မလေးတွင် နိုင်ငံခြားအလုပ်သမား အတွက် လေဗီကြေးကို အလုပ်ရှင်က ပေးရမည်

ဇန်န၀ါရီ ၁၊ ၂၀၁၇
M-Media

– မလေးရှားနိုင်ငံတွင် အလုပ်လုပ်ကိုင်နေသည့် နိုင်ငံခြားအလုပ်သမားများအတွက် အခွန် (လေဗီ) ကြေးကို ၂၀၁၇ ခုနှစ် ဇန်န၀ါရီ ၁ ရက်နေ့မှစ၍ အလုပ်ရှင်က ပေးဆောင်ရမည်ဟု မလေးရှား ပြည်ထဲရေးဝန်ကြီး ဒါတွတ် ဆရီ ဒေါက် အဟ်မဒ် ဇာဟစ် ဟာမီဒီက ပြောကြားလိုက်သည်။

ယခင်က နိုင်ငံခြားအလုပ်သမားများမှာ ၎င်းတို့၏ လေဗီကြေးအတွက် လုပ်ခလစာထဲမှ ဖြတ်တောက်ခံခဲ့ရပြီး အလုပ်ရှင်များဘက်မှ လုပ်ပေးရမည့်တာဝန်များ (EMC) ဆိုသည့် ပြဌာန်းချက်အသစ်အရ ယခုကဲ့သို့ ပြောင်းလဲလိုက်ခြင်းဖြစ်သည်။

ဒုတိယ၀န်ကြီးချုပ်လည်းဖြစ်သူ ဒေါက်တာ အဟ်မဒ် ဇာဟစ်က အဆိုပါ EMC မှာ နိုင်ငံခြားအလုပ်သမား အလုပ်စလျှောက်သည့်အချိန်မှစ၍ သက်တမ်းကုန်ဆုံးပြီး ဇာတိနိုင်ငံသို့ ပြန်သည်အထိ အလုပ်ရှင်ဘက်က လုပ်ပေးရမည့် တာဝန်များဖြစ်သည်ဟု ပြောကြားခဲ့သည်။

“အလုပ်ရှင်တွေက ဖြည့်ဆည်းပေးရမယ့် တာဝန်တွေ၊ လိုအပ်ချက်တွေကို ဖော်ပြထားတဲ့ အသိပေးစာတစ်စောင်ကိုလည်း အစိုးရက မကြာခင်မှာ ထုတ်ဖို့ ရှိနေပါတယ်” ဟု ဒေါက်တာ အဟ်မဒ်ဇာဟစ် ယမန်နေ့တွင် ထုတ်ပြန်ခဲ့သော ကြေငြာချက်တွင် ဖော်ပြထားသည်။

Ref : The Star