ အသုံးစားရိတ်ကို လျှော့ချရန်နှင့် အိမ်ယာများ ဆောက်လုပ်နိုင်ရေး မြေများ ပိုထွက်လာစေရန်အတွက် တပ်ပိုင်မြေ ၅၆ နေရာကို ရောင်းချသွားမည်ဟု ဗြိတိသျှကာကွယ်ရေးဝန်ကြီး မိုက်ကယ် ဖော်လန်က ပြောကြားခဲ့သည်။

ယမန်နေ့က လွှတ်တော်တွင် ပြောကြားခဲ့ခြင်းဖြစ်ပြီး ထိုကဲ့သို့ တပ်ပိုင်မြေများကို ရောင်းချမှုများမှာ ကာကွယ်ရေးဌာန၏ အသုံးစားရိတ် စီမံခန့်ခွဲမှုကောင်းမွန်လာစေမည့် ပိုင်ဆိုင်မှု ပြည်လည်သုံးသပ်ရေးအစီအစဉ်၏ တစ်စိတ်တစ်ပိုင်းဖြစ်ကြောင်း ၀န်ကြီးက ထည့်သွင်းပြောဆိုခဲ့သည်။

“(ရတဲ့ငွေတွေကို) လိုအပ်တဲ့နေရာတွေမှာ သုံးမယ်ဆိုရင် ကျွန်တော်တို့ရဲ့ လက်နက်ကိုင်တပ်ဖွဲ့တွေကို ပိုမိုကောင်းမွန်တဲ့လက်နက်ကိရိယာ အဆောင်အယောင်တွေ ထောက်ပံ့ပေးနိုင်မှာဖြစ်ပြီး သူတို့ရဲ့ မိသားစုဝင်တွေအတွက်လည်း ပိုကောင်းတဲ့ အစီအမံတွေ စီစဉ်ပေးနိုင်မှာဖြစ်ပါတယ်”

ဗြိတိန်အစိုးရသည် ယခင်ကလည်း တပ်ပိုင်မြေ ၃၅ နေရာကို ရောင်းချခဲ့ပြီးဖြစ်သည်။ ယခုအစီအစဉ်သစ်တွင် တပ်ပိုင်မြေဧကပေါင်း ၂၃၀၀၀ ခန့်ကို လက်လွှတ်မည်ဖြစ်ပြီး ထိန်းသိမ်းစားရိတ် ပေါင် သန်း ၄၀ သက်သာစေမည်ဖြစ်သည်။ အဆိုပါအကျယ်အ၀န်းသည် လာမည့် ၁၀ နှစ်အတွင်း အိမ်ခြေ ၅၅၀၀၀ ဆောက်လုပ်ရန် လုံလောက်သည့် အကျယ်အ၀န်းဖြစ်သည်ဟု ဖော်လန်က ပြောကြားခဲ့သည်။

ယင်းမြေနေရာများအနက် ၈ ခုမှာ စကော့တလန်တွင် ဖြစ်ပြီး သုံးခုမှာ ဝေးလ်စ်နှင့် အိုင်ယာလန်မြောက်ပိုင်းတို့တွင် ဖြစ်သည်။ ကျန်မြေနေရာများသည် အင်္ဂလန်တွင် တည်ရှိသည်။

Ref : Press TV