ရခိုင်အရေး အနီးကပ်စောင့်ကြည့်နေပြီး အကူအညီများ ပေးပို့မည်ဟု ထိုင်းပြော

အောက်တိုဘာ ၁၊ ၂၀၁၇
M-Media

ရခိုင်ပြည်နယ် မတည်ငြိမ်မှုကြောင့် ထွက်ပြေးလာရသူများ

– ရခိုင်ပြည်နယ်က အခြေအနေတွေကို အနီးကပ်စောင့်ကြည့်နေပြီး မြန်မာအစိုးရနဲ့ ဘင်္ဂလားဒေ့ရ်ှအစိုးရတွေကို အကူအညီပေးသွားမယ်လို့ ထိုင်းနိုင်ငံခြားရေးဝန်ကြီးဌာနက မနေ့မှာ ထုတ်ပြန်တဲ့ ကြေငြာချက်မှာ ဖော်ပြထားပါတယ်။

မြန်မာနိုင်ငံတဲ့ပတ်သက်လို့ ရှားရှားပါးပါးထုတ်ပြန်တဲ့ ကြေငြာချက်ဖြစ်ပြီး ဒီကိစ္စတွေအတွက် စိုးရိမ်မိတယ်လို့လည်း နိုင်ငံခြားရေး ၀န်ကြီးဌာနက ပြောကြားခဲ့ပါတယ်။

သြဂုတ်လ ၂၅ ရက်နေ့မှာ ရိုဟင်ဂျာလက်နက်ကိုင်အဖွဲ့က ရခိုင်ပြည်နယ်မြောက်ပိုင်းမှာရှိတဲ့ ရဲကင်းစခန်း ၃၀ လောက်ကို တိုက်ခိုက်ခဲ့ပြီးတဲ့နောက်ပိုင်း တစ်ကျော့ပြန်ဖြစ်လာတဲ့ ရခိုင်ပြည်နယ် မတည်ငြိမ်မှုတွေမှာ ရိုဟင်ဂျာ ၄ သိန်းကျော်လောက် ဘင်္ဂလားဒေ့ရ်ှနိုင်ငံဖက်ကို ထွက်ပြေးခဲ့ရပါတယ်။

မြန်မာလုံခြုံရေးတပ်ဖွဲ့တွေဟာ ရိုဟင်ဂျာအရပ်သားတွေကို သတ်ဖြတ်မှု၊ အဓမ္မကျင့်မှု၊ နေအိမ် မီးရှို့မှုတွေ ရှိနေတယ်လို့ သတင်းတွေထွက်နေပြီး ကုလ တာဝန်ရှိသူတွေက ‘လူမျိုးစုလိုက် သုတ်သင်မှု’ လို့တောင် စွပ်စွဲထားကြပါတယ်။ ဒါပေမယ့် မြန်မာအစိုးရနဲ့ စစ်တပ်ကတော့ ဒီစွပ်စွဲချက်တွေ အားလုံးကို ပယ်ချထားပါတယ်။

“ထိုင်းနိုင်ငံဟာ ရခိုင်ပြည်နယ်က အခြေအနေကို စိုးရိမ်မှုနဲ့ အနီးကပ်စောင့်ကြည့်နေပါတယ်။ တော်ဝင် ထိုင်းအစိုးရဟာ မြန်မာနိုင်ငံက အိုးအိမ်စွန့်ခွာ ထွက်ပြေးရသူတွေကို ကာကွယ်စောင့်ရှောက်ရေး အမြဲတမ်း အရေးတယူ ဆောင်ရွက်ခဲ့ပါတယ်” လို့ ထိုင်း-မြန်မာ နယ်စပ်တစ်လျှောက် မြန်မာနိုင်ငံသား တစ်သိန်းလောက် စခန်း ၉ ခုမှာ နေထိုင်မှုကို ရည်ညွှန်းပြီး ၀န်ကြီးဌာနရဲ့ ကြေငြာချက်မှာ ဖော်ပြထားပါတယ်။

ရခိုင်ပြည်နယ်က မတည်ငြိမ်မှုတွေနဲ့ပတ်သက်ပြီး ထိုင်းနိုင်ငံရဲ့ ရပ်တည်ချက်အပေါ် လူ့အခွင့်အရေး အဖွဲ့တွေက မေးခွန်ထုတ်လာမှုကို တုန့်ပြန်တဲ့အနေနဲ့ ဒီလို ကြေငြာချက် ထုတ်ပြန်ရတာဖြစ်တယ်လို့လည်း နိုင်ငံခြားရေးဝန်ကြီးဌာနက ပြောကြားခဲ့ပါတယ်။

အပြစ်မဲ့အရပ်သားတွေ သေဆုံးရတဲ့ ရခိုင်ပြည်နယ်က အကြမ်းဖက်မှုအားလုံးကို ရှုတ်ချတယ်လို့ အာဆီယံ နိုင်ငံခြားရေးဝန်ကြီးတွေရဲ့ ပြီးခဲ့တဲ့တစ်ပတ်က ကြေငြာချက်ကို ထိုင်းနိုင်ငံကလည်း ထောက်ခံထားပါတယ်။

ရခိုင်ပြည်နယ်က မတည်ငြိမ်မှု နောက်ဆက်တွဲကြောင့် ထိုင်းနိုင်ငံကို ရောက်လာတဲ့ ဒုက္ခသည်တွေ မရှိသေးဘူးလို့ မနေ့က ကြေငြာချက်မှာ ထည့်သွင်း ဖော်ပြခဲ့ပါတယ်။

Ref: Reuters