စာအုပ် ၆ သန်းပါသည့် အွန်လိုင်းစာအုပ်စတိုး အရှေ့အလယ်ပိုင်းတွင်ဖွင့်လှစ်

မေ ၅၊ ၂၀၁၇
M-Media

– အရှေ့အလယ်ပိုင်း၏ အကြီးဆုံး အွန်လိုင်းစတိုးဖြစ်သော Souq.com မှာ စာအုပ်ပေါင်း ၆ သန်းပါဝင်မည့် အွန်လိုင်း စာအုပ်စတိုးတစ်ခုကို ဖွင့်လှစ်လိုက်ပြီဟု သိရသည်။

ကမ္ဘာကျော် Amazon ၏ Kindle စာအုပ်များကဲ့သို့ ဖြစ်ပြီး Global Bookstore ဟု အမည်ပေးထားသည့် Souq.com ၏ ယခု အွန်လိုင်းစာအုပ်စတိုးမှာ အရှေ့အလယ်ပိုင်း ဒေသအတွက် စာအုပ်များကို ပိုမိုရရှိစေနိုင်မည် ဖြစ်သည်။ ထို အွန်လိုင်းစာအုပ်စတိုးကို ယူအေအီး အစိုးရ၏ Year of Reading initiative က ကူညီပံ့ပိုးပေးမည်ဖြစ်သည်။

Global Bookstore တွင် ယဉ်ကျေးမှု၊ မိသားစု၊ ပညာရေး၊ စီးပွားရေး စသည်တို့ အပါအ၀င် ကဏ္ဍပေါင်းစုံမှ စာအုပ်များ ပါဝင်မည်ဖြစ်သည်။

Souq.com ကို ပူးတွဲတည်ထောင်သူနှင့် စီအီးအို ရော်နယ်ဒို မူချာဝါရ်က “ကျွန်တော်တို့ရဲ့ ဖောက်သည်တွေအတွက် စာအုပ်ပေါင်းစုံကို လွယ်လွယ်ကူကူနဲ့ ရရှိစေဖို့ စာအုပ်စတိုး ဖန်တီးပေးရတာကို ကျွန်တော်တို့ ပျော်ရွှင်မိပါတယ်။ အနာဂတ်မှာလည်း ဒီထက် ပိုပြီး တိုးတက်အောင်လုပ်သွားဖို့ စီစဉ်ထားပါတယ်” ဟု ပြောကြားခဲ့သည်။

ထို့ပြင် မိမိတို့အနေဖြင့် နိုင်ငံအတွင်းမှ အဖွဲ့အစည်းများ အထူးသဖြင့် Mohammed Bin Rashid Al Maktoum Foundation၊ Dubai e-Library တို့နှင့် ပူးပေါင်းကာ စာဖတ်ခြင်း၊ အသိပညာ ရှာဖွေခြင်းနှင့် ပတ်သက်၍ ရှေ့ဆက် ပူးပေါင်းဆောင်ရွက်သွားမည်ဖြစ်ကြောင်း မူချာဝါရ်က ထပ်လောင်း ပြောကြားခဲ့သည်။

“ယူအေအီးရဲ့ National Reading လှုပ်ရှားမှုနဲ့အညီ လုပ်ဆောင်တာဖြစ်ပြီး ဒီလို စာအုပ်စာပေကဏ္ဍမှာ ချဲ့ထွင်မှုဟာ ဒေသတစ်ဝှမ်း စာဖတ်မှုဓလေ့ အရှိအဟုန်အသစ်ကို မြင်နေရတဲ့ စိတ်ဝင်စားစရာကာင်းတဲ့ အချိန်မှာ ပေါ်ထွက်လာတာ ဖြစ်ပါတယ်။ ဒီအစီအစဉ်ဟာ ဒေသတွင်းကလူတွေကို စာအုပ်စာပေတွ ပိုမိုဖတ်ရှုစေနိုင်မှာ ဖြစ်ပါတယ်”

မကြာသေးမီက ထွက်ပေါ်လာခဲ့သည့် Arab Reading Index အညွှန်းကိန်းအရာ အာရပ်စော်ဘွားများပြည်ထောင်စု ယူအေအီးမှ ပြည်သူတစ်ဦးလျှင် တစ်နှစ် ပျမ်းမျှ ၅၁ နာရီဝန်းကျင် စာဖတ်ပြီး ကျန်သည့် အာရပ်ဒေသက စာဖတ်ချိန် ၃၅ နာရီထက် ပို၍ မြင့်မားသည်။

အာရပ်ဒေသတွင် လူတစ်ဦးမှာ တစ်နှစ်လျှင် ပျမ်းမျှ စာအုပ် ၁၆ အုပ် ဖတ်ရှုပြီး ယူအေအီးတွင် ပြည်သူတစ်ဦး တစ်နှစ် ပျမ်းမျှ ဖတ်ရှုသော စာအုပ်မှာ ၂၄ အုပ်ရှိသည်။

Ref: Arabian Business