“တိုင်းရင်းသား” အဓိပ္ပါယ်ဖွင့်ဆိုချက်

 

မြန်မာနိုင်ငံတွင် တိုင်းရင်းသားလူမျိုး၁၃၅မျိုးရှိမရှိအငြင်းပွားနေသောကိစ္စကို အစိုးရအဖွဲ့နှင့် လွှတ်တော်ကိုတင်ပြပြီး အတည်ပြု ဆုံးဖြတ်သွားမည်ဖြစ်ကြောင်း လူဝင်မှုကြီးကြပ်ရေးနဲ့ပြည်သူ့ အင်အားဦးစီးဌာန၊ ဒုတိယညွှန်ကြားရေးမှူးချုပ် ဒေါက်တာညီညီက နေပြည်တော် သင်္ဂဟဟိုတယ်မှာ ကျင်းပသော သန်းခေါင်စာရင်း နည်းပညာရပ်ဆိုင်ရာ နိုင်ငံတကာအကြံပေးဘုတ်အဖွဲ့၏ နိုင်ငံတွင်း ဆွေးနွေးပွဲအပြီးမှာ ပြောကြားခဲ့ပါသည်။

လွတ်လပ်ရေးကြေညာစာတမ်း

“ ၅။ ငါတို့၏ နိုင်ငံတော်ကြီးသည် မည်သူ တစ်ဦးတစ်ယောက်၊ တစ်ဖွဲ့တစ်သင်း၏ အမွေအနှစ်မဟုတ်၊ မည်သူတစ်ဦးတစ်ယောက်၏ ပုဂ္ဂိုလိကအပိုင်းပစ္စည်းမဟုတ်၊ မည်သူတစ်ဦးတစ်ယောက် တစ်ဖွဲ့ တစ်သင်းက ချုပ်ကိုင်အနိုင်သိမ်းယူ အကျိုးခံစားအပ်သော နိုင်ငံမဟုတ်။ အတိတ်ကာလက လည်းကောင်း၊ ယခုမျက်မှောက်တွင်လည်းကောင်း နောင်လာလတ္တံသော အနာဂါတ်ကာလ၌ လည်းကောင်း ငါတို့ပြည်ထောင်စုကြီးအတွင်း၌ မှီတင်းနေထိုင်ကြသော ကြီးငယ်ဝေးနီး ကျားမ မခြား သစ္စာတော်ခံ နိုင်ငံသားဟူသရွေ့တို့၏ အမွေအနှစ်ပိုင်ပစ္စည်း အကျိုးခံစားရာဖြစ်သည်ဟူသော လူ့ဘာသာ လူ့တရားနှင့်အညီ ကမ္ဘာဦးကာလ လူတို့၏ ပထမစည်းရုံးမှု၌ လူအပေါင်းတို့၏ သဘောဆန္ဒအရ လူ့အ၀န်း၏ အကျိုးကို ကောင်းစွာဆောင်ရွက်နိုင်အံ့သော ပုဂ္ဂိုလ်ကို ရွေးကောက်၍ သမ္မတတင်မြှောက်ကြသော မဖောက်မပြန် မစွန်းမငြိ ပကတိ သန့်ရှင်းဖြူစင်သော မူလ လူ့ဝါဒနှင့် လျော်ညီစွာ စည်းကမ်းဥပဒေသေချာထင်ရှားစွာ ပိုင်းခြား သတ်မှတ်တူညီသောတရား တူညီသော အခွင့်အရေး၊ တူညီသော အဆင့်အတန်းများဖြင့် ကမ္ဘာအရှည်တည်စိမ့်သောငှာ လူ့အပေါင်း၏ဆန္ဒ သာလျှင် အဓိကဖြစ်သော သမ္မတမြန်မာနိုင်ငံတည်းဟူသော မြတ်သောအဖြစ်ကို လက်ဆုပ် လက်ကိုင် ငါတို့အပိုင်ရပြီ။”

