နေးမာအတွက် ကမ္ဘာ့စံချိန်တင်ဈေးဖြင့် ပီအက်စ်ဂျီ၏ကမ်းလှမ်းမှု FFP စည်းမျဉ်းနှင့် ညိဖွယ်ရှိနေ

ဇူလိုင် ၃၁၊ ၂၀၁၇
M-Media

– တိုက်စစ်မှူးနေးမာအတွက် ပီအက်စ်ဂျီအသင်းက ကမ္ဘာ့စိန်ချိန်တင် ပြောင်းရွှေ့ကြေးဖြင့် ကမ်းလှမ်းထားမှုမှာ Financial Fair Play (FFP) စည်းမျဉ်းနှင့် ညိစွန်းခြင်း ရှိ၊ မရှိကို ဘာစီလိုနာက ဆန်းစစ်ရဖွယ် ရှိနေသည်။

အသက် ၂၅ နှစ်အရွယ် နေးမာအနေအဖြင့် ပီအက်စ်ဂျီအသင်းသို့ ရောက်ရှိရန်မှာ သေချာနေပြီး ယခုတစ်ပတ်တွင် ကာတာ၌ ဆေးစစ်မှုပြုလုပ်မည်ဟု သတင်းများ ထွက်ပေါ်နေသည်။ ဘာစီလိုနာအသင်းဥက္ကဌ ဂျိုးဆက်ပ် မာရီယာ ဘာတိုမြူက နေးမာမှာ အသင်းတွင် ဆက်ရှိလိမ့်မယ်ဟု ပြောကြားထားသည်။

ပီအက်စ်ဂျီအသင်းမှာ နေးမာအား ခေါ်ယူရန်အတွက် ဘာစီလိုနာအား လျော်ကြေးအပါအ၀င် စတာလင်ပေါင် ၁၉၈ သန်း (ယူရို ၂၂၂ သန်း) ပေးချေရန် ရှိနေပြီး ထိုပမာဏက ယူအီးအက်ဖ်အေ၏ ငွေကြေး မျှတစွာသုံးစွဲရမည့် စည်းမျဉ်း Financial Fair Play နှင့် ညိစွန်းခြင်း ရှိ၊ မရှိကို ဘာစီလိုနာက ယူအီးအက်ဖ်အေထံ မေးမြန်းရဖွယ် ရှိနေသည်။

ဥရောပကလပ်များအနေဖြင့် ၎င်းတို့ရရှိသည့် ၀င်ငွေထက် ပို၍ သုံးစွဲခြင်းမပြုရန် ကန့်သတ်သည့် အဆိုပါ စည်းမျဉ်းကို ၂၀၁၁-၁၂ ဘောလုံးရာသီတွင် စတင်ကျင့်သုံးခဲ့ပြီး ပီအက်စ်ဂျီအသင်းမှာ Financial Fair Play စည်းမျဉ်းကို ချီုးဖောက်မှုကြောင့် ၂၀၁၄ ခုနှစ်တွင် အပြစ်ပေးခံခဲ့ရသည်။

Ref: BBC