သြစတေးလျကိုရှုံးသည့် မြန်မာ ယူ၂၃ အသင်း နောက်တစ်ဆင့်တက်ရေး မသေချာသေး

ဇူလိုင် ၂၃၊ ၂၀၁၇
M-Media

Photo Credit – MFF

– ဒီနေ့ညနေမှာ ကစားခဲ့တဲ့ ယူ ၂၃ အာရှချန်ပီယံရှစ် ခြေစစ်ပွဲ အုပ်စု F နောက်ဆုံးပွဲစဉ်မှာ မြန်မာအသင်းက သြစတေးလျကို ၃ ဂိုးပြတ်နဲ့ရှုံးနိမ့်ခဲ့ပြီး အုပ်စု ဒုတိယနေရာနဲ့ ကျေနပ်ခဲ့ရကာ နောက်တစ်ဆင့်တက်ရေး မသေချာသေးပါဘူး။

ခံစစ်အထိုင်ချပြီး တန်ပြန်တိုက်စစ်ကနေထိုးဖောက်ဖို့ကြိုးစားခဲ့တဲ့ မြန်မာအသင်းဟာ ၆ မိနစ်မှာပဲ အဖွင့်ဂိုးပေးခဲ့ရပြီး ၃၂ မိနစ်မှာ ဒုတိယဂိုး ထပ်ပေးခဲ့ရပါတယ်။

ဒုတိယပိုင်းမှာ မြန်မာအသင်းက သြတေးလျဖက်ကို ပိုထိုးဖောက်နိုင်ခဲ့ပြီး ဂိုးသမားမရှိတဲ့ ဂိုးပေါက်ထဲကို ကွင်းလယ်တစ်ဝက်ကျော်ကျော်က မောင်မောင်လွင်ရဲ့ကန်ချက် ဘေးထွက်သွားတာ၊ အောင်သူ ဂိုးသမားဆီကလုပြီး အပိုင်ကန်သွင်းချက် ဂိုးစည်းပေါ်ရောက်မှ သြစတေးလျနောက်ခံလူရဲ့ ဖြတ်ထုတ်မှုကို ခံခဲ့ရတာကြောင့် ဂိုးရမယ့် အခွင့်အရေးတွေကို လက်လွှတ်ခဲ့ရပါတယ်။

သြစတေးလျအတွက် တတိယဂိုးကိုတော့ တန်ပြန်တိုက်စစ်ကနေတစ်ဆင့် ၅၈ မိနစ်မှာ ရရှိခဲ့တာဖြစ်ပါတယ်။

မြန်မာအသင်းဟာ ဒီပွဲအရှုံးကြောင့် ၂ ပွဲနိုင် ၆ မှတ်နဲ့ ဒုတိယနေရာမှာ ရှိနေပြီး အုပ်စု ၃ ပွဲစလုံးနိုင်ထားတဲ့ သြစတေးလျက အုပ်စုပထမနဲ့ နောက်တစ်ဆင့်ကို တက်သွားပါတယ်။

ခြေစစ်ပွဲ အုပ်စု ၁၀ ခုမှာ အုပ်စုပထမရတဲ့ ၁၀ သင်းဟာ ခြေစစ်ပွဲအောင်မှာဖြစ်ပြီး အကောင်းဆုံး ဒုတိယ ၅ သင်းက အိမ်ရှင် တရုတ်အသင်းနဲ့အတူ နောက်တစ်ဆင့်ကို တက်ရောက်ခွင့်ရမှာ ဖြစ်တာကြောင့် မြန်မာအသင်းဟာ အကောင်းဆုံးဒုတိယ ၅ သင်းမှာ ပါဝင်မလားဆိုတာ စောင့်ကြည့်ရမှာ ဖြစ်ပါတယ်။

စင်ကာပူနဲ့ ဘရူးနိုင်တို့ပွဲမှာတော့ စင်ကာပူက ၄ ဂိုး ၁ ဂိုးနဲ့ အနိုင်ရခဲ့ပါတယ်။