အိန္ဒိယတွင် လိင်စော်ကားမှုကို ကာကွယ်ရန် ရဲတပ်ဖွဲ့က ကင်းလှည့်

ဧပြီ ၁၂၊ ၂၀၁၇
M-Media

– အိန္ဒိယနိုင်ငံ အူတာပရာဒက်ရ်ှပြည်နယ်တွင် အမျိုးသမီးများအား လိင်ပိုင်းဆိုင်ရာ စော်ကားမှုများကို ကာကွယ်ပေးမည့် ကင်းလှည့်အဖွဲ့ကို ရဲတပ်ဖွဲ့ ဖွဲ့စည်းကာ လှည့်လည် စောင့်ကြပ်ပေးနေသည်ဟု သိရသည်။

လိင်ပိုင်းဆိုင်ရာ စော်ကားမှုများရှိသည့်ဆိုသည့် တိုင်ကြားမှုများ မြင့်တက်လာသည့်အတွက်ကြောင့် ရဲတပ်ဖွဲ့မှာ ယခုကဲ့သို့ ဆောင်ရွက်ခြင်းဖြစ်ပြီး ပြည်နယ်တစ်ဝှမ်းတွင် ရဲတပ်ဖွဲ့ဝင် စုစုပေါင်း ၁၄၀၀ က ကင်းလှည့်စောင့်ကြပ်သွားမည်ဖြစ်သည်။

ကင်းလှည့်အဖွဲ့တစ်ဖွဲ့တွင် ယူနီဖောင်းဝတ် အမျိုးသားရဲ ၃ ဦး၊ အရပ်ဝတ် ရဲမေတစ်ဦးတို့ ပါဝင်မည်ဖြစ်ပြီး တိုင်ကြားမှုအများဆုံး ဖြစ်သွားသည့်နေရာများသို့ ကားဖြင့် လှည့်လည်သွားမည်ဖြစ်သည်။

လက်ရှိတွင်မူ အဆိုပါကင်းလှည့်အဖွဲ့များမှာ ကိုယ်ကျင့်တရား ဖောက်ပြားသည်ဟုဆိုကာ ဖမ်းဆီးမှုများ၊ အတွဲများကို ရိုက်နှက်မှုများ ရှိသည်ဆိုသည့် သတင်းများ ထွက်ပေါ်နေသည်။

ရဲတပ်ဖွဲ့မှ ပြောရေးဆိုခွင့်ရှိသူ ရာဟူလ် ဆရီ ဗက်စ်တာဗာကမူ အမှားလုပ်သည့် ရဲတပ်ဖွဲ့ဝင်များမှာ လက်တစ်ဆုပ်စာသာ ရှိကြောင်း၊ ရဲတပ်ဖွဲ့ဝင်များကို ဆောင်ရန်၊ ရှောင်ရန်များကို အကြိမ်ကြိမ်သင်ကြား ပေးထားကြောင်း၊ ဥပဒေချိုးဖောက်သည့် ရဲတပ်ဖွဲ့ဝင် ၉ ဦးကို ရာထူးမှ ရပ်ဆိုင်းထားကြောင်း၊ နှစ်ဦးသဘောတူသည့် အတွဲများကို မနှောက်ယှက်ရန် ညွှန်ကြားထားကြောင်း ပြောကြားခဲ့သည်။

BBC