မြောက်ကိုရီးယားအတွက် ဗီဇာကင်းလွတ်ခွင့်ကို မလေးရှား ရုပ်သိမ်း

မတ် ၂၊ ၂၀၁၇
M-Media

– မြောက်ကိုရီးယားနိုင်ငံသားများအား ဗီဇာကင်းလွတ်ခွင့်ပေးထားမှုကို မလေးရှားက မတ်လ ၆ ရက်နေ့မှ စတင်ကာ ဖျက်သိမ်းသွားမည်ဟု ဒုတိယ၀န်ကြီးချုပ် အဟ်မဒ် ဇာဟစ် ဟာမီဒီ၏ ပြောကြားမှုကို ကိုးကား၍ မလေးရှားသတင်းဌာန Bernama က ယနေ့တွင် ဖော်ပြခဲ့သည်။

အမျိုးသားလုံခြုံရေးကြောင့် ယခုကဲ့သို့ ဖျက်သိမ်းရခြင်းဖြစ်ပြီး မြောက်ကိုရီးယားနိုင်ငံသားများမှာ မလေးရှားနိုင်ငံကို မ၀င်ရောက်မီ ဗီဇာ ကြိုတင်လျှောက်ထားရမည်ဟုလည်း ၀န်ကြီးချုပ်က ဆိုသည်။

မြောက်ကိုရီးယားခေါင်းဆောင် ကင်ဂျံအန်၏ အဖေတူအမေကွဲအစ်ကို ကင်ဂျံနမ် ကွာလာလမ်ပူလေဆိပ်တွင် ပြီးခဲ့သည့်လက လုပ်ကြံခံခဲ့ရပြီးနောက်ပိုင်း ကွာလာလမ်ပူရှိ သံတမန်တစ်ဦးအပါအ၀င် မြောက်ကိုရီးယားနိုင်ငံသားများကို သံသယရှိသူများအဖြစ် မလေးရှားက ကြေငြာခဲ့သောကြောင့် မလေးရှားနှင့် မြောက်ကိုရီးယားတို့အကြား တင်းမာမှု မြင့်တက်ခဲ့သည်။

တောင်ကိုရီးယား ထောက်လှမ်းရေးကမူ ကင်ဂျုံနမ်မှာ မြောက်ကိုရီးယားသူလျှိုများ၏ လုပ်ကြံမှုကို ခံခဲ့ရသည်ဟု ပြောကြားထားပြီး၊ အလောင်းအားစစ်ဆေးမှုအရ စစ်ပွဲတွင် အသုံးပြုသည့် ဓာတ်တုအဆိပ်ဖြင့် အသတ်ခံခဲ့သည်ဟု မလေးရှားက ထုတ်ပြန်ခဲ့သည်။

Ref: CNA