အီရန်စစ်တုရင်မယ် ကမ္ဘာ့အကောင်းဆုံး ၃၀ စာရင်းတွင် ပါဝင်လာ

ဇန်န၀ါရီ ၂၊ ၂၀၁၇
M-Media

– အီရန်နိုင်ငံမှ စစ်တုရင်အားကစားမယ် ဆာရာဆာဒတ် ခါဒီမာလ်ရှာရီယာမှာ ကမ္ဘာ့စစ်တုရင်အဖွဲ့ချုပ် (FIDE) မှ ဇန်န၀ါရီအတွက် ထုတ်ပြန်သည့် အဆင့်သတ်မှတ်ချက်တွင် ၁၁ ဆင့်အထိ ခုန်တက်ခဲ့ပြီး ကမ္ဘာထိပ်တန်း စစ်တုရင်ကစားသမား ၃၀ စာရင်းတွင် ပါဝင်လာသည်ဟု သိရသည်။

အသက် ၁၉ နှစ်အရွယ်သာရှိသေးသည့် ဆာရာဆာဒတ်မှာ ရမှတ် ၂၄၅၂ ဖြင့် အဆင့် ၂၈ သို့ ရောက်ရှိလာခြင်းဖြစ်သည်။ သူမမှာ ပြီးခဲ့သည့်လက ကာတာနိုင်ငံ ဒိုဟာမြို့တွင် ပြုလုပ်ခဲ့သည့် FIDE ၏ အမျိုးသမီး ကမ္ဘာ့စစ်တုရင်ပြိုင်ပွဲ World Chess Rapid Championships တွင် လက်စွမ်းပြနိုင်ခဲ့ပြီး စတုတ္ထနေရာ ရရှိခဲ့သည်။

ထို့ပြင် World Chess Blitz Championships ပြိုင်ပွဲတွင်လည်း အဆင့် ၁၈ ရရှိခဲ့သည်။ ၂၀၁၆ ခုနှစ် ဖေဖော်ဝါရီလက အီရန်နိုင်ငံ တီဟီရန်၌ ကျင်းပပြုလုပ်ခဲ့သည့် FIDE ၏ အမျိုးသမီး ဂရင်းပရီ စစ်တုရင်ပြိုင်ပွဲတွင်မူ ဆာရာဆာဒတ်မှာ ဒုတိယ ရရှိခဲ့သည်။

FIDE ၏ အဆိုပါ ကမ္ဘာ့အဆင့်သတ်မှတ်ချက်တွင် အခြားအီရန် စစ်တုရင်အားကစားမယ် ဒေါရ်စာ ဒီရက်ရှာနီက ရမှတ် ၂၃၇၀၊ မီထရာ ဟီဂျာဇီပူရ်က ၂၃၀၇ မှတ်၊ အာတူဆာ ပူရ်ကာရှီယန်က ၂၃၀၃ မှတ် အသီးသီး ရရှိခဲ့သည်။

Ref: Press TV