ဆဲလ်ဖုန်းနှင့် ထိတွေ့မှုအတွက် ကျန်းမာရေးသတိပေးချက် ကန်ပြည်နယ်တစ်ခု ထုတ်ပြန်

ဒီဇင်ဘာ ၁၆၊ ၂၀၁၇
M-Media

– အမေရိကန်ပြည်ထောင်စု ကယ်လီဖိုးနီးယားပြည်နယ် ပြည်သူ့ကျန်းမာရေးဌာနက ဆဲလ်ဖုန်းတွေ ထိတွေ့ကိုင်တွယ်မှုနဲ့ပတ်သက်ပြီး လမ်းညွှန်ချက်တွေ ထုတ်ပြန်လိုက်ပြီး ဆဲလ်ဖုန်းတွေကို ထိတွေ့မှုကြောင့် ကင်ဆာဖြစ်နိုင်ချေ၊ မျိုးဆက်ပွားနိုင်စွမ်း ဆုံးရှုံးအန္တရာယ် ရှိတယ်လို့လည်း သတိပေးခဲ့ပါတယ်။

မိုဘိုင်းဖုန်းတွေက ထွက်တဲ့ ရေဒီယိုလှိုင်းတွေကို ကာလရှည် ထိတွေ့မှုနဲ့ ကင်ဆာရောဂါ ဆက်စပ်ပတ်သက်မှုအတွက် လေ့လာမှုရလဒ်ကို ကယ်လီဖိုးနီးယား Berkeley တက္ကသိုလ်က သုတေသနပညာရှင် ဂျိုးလ် မော့စ်ကိုဝစ်ဇ်က ပြီးခဲ့တဲ့နှစ်မှာ တွေ့ခဲ့ပြီးနောက်ပိုင်း ဒီကိစ္စနဲ့ပတ်သက်လို့ လူတွေကို ထုတ်ပြန်အသိပေးဖို့ ဥပဒေကြောင်းအရ ဆောင်ရွက်မှုတွေ လုပ်ခဲ့ပါတယ်။

ဒီရလဒ်ဟာ ခိုင်မာတဲ့ ရလဒ်မျိုး မဟုတ်ပေမယ့် ဆဲလ်ဖုန်းအသုံးပြုမှုကြောင့် ကျန်းမာရေးအန္တရာယ် ထိခိုက်နိုင်တယ်ဆိုတဲ့ ကိစ္စအတွက် သိပ္ပံပညာရှင်တွေအကြားမှာ လေ့လာမှုတွေကတော့ ရှိနေတယ်လို့ ကယ်လီဖိုးနီးယား ကျန်းမာရေးဌာနက ထုတ်ပြန်တဲ့ ကြေငြာချက်မှာ ဖော်ပြထားပါတယ်။

ကြေငြာချက်မှာ အဓိကတိုက်တွန်းထားတာက ဖုန်းကို တတ်နိုင်သမျှ ကိုယ်နဲ့ဝေးဝေးမှာထားဖို့၊ နားနဲ့ကပ်ပြီး နားထောင်မယ့်အစား စပီကာဖွင့်ပြီး ပြောဖို့၊ ဘောင်းဘီအိတ်၊ အင်္ကျီအိတ်တွေမှာမထည့်ဘဲ ကျောပိုးအိတ်၊ လွယ်အိတ်တွေမှာ ထည့်ထားဖို့တွေ ဖြစ်ပါတယ်။

ဖုန်းမှာ နှိုးစက်ပေးထားပြီး ဘေးမှာထားအိပ်တာကို ကျန်းမာရေးဌာနက အထူးသတိပေးထားပြီး အိပ်ယာနဲ့ ပေအနည်းငယ်ဝေးမှာထားဖို့လည်း တိုက်တွန်းထားပါတယ်။

ကလေးတွေဟာ ဖွံ့ဖြိုးတိုးတက်နေတဲ့အခြေအနေ ဖြစ်တာကြောင့် ဖုန်းတွေကို သူတို့နဲ့ နီးနီးကပ်ကပ်ထားတာဟာ ပိုပြီး အန္တရာယ်ရှိတယ်လို့လည်း သတိပေးခဲ့ပါတယ်။

Ref: RT