IS လက်မှ မူဆိုးလ်မြို့ ပြန်သိမ်းရေး နောက်ဆုံးအဆင့် ရောက်နေ

မတ် ၁၅၊ ၂၀၁၇
M-Media

မူဆိုးလ်မြို့ထိုးစစ်တွင်ပါဝင်နေသည့် အီရတ်စစ်သားများ

– IS အကြမ်းဖက်အဖွဲ့က သိမ်းပိုက်ထားသော မူဆိုးလ်မြို့ လွတ်မြောက်ရေး အီရတ်စစ်တပ်၏ ထိုးစစ်မှာ နောက်ဆုံးအဆင့် ရောက်နေပြီဟု အီရတ်ဝန်ကြီးချုပ် ဟိုင်ဒါ အလ်-အာဘာဒီက ပြောကြားလိုက်သည်။

ယမန်နေ့က ဘဂ္ဂဒတ်တွင်ပြုလုပ်သည့် သတင်းစာရှင်းလင်းပွဲ၌ ၀န်ကြီးချုပ်က ထိုကဲ့သို့ ပြောကြားလိုက်ခြင်းဖြစ်ပြီး လက်နက်ချသူများကို မျှတသည့် တရားစီရင်မှု ပြုလုပ်မည်ဖြစ်ကာ ဆက်လက်တိုက်ခိုက်သူများကို ‘လုံးဝ ချေမှုန်းသွားမည်’ ဟု ကျန်ရှိနေသည့် အကြမ်းဖက်သမားများကို သတိပေးခဲ့သည်။

ထို့ပြင် တိုက်ခိုက်မှုများကြောင့် အိုးအိမ်စွန့်ခွာထွက်ပြေးရသူ အရေအတွက် တိုးလာမည် မဟုတ်တော့ဟုလည်း ဆိုသည်။

“ကျွန်တော်တို့ သိပ်ပြီး ဂရုစိုက်နေပါတယ်။ IS ရဲ့ မိသားစုတွေကိုတောင်မှပါ။ သူတို့ကို ဂရုစိုက်နေပြီး တိုက်ခိုက်ရေးသမားတွေတော့ မပါပါဘူး။ မိသားစုတွေကို ကျွန်တော်တို့ ပစ်မှတ်မထားဘူး။ ဒါပေမယ့် IS အကြမ်းဖက်သမားတွေကို တိုက်ခိုက်မှာပါ။ သူတို့ကို တိုက်ခိုက်သွားမှာဖြစ်ပြီး အဖမ်းခံရရင် မျှတတဲ့ တရားစီရင်မှုရမယ်။ ပြန်တိုက်မယ်ဆိုရင်တော့ သူတို့ ချေမှုန်းခံရမှာပါ”

အီရတ်စစ်တပ်နှင့် မျိုးနွယ်စုတပ်ဖွဲ့များ ပူးပေါင်းကာ ပြီးခဲ့သည့် အောက်တိုဘာလမှစ၍ မူဆိုးလ်မြို့အား ပြန်လည်သိမ်းပိုက်နိုင်ရေး ထိုးစစ်ဆင်ခဲ့ပြီး မြို့တွင်းမှ အိုးအိမ်စွန့်ခွာ ထွက်ပြေးရသူ အရေအတွက်မှာ ၈၀၀၀ အထိ ရှိလာပြီဟု နိုင်ငံတကာ ရွှေ့ပြောင်းအခြေချသူများအဖွဲ့က ပြောကြားထားသည်။

လက်ရှိတွင် အီရတ်စစ်တပ်မှာ မြို့အရှေ့ပိုင်းကို သိမ်းပိုက်နိုင်ခဲ့ပြီး ဖေဖော်ဝါရီ ၁၉ ရက်နေ့မှစ၍ အနောက်ပိုင်းကို သိမ်းပိုက်ရေး ထိုးစစ်ဆင်ခဲ့သည်။

Ref: Press TV