Facebook
စက်တင်ဘာ ၂၅၊ ၂၀၁၇
M-Media
– သြဂုတ်လ ၂၅ ရက်နေ့က ရခိုင်ပြည်နယ်မြောက်ပိုင်းမှာ ရဲကင်းစခန်းတွေ တိုက်ခိုက်ခံရမှုကို မိမိတို့အနေနဲ့ ရှုတ်ချပြီး မတည်ငြိမ်မှုတွေကြောင့် ထိခိုက်ခံစားရတဲ့ လူ့အဖွဲ့အစည်းအားလုံးအတွက် ၀မ်းနည်းကြေကွဲရတယ်လို့ အာဆီယံဥက္ကဌက ကြေငြာချက် ထုတ်ပြန်လိုက်ပါတယ်။
အာဆီယံနိုင်ငံက နိုင်ငံခြားရေးဝန်ကြီးတွေ တွေ့ဆုံဆွေးနွေးပြီနောက်ပိုင်းမှာ ထုတ်ပြန်တဲ့ ဒီကြေငြာချက်မှာ ရခိုင်ပြည်နယ်ကိစ္စဟာ သမိုင်းကြောင်းဆိုင်ရာ နက်ရှိုင်းမှုနဲ့အတူ လူ့အဖွဲ့အစည်းတွေအကြား ရှုပ်ထွေးတဲ့ ကိစ္စတစ်ခုဖြစ်တယ်ဆိုတာကို မိမိတို့အနေနဲ့ အသိအမှတ်ပြုတယ်လို့လည်း ဖော်ပြထားပါတယ်။
ပြည်သူတွေရဲ့ အသက်၊ အိုးအိမ်၊ စည်းစိမ်း ပျက်ဆီးစေတဲ့၊ ထောင်သောင်းချီ အိုးအိမ်စွန့်ခွာ ထွက်ပြေးရတဲ့ အကြမ်းဖက်လုပ်ရပ်အားလုံးကို ရှုတ်ချကြောင်း၊ အခြေအနေ ပိုမိုဆိုးရွားစေမယ့် လုပ်ရပ်တွေကို ဒီအဖြစ်အပျက်မှာ ပါဝင်သူတွေအနေနဲ့ ရှောင်ရှားဖို့ တိုက်တွန်းပါကြောင်း၊ မြန်မာနဲ့ ဘင်္ဂလားဒေ့ရ်ှအကြား နီးနီးကပ်ကပ် ဆွေးနွေးမှုအပါအ၀င် ရေရှည်ခံမယ့် အဖြေတွေကို ရှာဖွေရမယ်ဆိုတာ မိမိတို့ သဘောတူကြောင်း၊ ဒါမှသာ ထိခိုက်ခံစားရတဲ့ လူ့အဖွဲ့အစည်းတွေအားလုံး ပြန်လည် ထူထောင်နိုင်မှာဖြစ်ကြောင်း ကြေငြာချက်က ဆိုပါတယ်။
အရပ်သားတွေ အန္တရာယ်ကင်းဖို့၊ ရခိုင်ပြည်နယ်မှာ အကြမ်းဖက်မှုတွေ ချက်ခြင်းရပ်တန့်ဖို့၊ လူမှုစီးပွား အခြေအနေတွေကို ပြန်လည်ဖော်ဆောင်ဖို့၊ နိုင်ငံသားစီစစ်ရေးလုပ်ငန်းကတစ်ဆင့် ဒုက္ခသည်ပြဿနာကို ဖြေရှင်းဖို့ မြန်မာအာဏာပိုင်တွေရဲ့ အားထုတ်ကြိုးပမ်းမှုကို ကြိုဆိုတယ်လို့ နိုင်ငံခြားရေးဝန်ကြီးတွေက ပြောကြားခဲ့ပါတယ်။
ထိခိုက်ခံစားရသူအားလုံးကို ခွဲခြားဆက်ဆံမှုမရှိဘဲ လူသားချင်း စာနာထောက်ထားမှုဆိုင်ရာ အာဆီယံ ပူးပေါင်းဆောင်ရွက်ရေးစင်တာ (AHA Centre) ကနေတစ်ဆင့် အကူအညီတွေ ပေးအပ်သွားမှာဖြစ်ပြီး မြန်မာအစိုးရရဲ့ ငြိမ်းချမ်းရေး၊ တည်ငြိမ်အေးချမ်းရေး၊ တရားဥပဒေစိုးမိုးရေး၊ သဟာဇာတဖြစ်ရေး၊ ပြန်လည်ရင်ကြားစေ့ရေး လုပ်ငန်းတွေမှာ ပါဝင်ကူညီပေးသွားမယ်လို့လည်း အာဆီယံ ဥက္ကဌရဲ့ ကြေငြာချက်မှာ ဖော်ပြထားပါတယ်။
မစ္စတာ ကိုဖီအန်နန်ဦးဆောင်တဲ့ ရခုိုင်အကြံပေးကော်မရှင်က အကြံပြုချက်တွေကို ဆက်လက်အကောင်အထည်ဖော်သွားဖို့ အာဆီယံ နိုင်ငံခြားရေးဝန်ကြီးတွေက မြန်မာအစိုးရကို တိုက်တွန်းခဲ့ပြီး၊ ဒါတွေကို အကောင်အထည်ဖော်ဖို့ ၀န်ကြီးအဆင့် ကော်မတီတစ်ခု ဖွဲ့စည်းထားမှုကိုလည်း ကြိုဆိုခဲ့ကြပါတယ်။
Ref: Asean.org
M-Media on Twitter
M-Media Tube
Comments