အာဆင်နယ်နှင့်ပွဲတွင် အဓိကကစားသမားများကို မန်ယူ အနားပေးမည်

မေ ၅၊ ၂၀၁၇
M-Media

– ကစားသမားများ ပွဲပမ်းသည့်ဒဏ်ကို ရှောင်ရှားနိုင်ရန်အတွက် လာမယ့် တနင်္ဂနွေနေ့ အာဆင်နယ်အသင်းနှင့်ပွဲတွင် ကစားသမားအချို့ကို အနားပေးသွားမည်ဟု မန်ယူနည်းပြ မော်ရင်ဟိုက ပြောကြားလိုက်သည်။

ယနေ့မနက်က ကစားခဲ့သည့် ယူရိုပါလိဂ် ဆီးမီးဖိုင်နယ် ပထမအကျော့တွင် မန်ယူမှာ ဆဲလ်တာဗီဂိုအသင်းကို ၁ ဂိုး ဂိုးမရှိဖြင့် အနိုင်ရရှိခဲ့သည်။ ပရီးမီးယားလိဂ်တွင် အဆင့် ၅ နေရာ၌ ရပ်တည်နေသည့် မန်ယူအတွက် လာမယ့်နှစ် ချန်ပီယံလိဂ်ဝင်ခွင့်ရရန် ယူရိုပါလိဂ်က အကောင်းဆုံး အခွင့်အရေးဖြစ်နေသည်။

မန်ယူမှာ ဧပြီ ၁ ရက်နေ့ကတည်းက ယနေ့အထိ ၁၀ ပွဲကစားထားရပြီး မော်ရင်ဟိုကမူ အာဆင်နယ်နှင့် အဝေးကွင်းပွဲတွင် ကစားသမားများကို အနားပေးသွားမည်ဟု ဆိုသည်။

“မိနစ်တော်တော်များများ ကစားထားရတဲ့ ကစားသမားတွေဟာ ဒီတစ်ပတ်မှာ ကစားရမှာမဟုတ်ပါဘူး” ဟု မော်ရင်ဟိုက ပြောကြားခဲ့သည်။

အကယ်၍ မန်ယူမှာ မေလ ၂၄ ရက်နေ့ စတော့ဟုမ်းတွင် ကစားမည့် ယူရိုပါလိဂ် ဗိုလ်လုပွဲသို့ တက်ရောက်နိုင်ပါက ထိုပွဲမှာ ၎င်းတို့အတွက် ယခုနှစ်ဘောလုံးရာသီ ၆၄ ပွဲမြောက် ဖြစ်လာမည်ဖြစ်သည်။

Ref: BBC