ဗင်နီဇွဲလား တရားရုံးချုပ် ရဟတ်ယာဉ်ဖြင့် တိုက်ခိုက်ခံရသည်ဟု သမ္မတမာဒူရို ထုတ်ပြန်

ဇွန် ၂၈၊ ၂၀၁၇
M-Media

မာဒူရိုအစိုးရအား ဆန့်ကျင်သူပုန်ထရန် တိုက်တွန်းနေသည့် ရဲတပ်ဖွဲ့မှ ရဟတ်ယာဉ်ပိုက်လော့ ပီရက်ဇ်

– ဗင်နီဇွဲလားနိုင်ငံရှိ တရားရုံးချုပ်အဆောက်အဦးကို ရဲတပ်ဖွဲ့ရဟတ်ယာဉ်က ဗုံးကြဲရန် ကြိုးစားမှုတစ်ခု ဖြစ်ပွားခဲ့ပြီး သမ္မတ နီကိုလက်စ် မာဒူရိုကမူ ထိုလုပ်ရပ်ကို ‘အကြမ်းဖက် တိုက်ခိုက်မှု’ ဟု ခေါ်ဆိုခဲ့ကာ ၎င်း၏ ဆိုရှယ်လစ်အစိုးရကို အတည်မငြိမ်ဖြစ်စေရန် ပူးပေါင်းကြံစည်ခြင်းဖြစ်သည်ဟု ပြောကြားခဲ့သည်။

ယမန်နေ့က နိုင်ငံပိုင်မီဒီယာမှနေ၍ မာဒူရို မိန့်ခွန်းပြောကြားနေစဉ် ဖြစ်ပွားခဲ့ခြင်းဖြစ်ပြီး ရဟတ်ယာဉ်ပေါ်မှ လက်ပစ်ဗုံးနှစ်လုံး ပစ်ချခဲ့ကာ တစ်လုံးမှာ မပေါက်ကွဲခဲ့ဘဲ ဗင်နီဇွဲလား အထူးတပ်ဖွဲ့က အဆိုပါ ရဟတ်ယာဉ်ကို မောင်းထုတ်နိုင်ခဲ့သည်ဟုလည်း သမ္မတက ဆိုသည်။

“ငြိမ်းချမ်းရေးကို ကာကွယ်ဖို့အတွက် လက်နက်ကိုင်တပ်ဖွဲ့တွေအားလုံးကို အသင့်ပြင်ခိုင်းထားပါတယ်”

သို့သော်လည်း အတိုက်အခံများကမူ ထိုအဖြစ်အပျက်မှာ အကြောက်တရားပြန့်နှံစေရန်နှင့် အခြေခံဥပဒေ ပြန်လည်ရေးဆွဲရေး မာဒူရို၏ အစီအစဉ်အား ကန့်ကွက်ကြသူများကို နှိမ်နှင်းမှုမှာ တရားမျှတသယောင် ဖြစ်စေရန် သမ္မတကိုယ်တိုင်က ကြံစည်ခြင်းဖြစ်သည်ဟု ဆိုရှယ်မီဒီယာများမှတစ်ဆင့် စွပ်စွဲပြောကြားခဲ့သည်။

ရဟတ်ယာဉ်ပေါ်မှ လက်ပစ်ဗုံးဖြင့် တိုက်ခိုက်မှုအတွက် မည်သည့် ထိခိုက်ဒဏ်ရာရရှိမှု သတင်းမှ ပေါ်ထွက်မလာသေးဘဲ၊ AP သတင်းဌာနမှ သတင်းထောက်ကမူ ရဟတ်ယာဉ်တစ်စင်းမှာ မြို့လယ်ကောင်တွင် ပျံဝဲနေကာ သေနတ်သံများလည်း ကြားရကြောင်း၊ သို့သော်လည်း အဆိုပါပစ်ခတ်မှုမှာ ရဟတ်ယာဉ်မှ ပြုလုပ်ခြင်းလားဆိုသည်ကို ရှင်းရှင်းလင်းလင်း မသိရသေးကြောင်း ပြောကြားခဲ့သည်။

မာဒူရိုမှာ ပြည်သူများ၏ ဆန့်ကျင်ဆန္ဒပြမှုများ၊ အစိုးရအဖွဲ့အတွင်း ၎င်းနှင့် သဘောထားမတူများ၏ ပြစ်တင်ရှုတ်ချမှုများကို ပြီးခဲ့သည့်လများအတွင်း ဆက်တိုက် ရင်ဆိုင်ခဲ့ရသည်။

အစိုးရဆန့်ကျင်ရေး ပိုစတာကို ချိတ်ဆွဲထားသည့် အပြာရောင် ရဟတ်ယာဉ်တစ်စင်း၏ ဓာတ်ပုံ၊ မာဒူရို၏ အာဏာရှင်အုပ်စုကို သူပုန်ထရန် ရဲတပ်ဖွဲ့ ရဟတ်ယာဉ်ပိုက်လော့ အော်စကာပီရက်ဇ်ဆိုသူက တိုက်တွန်းဆော်သြမှု ဗီဒီယိုတစ်ခုတို့မှာလည်း ဆိုရှယ်မီဒီယာများတွင် ပြန့်နှံ့နေသည်။

Ref: Aljazeera