မြောက်ကိုရီးယားနှင့် မကစားရန် အမေရိကန်ကို ဒူတာတေး တိုက်တွန်း

ဧပြီ ၃၀၊ ၂၀၁၇
M-Media

– အမေရိကန်အနေဖြင့် မြောက်ကိုရီးယားနှင့် မကစားရန် ဖိလစ်ပိုင်သမ္မတ ဒူတာတေးက တိုက်တွန်းလိုက်ပြီး ကင်ဂျုံအန်မှာ ‘ကမ္ဘာကြီးအား အဆုံးသတ်ချင်သူ’ ဖြစ်သည်ဟု ပြောကြားလိုက်သည်။

မနီလာမြို့တွင် ကျင်းပပြုလုပ်နေသည့် အာဆီယံခေါင်းဆောင်များ ထိပ်သီးအစည်းအဝေး ပြီးနောက် ယမန်နေ့ သတင်းစာရှင်းလင်းပွဲတွင် ဒူတာတေးက ထိုကဲ့သို့ ပြောကြားလိုက်ခြင်းဖြစ်ပြီး အမေရိကန်နှင့် မြောက်ကိုရီးယားအကြား တင်းမာမှုအတွက် အရှေ့တောင်အာရှဒေသက အလွန်အမင်း စိုးရိမ်မိကြောင်း၊ ခြေလှမ်းတစ်ခု မှားယွင်းသွားပါက အာရှမှာ နျူကလီးယားစစ်ပွဲ၏ ပထမဆုံးသားကောင် ဖြစ်လာမည်ဖြစ်ကြောင်း ထည့်သွင်းပြောဆိုခဲ့သည်။

မြောက်ကိုရီးယားက ဒုံးကျည်စမ်းသပ်မှုများ ဆက်တိုက် ပြုလုပ်လာခဲ့ပြီးနောက် ပြီးခဲ့သည့် သီတင်းပတ်များအတွင်း အမေရိကန်နှင့် မြောက်ကိုရီးယားတို့အကြား တင်းမာမှုများ မြင့်တက်လာခဲ့ပြီး အပြန်အလှန် စိန်ခေါ်မှုများလည်း ပြုလုပ်ခဲ့ကြသည်။

လက်ရှိ အဆီယံ ဥက္ကဌ ဒူတာတေးကမူ အမေရိကန်၊ ဂျပန်၊ တောင်ကိုရီးယားနှင့် တရုတ်တို့မှာ ဒုံးကျည်ပစ်လွှတ်ရေးအတွက် တက်ကြွနေသူတစ်ဦးကို သွာစနေကြောင်း၊ မိမိအနေဖြင့် စနေနေ့နှောင်းပိုင်းတွင် သမ္မတထရမ့်အား ဖုန်းခေါ်ကာ ကင်ဂျုံအင်အား ရင်ဆိုင်မှုတွင် မပါဝင်ရန် တိုက်တွန်းသွားမည် ဖြစ်ကြောင်းလည်း ထည့်သွင်း ပြောဆိုခဲ့သည်။

“ဒီနိုင်ငံနှစ်ခုဟာ ဖျော်ဖြေဖို့မဟုတ်တဲ့ အရုပ်တွေနဲ့ ကစားနေကြတဲ့ပုံပါပဲ။ ဒုံးကျည်တွေနဲ့ ဘာမဆိုလွှတ်ဖို့ ခံတွင်းတွေ့နေတဲ့ သူကို သူတို့က သွားကစားနေကြတယ်။ (ကင်ဂျုံအန်) စိတ်ထင်တိုင်း လုပ်တာကို ကျွန်တော် မလိုချင်ပါဘူး။ သူ့ဆီမှာဘာတွေရှိလဲဆိုတာကို ကျွန်တော် မသိပါဘူး။ ဒါပေမယ့်သူက မိခင်ကမ္ဘာကြီးကို ချောက်ထဲတွန်းဖို့ လုပ်နေတာပါ”

Ref: Aljazeera