ပါကစ္စတန်မှ အသက် ၁၇ နှစ်အရွယ်လူငယ် ရူပဗေဒနယ်ပယ်တွင် သမိုင်းသစ်ရေးထိုး

အောက်တိုဘာ ၉၊ ၂၀၁၇
M-Media

– ပါကစ္စတန်က အသက် ၁၇ နှစ်အရွယ် လူငယ်လေးတစ်ဦးဟာ ရူပဗေဒနယ်ပယ်က ‘လျှပ်စစ်ပျားသလပ်’ (electric honeycomb) အယူအဆကို ပထမဆုံး လက်တွေ့ဖော်ထုတ်ပြသနိုင်ခဲ့ပြီး သိပ္ပံပညာရှင်တစ်ဦးအဖြစ် စာရင်းဝင်ခဲ့တယ်လို့ သိရပါတယ်။

မိုဟာမက် ရှာဟီရ် နီယာဇီဆိုတဲ့ အဲဒီလူငယ်လေးဟာ ပါကစ္စတန်နိုင်ငံ လာဟိုးမြို့က အထက်တန်းကျောင်းသားတစ်ယောက် ဖြစ်ပါတယ်။

အဆီလွှာထဲမှာ တစ်ဖက်က electrode အချွန်၊ နောက်တစ်ဖက် electrode အပြားကို ထည့်ပြီး လျှပ်စစ်လွှတ်မယ်ဆိုရင် ဆီမျက်နှာပြင်မှာ မတည်မငြိမ်ဖြစ်ပြီး ပျားသလပ်လို လှပတဲ့ အကွက်လေးတွေ ဖြစ်လာတယ်ဆိုတဲ့ အယူအဆဟာ ရူပဗေဒနယ်ပယ်မှာ ဆယ်စုနှစ်နဲ့ချီ ရှိခဲ့တာပါ။

ရှာဟီရ်ဟာ ဒီလို လျှပ်စစ်ပျားသလပ်ဖြစ်စေတဲ့ အိုင်းယွန်းတွေလှုပ်ရှားမှုကို လက်တွေ့ ဖော်ထုတ်ကာ ဓာတ်ပုံရိုက်ယူနိုင်ခဲ့ပြီး၊ ဆီမျက်နှာပြင်ပေါ်မှာ ဖြစ်ပေါ်လာတဲ့ အပူတွေကိုလည်း မှတ်တမ်းတင်နိုင်ခဲ့ပါတယ်။ ဒီလိုဆောင်ရွက်မှုမျိုးကို ရူပဗေဒနယ်ပယ်မှာ သူက ပထမဆုံး လုပ်နိုင်တာ ဖြစ်ပါတယ်။

ပြီးခဲ့တဲ့နှစ် ရုရှားနိုင်ငံမှာ ကျင်းပခဲ့တဲ့ ‘နိုင်ငံတကာ လူငယ် ရူပဗေဒရှင်များ ပြိုင်ပွဲ’ မှာ သူငယ်ချင်း ၄ ယောက်နဲ့အတူ ပါကစ္စတန်ကိုယ်စားပြု ပထမဆုံး ၀င်ရောက်ယှဉ်ပြိုင်စဉ် ‘လျှပ်စစ်ပျားသလပ်’ (electric honeycomb) အယူအဆပေါ် စိတ်ဝင်စားခဲ့တာ ဖြစ်တယ်လို့ ရှာဟီရ်က ဆိုပါတယ်။

တစ်နှစ်ကြာ သုတေသနပြုလုပ်ပြီးတဲ့အခါမှာတော့ သူ့ရဲ့ ဖော်ထုတ်နိုင်မှုကို ရှာဟီက သြဇာကြီးတဲ့ Royal Society Open Science သိပ္ပံဂျာနယ်ကို ပေးပို့ခဲ့ပြီး ၁၇ နှစ်မပြည့်ခင် ရက်ပိုင်းအလို ပြီးခဲ့တဲ့လမှာ သူ့ရဲ့ သုတေသနကို လက်ခံကြောင်း အကြောင်းပြန်စာ ရရှိခဲ့ပါတယ်။

ရှာဟီရ်ရဲ့ ဒီတွေ့ရှိမှုကနေ ဇီဝဆေးဝါးနဲ့ ပုံနှိပ်လုပ်ငန်းမှာ အသုံးပြုနိုင်မယ့် နည်းပညာတွေ ပေါ်ထွက်လာဖို့အတွက် အင်ဂျင်နီယာတွေက အသုံးပြုနိုင်မှာ ဖြစ်ပါတယ်။

ရှာဟီရ်ဟာ ငယ်ငယ်ကတည်းက စူးစမ်းလေ့လာမှုကို ၀ါသနာထုံခဲ့ပြီး အသက် ၁၁ နှစ်အရွယ်မှာပဲ အွန်လိုင်းက ရူပဗေဒ သင်ကြားပို့ချမှုတွေကိုလေ့လာခဲ့ကာ ရည်မှန်းချက် မြင့်မြင့်မားမားထားသူလည်း ဖြစ်ပါတယ်။

“ပါကစ္စတန်အတွက် နောက်ထပ် နိုင်ဘယ်ဆုရှင်တစ်ဦး ကျွန်တော် ဖြစ်ချင်ပါတယ်။ အိုက်ဇက် နယူတန်ဟာ အသက် ၁၇ နှစ်မှာ သူ့ရဲ့ ပထမဆုံး စာတမ်းကို ပုံနှိပ်ခဲ့ပါတယ်။ ကျွန်တော်က အသက် ၁၆ နှစ်မှာ သိပ္ပံဆိုရာ အသိအမှတ်ပြုစာ ရရှိခဲ့ပါတယ်” လို့ ရှာဟီရ်က ပြောကြားခဲ့ပါတယ်။

Ref: BBC