အထက်ပါ ဖေါ်ပြချက်သည် ၁၉၄၈ခုနှစ်၊ မြန်မာ့လွတ်လပ်ရေးကြေညာစာတမ်းမှ အပိုဒ်တစ်ပိုဒ် ဖြစ်သည်။ မြန်မာ့လွတ်လပ်ရေးအတွက် လူမျိုး၊ဘာသာ ခွဲခြားခြင်းမရှိဘဲ၊  အသက်စွန့် ကြိုးပမ်းခဲ့ကြရာ၊ ပြည်ထောင်စုသမ္မတ မြန်မာနိုင်ငံတော်ကြီးအတွင်း  မှီတင်းနေထိုင်ကြသော တူညီသော အခွင့်အရေး၊ တူညီသော အဆင့်အတန်းများ ရှိကြသည့် မြန်မာနိုင်ငံသားတို့၏  လူအပေါင်းတို့၏ဆန္ဒနှင့် အမွေအနှစ် ဖြစ်ပါသည်။ တိုင်းရင်းသားအကြောင်းများကို ပြောဆို၊ ဆွေးနွေးကြသည့်အခါ မြန်မာ့လွတ်လပ်ရေး ကြိုးပမ်းမှုသမိုင်းကို မမေ့အပ်ပေ။

၁၉၄၈ခုနှစ်၊ လွတ်လပ်ရေးကျောက်တိုင် အုတ်မြစ်ချ အခမ်းအနားမှာ အင်္ဂလိပ်လက်အောက်က လွတ်မြောက်ပြီး၊ အချုပ်အခြာ အာဏာပိုင်နိုင်ငံဖြစ်ကြောင်း ကြေညာခဲ့ပါသည်။ ရှမ်း၊ ချင်း၊ ကချင်၊ မွန်၊ ဗမာ၊ ရခိုင်၊ ရှမ်း၊ ကယား အားလုံးသည် အညီအမျှ အချုပ်အခြာ အာဏာကို ပိုင်ဆိုင်ကြောင်း လူမျိုးတစ်မျိုးက ပိုင်တာမဟုတ်ကြောင်း၊ လူမျိုးအားလုံး အဖွဲ့အစည်းအားလုံးက ပိုင်ကြောင်း မိန့်ကြားခဲ့ပါသည်။

 ၁၉၄၇ခုနှစ်၊ ဖွဲ့စည်းအုပ်ချုပ်ပုံ အခြေခံ ဥပဒေ

၁၉၄၇ခုနှစ်၊ ဖွဲ့စည်းအုပ်ချုပ်ပုံ အခြေခံဥပဒေ ရေးဆွဲရန် လမ်းညွှန်ချက် (၇)ချက်အနက် “ဤဖွဲ့စည်းအုပ်ချုပ်ပုံ အခြေခံဥပဒေတွင် လူနည်းစုများအဖို့ လုံလောက်သော ကာကွယ်ချက်များ ထည့်သွင်းပြဌာန်း ထားရှိရမည်။”ဟူ၍ ဖေါ်ပြချက်ကိုလည်း သတိချပ်အပ်ပါသည်

