MNDAA လက်နက်ကိုင်အဖွဲ့၏ တရုတ်ဘဏ်စာရင်း ပိတ်မှုကို မြန်မာ ကြိုဆို

မတ် ၂၂၊ ၂၀၁၇
M-Media

MNDAA အဖွဲ့က ဘဏ်စာရင်းဖွင့်ထားသည့် တရုတ် စိုက်ပျိုရေးဘဏ် လိုဂို

– ကိုးကန့်ဒေသတွင် လှုပ်ရှားနေသည့် တိုင်းရင်းသား မဟာမိတ်လက်နက်ကိုင်အဖွဲ့ MNDAA ၏ ဘဏ်ငွေစာရင်းကို တရုတ်က ပိတ်ပစ်လိုက်မှုအတွက် ကျေးဇူးတင်သည်ဟု မြန်မာအစိုးရက ပြောကြားလိုက်သည်။

တရုတ်နိုင်ငံပိုင် စိုက်ပျိုးရေးဘဏ် (AgBank) တွက် အပ်ထားသည့် MNDAA ၏ ငွေစာရင်းကို ပြီးခဲ့သည်တစ်ပတ်က ပိတ်ပစ်လိုက်သည်ဟု သတင်းထွက်ပေါ်လာခဲ့ပြီး ဘဏ်တာဝန်ရှိသူများကမူ မိမိတို့အနေဖြင့် ဘဏ်လုပ်ငန်းများအကြောင်းကို ထုတ်ပြောခွင့်မရှိကြောင်း၊ သို့သော်လည်း အကြမ်းဖက်မှု၊ ရာဇ၀တ်မှုတို့နှင့်
ဆက်စပ်သည့် ဘဏ်စာရင်းများကို လက်ခံမည်မဟုတ်ကြောင်း VOA သတင်းဌာနသို့ ပြောကြားခဲ့သည်။

တရုတ်၏ ထိုလုပ်ရပ်အတွက် ကျေးဇူးတင်သည်ဟု သမ္မတရုံးမှ ပြောရေးဆိုခွင့်ရှိသူ ဦးဇော်ဌေးက ပြောကြားခဲ့သည်။

“ဒီလုပ်ရပ်ကို ကျွန်တော်တို့ ကျေးဇူးတင်ပါတယ်။ နယ်စပ်ဒေသမှာ တည်ငြိမ်အေးချမ်းရေးဟာ နှစ်နိုင်ငံစလုံးအတွက် ဘုံအကျိုးစီးပွား ဖြစ်ပါတယ်။ ဒါဟာ တရုတ်ရဲ့ အင်မတန် အပြုသဘောဆောင်တဲ့ ဆောင်ရွက်ချက်ပါပဲ” ဟု ဦးဇော်ဌေးက ဆိုသည်။

တရုတ်နိုင်ငံခြားရေးဝန်ကြီး ဟွာချွမ်ယင်းက မိမိအနေဖြင့် AgBank ၏ ဆုံးဖြတ်ချက်နှင့်ပတ်သက်၍ တိတိကျကျ မသိရသေးကြောင်း၊ မိမိတို့မှာ အခြားနိုင်ငံများ၏ ပြည်တွင်းရေးကို ၀င်ရောက်မစွက်ဖက်ဆိုသည့်မူကို အမြဲတမ်းထိန်းသိမ်းထားပြီး မြန်မာနိုင်ငံ၏ အချုပ်အခြာအာဏာနှင့် နယ်မြေကို လေးစားကြောင်း၊ တရုတ်ပိုင်နက်ကို အသုံးပြု၍ တရုတ်-မြန်မာ ဆက်ဆံရေးနှင့် နယ်စပ်ဒေသ တည်ငြိမ်ရေးကို ထိခိုက်စေမည့် မည်သည့် လူပုဂ္ဂိုလ်၊ အဖွဲ့အစည်းကိုမှ ခွင့်ပြုသွားမည်မဟုတ်ကြောင်း ပြောကြားခဲ့သည်။

MNDAA အဖွဲ့၏ AgBank စာရင်းသို့ တိုက်ရိုက် သို့မဟုတ် မိုဘိုင်းငွေလွှဲမှုစနစ်မှနေ၍ ၂ နှစ်နီးပါးအတွင်း ကန်ဒေါ်လာ ၅ သိန်းကျော် ၀င်ရောက်ခဲ့သည်။

အဆိုပါလက်နက်ကိုင်အဖွဲ့မှာ ယခုလအစောပိုင်းက ကိုးကန့်ဒေသတွင် အစိုးရစစ်တပ်ကို တိုက်ခိုက်ခဲ့ပြီး လက်ရှိအချိန်အတွက် နှစ်ဖက် အပြန်အလှန်တိုက်ပွဲများ ဖြစ်ပွားနေသည်။

Ref: Reuters