အရှေ့တောင်အာရှကို အိမ်အကူလုပ်သား ပြန်ပို့ရန် မြန်မာစီစဉ်နေ

ဒီဇင်ဘာ ၁၂၊ ၂၀၁၇
M-Media

စင်ကာပူနိုင်ငံမှ မြင်ကွင်းတစ်ခု

– မြန်မာအမျိုးသမီးတွေ အရှေ့တောင်အာရှ နိုင်ငံတွေမှာ အိမ်အကူအဖြစ် တရားဝင် အလုပ်လုပ်နိုင်ရေး သဘောတူညီချက်ရဖို့အတွက် ဆောင်ရွက်နေတယ်လို့ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အား ဦးစီးဌာနရဲ့ တာဝန်ရှိသူတစ်ဦးက ပြောကြားလိုက်ပါတယ်။

ဈေးသက်သာတဲ့ အိမ်အကူလုပ်သားတွေ လိုအပ်နေတဲ့ ဟောင်ကောင်၊ စင်ကာပူနဲ့ ထိုင်းနိုင်ငံတွေကို ပို့ဆောင်နိုင်ဖို့ မြန်မာနိုင်ငံက ပစ်မှတ်ထား ဆောင်ရွက်နေတာပါ။

“ဒီနိုင်ငံတွေနဲ့ နားလည်မှုစာချွန်လွှာတွေ လက်မှတ်ရေးထိုးရေးအတွက် ကျွန်တော်တို့ ကြိုးစားနေပါတယ်။ စင်ကာပူ၊ မလေးရှား၊ ထိုင်း၊ ဟောင်ကောင်၊ ထိုင်ဝမ်တို့နဲ့ ဒီကိစ္စ ပြောဆိုဆွေးနွေးနေတာ ကြာမြင့်ပြီဖြစ်ပေမယ့် ဒီတစ်ခါမှာတော့ ပိုပြီးတော့ ပြည့်စုံမှာပါ” လို့ ၀န်ကြီးဌာနက စက်ရုံနှင့် အထွေထွေအလုပ်သမားဥပဒေ
ကြီးကြပ်ရေးဌာနက ညွှန်ကြားရေးမှူး ဦးဝင်းရှိန်က ပြောကြားခဲ့ပါတယ်။

မြန်မာနိုင်ငံက ၅၃.၆ သန်းသော ပြည်သူတွေရဲ့ ၅ ရာခိုင်နှုန်းကျော်ကျော်ဟာ စင်ကာပူ၊ မလေးရှား၊ ထိုင်းနဲ့ အရှေ့အလယ်ပိုင်းနိုင်ငံတွေမှာ အလုပ်လုပ်ကိုင်နေရတယ်လို့ အစိုးရရဲ့ စာရင်းဇယားအရ သိရပြီး အများစုက ငါးဖမ်းလုပ်ငန်း၊ စိုက်ပျိုးရေးနဲ့ အမျိုးသမီးတွေက အိမ်အကူလုပ်ငန်းတွေမှာ ဖြစ်ပါတယ်။

ရွှေ့ပြောင်းလုပ်သားတွေကို ကာကွယ်ပေးရေး၊ သူတို့ရဲ့အခွင့်အရေးကို မြှင့်တင်ပေးရေး သဘောတူညီချက်တစ်ခုကို အာဆီယံနိုင်ငံတွေက နိုဝင်ဘာ ၁၄ ရက်နေ့မှာ လက်မှတ်ရေးထိုးခဲ့ပြီး ရွှေ့ပြောင်းလုပ်သားတွေကို နိုင်ငံသားတွေအတိုင်း အကာအကွယ်ပေးဖို့ အဲဒီသဘောတူညီချက်မှာ အာမခံထားပါတယ်။

ဦးဝင်းရှိန်ကတော့ မြန်မာအလုပ်သမားတွေဟာ ဥပဒေကပေးထားတဲ့ အခွင့်အရေးအတိုင်း အကာအကွယ်ရဖို့လိုတယ်လို့ ပြောကြားခဲ့ပါတယ်။

မြန်မာနိုင်ငံဟာ ၂၀၁၃ ခုနှစ်မှာ စင်ကာပူ၊ ၂၀၁၄ ခုနှစ်မှာ ဟောင်ကောင်တို့ကို အိမ်အကူလုပ်သားတွေ စတင်စေလွှတ်ခဲ့ပေမယ့် ပြဿနာတွေ၊ အခွင့်အရေးချိုးဖောက်မှုတွေကြောင့် ၂၀၁၄ ခုနှစ် စက်တင်ဘာမှာ ဒီအစီအစဉ်ကို ရပ်တန့်ခဲ့ရပါတယ်။

Ref: VOA