ဗိုလ်ချုပ်အောင်းဆန်းနှင့် ဦးနုလက်ထက်

“ဗိုလ်ချုပ်အောင်ဆန်းသက်ရှိထင်ရှားရှိစဉ်ကာလနဲ့ဦးနုအုပ်ချုပ်တဲ့ကာလတွေမှာလူမျိုး၁၃၅မျိုးဆိုတာ မရှိခဲ့ပါဘူး။  ဗိုလ်ချုပ်နေဝင်း အာဏာရပြီးတဲ့ နောက်ပိုင်းကျမှ လူမျိုး ၁၃၅ မျိုးဆိုတာဖြစ်လာတာပါ။ နဝတ၊ နအဖ ခေတ်တွေမှာလည်း ဗိုလ်ချုပ်နေဝင်း မူအတိုင်း ၁၃၅မျိုးပဲ။ ဒီမူကိုပဲပြန်ယူနေတယ်။ အရင်ကလည်း၇တိုင်း၊၇ပြည်နယ်၊ ခုလည်း၇တိုင်း၊၇ပြည်နယ်ပဲ ပြန်သုံးနေတယ်။ ဘာမျှမထူးခြားပါဘူး။ လမ်းဟောင်းအတိုင်း ပြန်လျှောက်နေတာ ဖြစ်ပါတယ်။ မဆလမူတွေကို ပြည်သူလူထု အများစုက လက်မခံဘူး။မကြိက်ကြဘူး။အခု ဦးသိန်းစိန်အစိုးရက ဒီအတိတ်က သခန်းစာကသခန်းစာတွေကိုယူပြီး၊ ပစ္စုပ္ပန်မှာအမျိုးသား ညီညွှတ်ရေးကိုပြန်လည် တည်ဆောက်ဖို့လိုပါတယ်။ မဆလတစ်ပါတီခေတ်တုန်းက အတိုင်း ဆက်လက်စွဲကိုင်ထားမယ်ဆိုရင် မြန်မာနိုင်ငံရဲ့ အခြေအနေဟာ စိုးရိမ်စရာတွေ ဖြစ်လာပါလိမ့်မယ်။ အုပ်ချုပ်သူနဲ့ အုပ်ချုပ်ခံ ၂မျိုးစလုံးက အမျိုးသားပြန်လည်သင့်မြတ်ရေးကို လုပ်မှ နိုင်ငံရဲ့ အနာဂတ် ကောင်းလာမှာ ဖြစ်ပါတယ်”ဟု နိုင်ငွေသိမ်းက သဘောထားအမြင် ပေးခဲ့ဘူးပါသည်။  ဗိုလ်ချုပ်အောင်းဆန်းနှင့် ဦးနုလက်ထက်တွင် တိုင်းရင်းသားလူမျိုး ၁၃၅မျိုး မရှိခဲ့ပါ။ ဗိုလ်ချုပ်နေဝင်း လက်ထက်တွင် တီထွင်လာခြင်း ဖြစ်ပါသည်။

တိုင်းရင်းသားလူမျိုး ၁၄၄မျိုး

ပြည်ထာင်စုသမ္မတမြန်မာနိုင်ငံအစိုးရမှ မြန်မာနိုင်ငံတွင် နေထိုင်ကြသော တိုင်းရင်းသားများကို ရည်ညွန်းရာတွင်တိုင်းရင်းသားလူမျိုး ၁၀၀ကျော်ဟုလည်းကောင်း၊တိုင်းရင်းသားလူမျိုး ၁၃၅မျိုးဟုလည်းကောင်း၊၊ ဖော်ပြလေ့ရှိပါသည်။ လူဝင်မှုကြီးကြပ်ရေးနှင့် ပြည်သူ့အင်အားဦးစီးဌာန၏ ၉-၁၂-၁၉၇၂ရက်စွဲပါ ပုံစံရေးသွင်းရန် ညွှန်ကြားချက်၌ တိုင်းရင်းသားလူမျိုးစု ၁၄၄မျိုးဖော်ပြခဲ့ပါသည်။

ထို့အပြင်၂၃-၂-၁၉၇၃ရက်စွဲပါနိုင်ငံပိုင် နေ့စဉ်သတင်းစာများတွင် တိုင်းရင်းသားလူမျိုး၁၄၃မျိုး ရှိကြောင်း တရားဝင် ဖော်ပြခဲ့ပါသည်။ ၁၉၇၃ခုနှစ်၊မတ်လ ၁၆ရက်နေ့တွင် ဗဟိုသန်းခေါင်စာရင်း၏ လူမျိုးစုစာရင်း ထုတ်ပြန်သောအခါ ၁၀၈မျိုး ဖြစ်လာခဲ့ပါသည်။ တိုင်းရင်းသားလူမျိုးစာရင်းကို ကိုးကား ဖေါ်ပြရာတွင် လူမျိုး၁၀၀ကျော်ဟူ၍ မရေမရာ သုံးနှုန်းခဲ့ကြရသည်ကိုလည်း သတိပြုမိပါသည်။ ၂၀၁၃ခုနှစ်တွင် ဓနုလွှတ်တော်ကိုယ်စားလှယ် ဦးအောင်သိန်းက လူမျိုးစု၁၃၅မျိုးစာရင်းကို မည်သည့်အစိုးရ လက်ထက်တွင် ပြုစုခြင်းကို လွှတ်တော်တွင် မေးမြန်းခဲ့ရသည်အထိ ပွင့်လင်းမြင်သာမှု မရှိခဲ့ပါ။ မြန်မာ့ဆိုရှယ်လစ်လမ်းစဉ် ဗဟိုကော်မတီဌာနချုပ်၏ ညှိနှိုင်းပေးချက်အရ မြန်မာနိုင်ငံတွင်တိုင်းရင်းသား လူမျိုး၁၃၅မျိုးပေါ်ပေါက်လာကြောင်း လူဝင်မှုကြီးကြပ်ရေးနှင့်ပြည်သူ့အင်အား ဝန်ကြီးဌာန ဒုဝန်ကြီးဦးဝင်းမြင့်က လွှတ်တော်ဆွေးနွေးချက်တွင် ဖြေကြားခဲ့ပါသည်။ တိုင်းရင်းသားလူမျိုး၉မျိုး ဖြုတ်ချခံခဲ့ရသည်။ ဆလုံ(ပသျှူး) ရခိုင်စစ်တကောင်း၊ မြန်မာမွတ်စလင်၊ မြေဒူးစသောလူမျိုးများကို ဖြုတ်ခဲ့ပါသည်။ တိုင်းရင်းသားလူမျိုး၁၃၅မျိုးစာရင်းကို သက်ဆိုင်ရာ ၀န်ကြီးဌာနက ထုတ်ပြန်ခဲ့ခြင်းသာ ဖြစ်ပါသည်။ မည်သည့်အတွက်ကြောင့် တိုင်းရင်းသား ၉မျိုးကိုဖြုတ်ခဲ့ခြင်းကို မေးခွန်းထုတ်စရာ ဖြစ်နေပါသည်။ သက်ဆိုင်ရာဝန်ကြီးဌာနမှ ဖြေရှင်းချက် ထုတ်သင့်ပါသည်။ ဆောင်ရွက်ပိုင်ခွင့်ရှိ-မရှိ စိစစ်ရန် လိုအပ်ပါသည်။

