မြောက်ကိုရီးယားကို နျူပိုင်ဆိုင်သည့်နိုင်ငံ အဖြစ်ခံမည်မဟုတ်ဟု ထရမ့်ပြော

ဇန်န၀ါရီ ၃၊ ၂၀၁၇
M-Media

– အမေရိကန်သို့ ရောက်ရှိနိုင်သည့် နျူလက်နက်မျိုး မြောက်ကိုရီးယားကို ထုတ်လုပ်ခွင့်ပေးမည်မဟုတ်ဟု အမေရိကန်သမ္မတသစ် ဒေါ်နယ်ထရမ့်က ယမန်နေ့တွင် ပြောကြားလိုက်သည်။

ပြီးခဲ့သည့်တစ်ရက်က မြောက်ကိုရီးယားခေါင်းဆောင် ကင်ဂျုံအန်မှာ မိမိတို့အနေဖြင့် နျူထိပ်ဖူးတပ်ဆင်နိုင်သည့် တိုက်ချင်းပစ်ဒုံးကျည် ICBM တီထွင်ထုတ်လုပ်မှု နောက်ဆုံးအဆင့်သို့ ရောက်ရှိနေပြီဟု ပြောကြားမှုကို ထရမ့်က ယခုကဲ့သို့ သတိပေးလိုက်ခြင်းလည်းဖြစ်သည်။

“အမေရိကန်အထိ ရောက်ရှိနိုင်မယ့် နျူလက်နက်မျိုးကို ထုတ်လုပ်မှု နောက်ဆုံးအဆင့်ကို ရောက်ရှိနေတယ်လို့ မြောက်ကိုရီးယားက ကြေငြာထားတယ်။ ဒါမျိုး ဖြစ်လာမှာ မဟုတ်ပါဘူး” ဟု ထရမ့်က Twitter စာမျက်နှာတွင် ရေးသားခဲ့သည်။

မြောက်ကိုရီးယားအား နျူလက်နက်ပိုင်ဆိုင်သည့်နိုင်ငံ ဖြစ်ခွင့်ပြုမည်မဟုတ်ဟု အမေရိကန်က တစ်စိုက်မတ်မတ် ပြောကြားထားသော်လည်း နိုဝင်ဘာရွေးကောက်ပွဲတွင် အံ့ဖွယ်အနိုင်ရခဲ့သည့် ထရမ့်ကမူ ကွန်မြူနစ် မြောက်ကို ရီးယားနှင့်ပတ်သက်၍ ၎င်း၏ ပေါ်လစီကို ရှင်းရှင်းလင်းလင်း ဖော်ပြခြင်းမပြုခဲ့ဘဲ ယခုအချိန်တွင်မှ ထိုကဲ့သို့ တုန့်ပြန်ခြင်းဖြစ်သည်။

ထို့ပြင် တစ်ဖက်သတ်ကုန်သွယ်မှုဖြင့် အမေရိကန်ထံမှ ငွေကြေးနှင့် ကြွယ်ဝမှု အမြောက်အများကို ရယူနေသည့် တရုတ်နိုင်ငံမှာ မြောက်ကိုရီးယားကို အကူအညီဖြစ်စေမည်မဟုတ်ဟုလည်း ထရမ့်က ထပ်မံ ရေးသားခဲ့သည်။

Ref: CNA