ဂျပန်တွင် F-35 တိုက်လေယာဉ်များ အမေရိကန်ချထားမည်

အောက်တိုဘာ ၂၅၊ ၂၀၁၇
M-Media

– ကိုရီးယားကျွန်းဆွယ် တင်းမာမှုများ မြင့်တက်နေသည့်အချိန်တွင် အမေရိကန်လေတပ်က လာမည့်ရက်အနည်းငယ်အတွင်း ဂျပန်သို့ F-35 Lightning II တိုက်လေယာဉ်များ ပေးပို့ရန် စီစဉ်နေသည်ဟု သိရသည်။

တိုက်လေယာဉ်များမှာ အိုကီနာဝါကျွန်းရှိ အမေရိကန်လေတပ်အခြေစိုက်စခန်းသို့ ရောက်ရှိမည်ဟု ပစိဖိတ်လေတပ် (PAF) က တနင်္လာနေ့တွင် ကြေငြာခဲ့သည်။

လေယာဉ်များနှင့်အတူ လေယာဉ်မှူးများ၊ အင်ဂျင်နီယာများနှင့် အခြား သက်ဆိုင်သူ စစ်သား ၃၀၀ ကျော်လည်း ပါဝင်လာမည်ဖြစ်ပြီး ဂျပန်တွင် ၆ လတာ တပ်စွဲမည်ဖြစ်သည်။

ပြီးခဲ့သည့်တစ်ပတ် တောင်ကိုရီးယားနိုင်ငံ ဆိုးလ်မြို့တွင် ပြုလုပ်သော နိုင်ငံတကာလေကြောင်းအာကာသနှင့် ကာကွယ်ရေးပြပွဲ၌ F-35A တိုက်လေယာဉ်များကို ထုတ်ဖော်ပြသပြီးနောက် အာရှဒေသတွင် အဆိုပါလေယာဉ်များ ချထားတော့မည်ဟု သတင်းများထွက်ပေါ်ခဲ့သည်။

လေတပ်ဝန်ကြီးဟောင်း ဒီဘိုရာ လီ ဂျိမ်းစ်က ဖေဖော်ဝါရီလ ရာထူးမှ အနားမယူမီတွင် အမေရိကန်လေတပ်အနေဖြင့် ၂၀၁၇ ခုနှစ် အကုန်တွင် F-35 တိုက်လေယာဉ်များကို အာရှတွင် နှစ်နေရာခွဲ၍ ချထားမည်ဟု အရိပ်အမြွက်ပြောကြားခဲ့သည်။

F-35 တိုက်လေယာဉ်များကို အမေရိကန်က ဥရောပတွင် ပထမဆုံးချထားခဲ့သည်။

အမေရိကန် ရေတပ်တွင် ပြေးလမ်းတိုများတွင် အတက်အဆင်း လုပ်ဆောင်နိုင်သည့် F35B တိုက်လေယာဉ်များ ပိုင်ဆိုင်ထားပြီး ဇန်န၀ါရီလမှစ၍ ဂျပန်နိုင်ငံ အီဝါကူနီကျွန်းရှိ အမေရိကန်စစ်စခန်းတွင် တပ်ဖြန့်ထားသည်။

Ref : Press TV