ကွဲလွဲမှု

“လူမျိုးစု ထုတ်ပြန်သောစာရင်းတွင် မျိုးနွယ်စုနှင့် လူမျိုးကွဲကွဲပြားပြား သတ်မှတ်လိုက်ပါက လူမျိုး၁၃၅မျိုး ရှိမည်မဟုတ်ကြောင်း၊ ယခုကွဲပြားမှု အများအပြား ဖေါ်ပြခြင်းသည် တိုင်းရင်းသားများအကြား ကွဲလွဲမှု ဖြစ်ပေါ်စေနိုင်ကြောင်း မွန်ဒေသလုံးဆိုင်ရာ ဒီမိုကရက်တစ်ပါတီ (A.M.D.P) ဦးနိုင်ငွေသိမ်းက ၂၀၁၃ခုနှစ်တွင် ပြောကြားခဲ့ပါသည်။

 ချင်း

၁၄-၁၁-၂၀၁၃ရက်တွင် ဟားခါးမြို့တွင် ကျင်းပသော ချင်းအမျိုးသားညီလာခံတွင် ချင်း၅၃မျိုး မရှိကြောင်း၊ ၂၀၁၄ခုနှစ် သန်းခေါင်စာရင်း ကောက်ယူရာတွင် လူမျိုးနေရာ၌“ချင်း”ဟူ၍သာ ထည့်သွင်းရန်ချင်းအမျိုးသားညီလာခံ တက်ရောက်သူများက သဘောတူကြပါသည်။နာဂလူမျိုးများကို ချင်းမျိုးနွယ်စု၅၃စုတွင် ပါဝင်သော မျိုးနွယ်စုအဖြစ် ထည့်သွင်းခြင်းကိုလည်း နာဂလူမျိုးများက လက်မခံကြပါ။ ချင်းတိုင်းရင်းသားဟူသော အမည်နေရာတွင် ဇိုမီးတိုင်းရင်းသားဟူသော အမည်ကို ပြောင်းလဲရန် တင်ပြမည်ဖြစ်ကြောင်း ဇိုမီးအမျိုးသား ဒီမိုကရေစီ အဖွဲ့ချုပ်က ပြောကြားခဲ့ဘူးသည်။

