ဇင်ဘာဘွေ စစ်အာဏာသိမ်းမှုပြဿနာကို ဒေသတွင်းနိုင်ငံများ ကူညီဖြေရှင်းမည်

နိုဝင်ဘာ ၁၆၊ ၂၀၁၇
M-Media

မြို့တော် ဟာရာရီရှိ လမ်းမတွင် နေရာယူထားသည့် ဇင်ဘာဘွေစစ်သားများ

– ဇင်ဘာဘွေတွင် စစ်တပ်က သမ္မတ ရောဘတ်မူဂါဘီကို ဖမ်းဆီးကာ တိုင်းပြည်အား ချုပ်ကိုင်မှုကိစ္စနှင့် ပတ်သက်၍ ပတ်ဝန်းကျင်နိုင်ငံများက ဖြေရှင်းရန် ကြိုးစားနေကြသည်ဟု သိရသည်။

အင်္ဂါနေ့တွင် ဇင်ဘာဘွေစစ်တပ်မှာ နိုင်ငံပိုင်အသံလွှင့်ဌာနနှင့် အစိုးရရုံးများကို သိမ်းပိုက်လိုက်ပြီး သမ္မတ ရောဘတ်မူဂါဘီနှင့် မိသားစုကိုလည်း နေအိမ်အကျယ်ချုပ် ချထားလိုက်သည်။ ထိုအဖြစ်အပျက်မှာ အာဏာသိမ်းသည့်ပုံစံ ဖြစ်နေသော်လည်း စစ်တပ်ပြောရေးဆိုခွင့်ရှိသူက မိမိတို့မှာ အာဏာသိမ်းခြင်းမဟုတ်ဟု ငြင်းဆိုခဲ့သည်။

ထိုကဲ့သို့ နိုင်ငံရေးမတည်မငြိမ်ဖြစ်မှု ပြေလည်ရန်အတွက် နိုင်ငံအတွင်း အစိုးရတာဝန်ရှိသူ ၂ ဦးနှင့် ကသလစ်ဘုန်းတော်ကြီးတစ်ဦး ပါဝင်သော အဖွဲ့မှာ ဆွေးနွေးနေကြသည်ဟု သတင်းများ ထွက်ပေါ်လာခဲ့သည်။

အာဖရိကတောင်ပိုင်း ဖွံ့ဖြိုးရေးအဖွဲ့ (SADC) ကလည်း အဖွဲ့ဌာနချုပ်ရှိရာ ဘော့စ်ဝါနာတွင် ဇင်ဘာဘွေပြဿနာအတွက် ဆွေးနွေးရန် စီစဉ်ထားသည်။

SADC ၏ လက်ရှိဥက္ကဌမှာ တောင်အာဖရိကဖြစ်ပြီး သမ္မတ ဂျာကော့ဘ်ဇူးမားက ကာကွယ်ရေးဝန်ကြီးနှင့် လုံခြုံရေးဝန်ကြီးတို့အား အစည်းအဝေးအတွက် စေလွှတ်မည်ဖြစ်ကာ မူဂါဘီ၊ စစ်တပ်မှ ဗိုလ်ချုပ်များနှင့် ယနေ့တွင် တွေ့ဆုံဆွေးနွေးဖွယ် ရှိနေသည်။

Ref: Aljazeera