ဂျာမနီခရစ္စမတ်ဈေးကို ကားဝင်တိုက်မှုကြောင့် လူ တစ်ဒါဇင် သေဆုံး

ဒီဇင်ဘာ ၂၀၊ ၂၀၁၆
M-Media

– ဂျာမနီနိုင်ငံ မြို့တော်ဘာလင်ရှိ ခရစ္စမတ်ဈေးတစ်ခုမှ လူအုပ်အတွင်းသို့ ထရပ်ကားတစ်စီးက အပြင်းမောင်းနှင် ၀င်တိုက်မှုကြောင့် အနည်းဆုံး လူ ၁၂ ဦး သေဆုံးခဲ့သည်ဟု ဂျာမနီရဲတပ်ဖွဲ့က ပြောကြားလိုက်သည်။

ယမန်နေ့က ဖြစ်ပွားခဲ့သည့် အဆိုပါအဖြစ်အပျက်တွင် ဒဏ်ရာရရှိသူမှာလည်း အနည်းဆုံး ၅၀ ခန့်ရှိနေပြီး ရဲတပ်ဖွဲ့က နောက်ပိုင်းတွင် သံသယရှိသူကို ဖမ်းဆီးနိုင်ခဲ့ကာ ထရပ်ကားမှာ ပိုလန်လိုင်စင်ဖြစ်သည်ဟု ဆိုသည်။

ဂျာမနီတရားရေးဝန်ကြီး ဟီကို မက်စ်ကမူ အကြမ်းဖက်ကိစ္စများကို ကိုင်တွယ်နေသည့် တာဝန်ရှိသူများက ယခုကိစ္စအတွက် စုံစမ်းစစ်ဆေးမှု ပြုလုပ်နေသည်ဟု ပြောကြားခဲ့သည်။

ဂျာမနီ ပြည်ထဲရေးဝန်ကြီး သောမတ်စ် ဒီ မိုင်ဇီရီက ၎င်းအနေဖြင့် လုံခြုံရေးဆိုင်ရာ တာဝန်ရှိသူများနှင့် အဆက်အသွယ်ရှိနေသည်ဟု ပြောကြားခဲ့ပြီး မတော်တဆ ဖြစ်ရပ်လား၊ တိုက်ခိုက်မှုလားဆိုသည်ကို မှတ်ချက်ပေးခဲ့ခြင်းမရှိပေ။

ချက်နှင့် ပြင်သစ်အာဏာပိုင်များကလည်း ထိုအဖြစ်အပျက် ဖြစ်ပွားပြီးနောက်ပိုင်း တိုင်းပြည်အတွင်း လုံခြုံရေး တိုးမြှင့်ထားသည်ဟု ဆိုသည်။ အိမ်ဖြူတော်ကမူ အကြမ်းဖက်တိုက်ခိုက်မှုဖြစ်နိုင်သည့် ထိုကိစ္စကို ရှုတ်ချသည်ဟု ပြောကြားခဲ့သည်။

Ref: Aljazeera