မြို

မြိုလူမျိုးများကလည်း သီးခြားတိုင်းရင်းသားမျိုးနွယ်စုဝင်အဖြစ် အသိအမှတ်ပြုစေလိုကြပါသည်။ မြိုတိုင်းရင်းသားလူမျိုးများသည်သန်းခေါင်စာရင်းနှင့်နိုင်ငံသားမှတ်ပုံတင်များပြုလုပ်ရာတွင်လူမျိုးအည်ကိုလွဲမှားစွာ ထည့်သွင်းနေခြင်း မဖြစ်သင့်ကြောင်း မြို(ခမီ) စာပေနှင့် ယဉ်ကျေးမှုအဖွဲ့က ၂၈-၁၁-၂၀၁၃ရက်နေ့က မြန်မာဂျာနယ်လစ်ရုံးခန်းတွင် သတင်းစာ ရှင်းလင်းပွဲပြုလုပ်ခဲ့ပါသည်။

ရှမ်း

ရှမ်းကြီးဆိုလျှင်တိုင်းလုံနှင့်ရှမ်းကြီးပါဝင်နေကြောင်းတိုင်းခန္တီးတွင်တိုင်းခန္တီး၊ခန္တီးရှမ်းပါနေကြောင်း၊ ရှမ်းနီတွင် ရှမ်းကလေး၊ တိုင်းလျန်၊ ရှမ်းဗမာ၊ ရှမ်းနီလေးမျိုးပါဝင်ကြောင်း၊ သမိုင်းကြောင်း အထောက်အထားများနှင့် သေချာစွာ စိစစ်သင့်ကြောင်း၊ တိုင်းလိုင်(ရှမ်းနီ) အမျိုးသားများ ဖွံဖြိုးတိုးတက်ရေးပါတီမှ ပြောကြားခဲ့ပါသည်။

တိုင်းရင်းသားခေါင်းဆောင်များ၏ပြောကြားချက်အချို့ဖြစ်ရာ၊တိုင်းရင်းသားများနှင့် ညှိနှိုင်းဆောင်ရွက်ခြင်းမရှိဘဲ၊မြန်မာ့ဆိုရှယ်လစ်လမ်းစဉ် ဗဟိုကော်မတီဌာနချုပ်မှ တိုင်းရင်းသားလူမျိုးစုရေးရာ ကော်မတီ၏ ဆောင်ရွက်ချက်မျှသာလျှင် ဖြစ်ပါတော့သည်။ တစ်နည်းအားဖြင့် စစ်အစိုးရ အဆက်ဆက် အတည်ပြုခဲ့သော လူမျိုးစာရင်းသာ ဖြစ်ပါသည်။ ယင်းနောက်ကြောင်းကို မသိဘဲ၊ ထပ်ခါထပ်ခါ တိုင်းရင်းသားလူမျိုး ၁၃၅မျိုးကို အတည်ပြု ပြောဆို နေကြခြင်းအားဖြင့် အမှန်ဟု ထင်လာကြသည်။ ထိုသို့တိုင်းရင်းသားလူမျိုး စာရင်း ၁၃၅မျိုးကို အသေဆုပ်ကိုင်ထားသဖြင့်၊ တိုင်းရင်းသားလူမျိုးစာရင်း  ကိုပြန်လည်စိစစ်ရန် လိုအပ်ကြောင်း တိုင်းရင်းသားခေါင်းဆောင်များက ပြောကြားခဲ့ကြပါသည်။ ဤသည်တို့မှာ အကြောင်းအရာအရ တင်ပြခြင်းဖြစ်ပါသည်။ ဥပဒေရှုဒေါင့်မှလည်း သုံးသပ်ရန် လိုအပ်ပါသည်။

၁၉၄၈ခုနှစ်၊ မြန်မာနိုင်ငံသားဖြစ်မှုအက်ဥပဒေ

၁၉၄၈ခုနှစ်၊ ပြည်ထောင်စုမြန်မာနိုင်ငံသားဖြစ်မှုအက်ဥပဒေပုဒ်မ-၃(၁)တွင် “ (၁) အခြေခံဥပေဒပုဒ်မ-၁၁ အလို့ငှာ မြန်မာနိုင်ငံတိုင်းရင်းသား တစ်မျိုးမျိုးဆိုသည်မှာ ကချင်၊ ကရင် (ကယား)၊ ချင်း၊ မြန်မာ၊ မွန်၊ ရခိုင်၊ သို့တည်းမဟုတ် ရှမ်းလူမျိုးကိုလည်းကောင်း၊ ၁၈၂၃ခုနှစ် (မြန်မာသက္ကရာဇ် ၁၁၈၅ခုနှစ်) မတိုင်မီကာလမှစ၍ ပြည်ထောင်စုတွင် ပါဝင်သော နယ်မြေတစ်ခုခု၌ မိမိတို့်၏ ပင်ရင်း တိုင်းပြည်အဖြစ် ဖြင့်အခြေစိုက် နေထိုင်ခဲ့သော မျိုးနွယ်စုများကိုလည်းကောင်း ဆိုလိုသည်”ဟု ပြဌာန်းချက်ရှိခဲ့ပါသည်။ တိုင်းရင်းသား လူမျိုး(၈)မျိုးနှင့် ၁၈၂၃ခုနှစ်(မြန်မာသက္ကရာဇ်၁၁၈၅ခုနှစ်) မတိုင်မီကာလမှစ၍ပြည်ထောင်စုတွင် ပါဝင်သော နယ်မြေတစ်ခုခု၌ မိမိတို့်၏ ပင်ရင်း တိုင်းပြည်အဖြစ် ဖြင့်အခြေစိုက် နေထိုင်ခဲ့သော မျိုးနွယ်စုများကိုတိုင်းရင်းသားများအဖြစ် အသိအမှတ်ပြုခြင်းဖြစ်ပါသည်။ပြည့်စုံသော“တိုင်းရင်းသား”အဓိပ္ပါယ်ဖွင့်ဆိုချက်ကိုအဆိုပါ ဥပဒေတွင်သာတွေ့ရှိရပါသည်။၁၉၈၂ခုနှစ်တွင် မြန်မာနိုင်ငံသား ဥပဒေကို ပြဌာန်းသောအခါ၊ ၁၉၄၈ခုနှစ်၊ မြန်မာနိုင်ငံသားဖြစ်မှု အက်ဥပဒေကို ရုပ်သိမ်းခဲ့ရာ၊ “တိုင်းရင်းသား” အဓိပ္ပါယ်ဖွင့်ဆိုချက်ပျောက်ခဲ့ရပါသည်။ မည်သို့ဖြစ်စေ “၁၈၂၃ခုနှစ်မတိုင်မီက ”သတ်မှတ်ချက်သည် အရေးကြီးကြောင်း သိသာပါသည်။ အင်္ဂလိပ်-မြန်မာပထမစစ် မတိုင်မီက အချိန်ကာလကို ပိုင်းခြား သတ်မှတ်ထားခြင်းဖြစ် သည်။

၁၉၈၂ခုနှစ် မြန်မာနိုင်ငံသားဥပဒေ

၁၉၈၂ခုနှစ်တွင် မြန်မာနိုင်ငံသားဥပဒေကို ပြဌာန်းသည့်အခါ၊ ပုဒ်မ-၃တွင် “ နိုင်ငံတော်တွင် ပါဝင်သောနယ်မြေတစ်ခုခု၌မြန်မာ သက္ကရာဇ်၁၁၈၅ခုနှစ်၊ခရစ်သက္ကရာဇ်၁၈၂၃ခုနှစ်မတိုင်မှီ ကာလမှစ၍ ပင်ရင်းနိုင်ငံအဖြစ် အမြဲနေထိုင်ခဲ့သော ကချင်၊ ကယား၊ ကရင်၊ ချင်း၊ ဗမာ၊ မွန်၊ ရခိုင်၊ ရှမ်းစသော တိုင်းရင်းသားများနှင့် မျိုးနွယ်စုများသည် မြန်မာနိုင်ငံသားများဖြစ်သည်”ဟု ပြောင်းလဲ ပြဌာန်းခဲ့ရာ၊ ၁၉၄၈ခုနှစ်၊ မြန်မာနိုင်ငံသားဖြစ်မှုဥပဒေတွင် “တိုင်းရင်းသား” အဓိပ္ပာယ်ဖွင့်ဆိုချက်ကို “ မြန်မာနိုင်ငံသား” အဓိပ္ပာယ်ဖွင့်ဆိုချက်အဖြစ် ပြောင်းလဲ သတ်မှတ်လိုက်ပါသည်။ ၁၉၈၂ခုနှစ်တွင် မြန်မာနိုင်ငံသားဥပဒေကို ပြဌာန်းခဲ့ပြီး၊  ၁၉၄၈ခုနှစ်၊ မြန်မာနိုင်ငံသားဖြစ်မှုအက်ဥပဒေကို ရုပ်သိမ်းခဲ့ရာ၊ “တိုင်းရင်းသား” အဓိပ္ပါယ်ဖွင့်ဆိုချက် ပျောက်ခဲ့ရပါသည်။

 

တိုင်းရင်းသားလူမျိုးများ၏ အခွင့်အရေး ကာကွယ်စောင့်ရှောက်သည့်ဥပဒေ

တိုင်းရင်းသားလူမျိုးများ၏ အခွင့်အရေး ကာကွယ်စောင့်ရှောက်သည့်ဥပဒေတွင် “ တိုင်းရင်းသား လူမျိုးများ” ဆိုသည်မှာပြည်ထောင်စု သမ္မတမြန်မာနိုင်ငံတော်တွင် ပင်ရင်းနိုင်ငံအဖြစ် အမြဲနေထိုင်ခဲ့ကြ သော ကချင်၊ ကယား၊ ကရင်၊ ချင်း၊ ဗမာ၊ မွန်၊ ရခိုင်၊ ရှမ်းလူမျိုးများနှင့် ယင်းတို့၏ မျိုးနွယ်စုများကို ဆိုသည်။ ယင်းစကားရပ်တွင် နိုင်ငံသားပြုခွင့်ရသူများ နှင့် ဧည့်နိုင်ငံသားများ မပါဝင် ”ဟူ၍ ဖော်ပြထားရာ၊ ၁၉၄၈ခုနှစ် ပြည်ထောင်စု မြန်မာနိုင်ငံသားဖြစ်မှု အက်ဥပဒေပုဒ်မ-၃(၁)ကဲ့သို့ ဥပဒေအရ ပြည့်စုံသော အဓိပ္ပာယ် ဖွင့်ဆိုချက် မဖြစ်နိုင်တော့ပါ။  ၁၈၂၃ခုနှစ်မတိုင်မှီက စာသားကို သိသိသာသာ ဖြုတ်ထားသည်ကို သတိပြုအပ်ပါသည်။ ၁၈၂၃ခုနှစ်ကို ပိုင်းခြားခြင်းသည် အဓိပ္ပါယ်ရှိပါသည်။အင်္ဂလိပ်-မြန်မာ ပထမစစ်ပွဲအချိန် ကာလမတိုင်မီ မြန်မာနိုင်ငံတွင် တည်ရှိနေခဲ့သော လူမျိုးများကို တိုင်းရင်းသားလူမျိုးများအဖြစ် သတ်မှတ်ခြင်း ဖြစ်ပါသည်။

၂၀၁၂ခုနှစ်၊ ဇူလိုင်လ(၃၁)ရက်နေ့တွင် ရန်ကုန်မြို့၌ ကျင်းပသော ရခိုင်ပြည်နယ် အရေး အထူး သတင်းစာရှင်းလင်းပွဲတွင် “၁၈၂၄ခုနှစ်မတိုင်မီက မြန်မာနိုင်ငံတွင် နိုင်ငံခြားသား မရှိကြောင်း ”လူဝင်မှုကြီးကြပ်ရေးနှင့်ပြည်သူ့အင်အား ဦးစီးဌာန ဝန်ကြီးကပြောကြားခဲ့သည်ကိုလည်း မှတ်သားသင့်ပါသည်။ မည်သို့ဖြစ်စေ“၁၈၂၃ခုနှစ်မတိုင်မီက” သတ်မှတ်ချက်သည် အရေးကြီးကြောင်း သိသာပါသည်။

အချုပ်အားဖြင့်တင်ပြရလျှင် ၁၉၆၂ခုနှစ်မတိုင်မီက ပြဌာန်းခြင်း မရှိခဲ့သော တိုင်းရင်းသား လူမျိုးစာရင်းကို ဦနေ၀င်းလက်ထက်တွင် တိုင်းရင်းသားများ၏ဆန္ဒ မပါဝင်ဘဲ ပြုစုခဲ့ပြီး၊ ဖြုတ်ချင်သည့် လူမျိုးများကိုဖြုတ်၍ စစ်အစိုးရခေတ် အဆက်ဆက် အတည်ပြုခဲ့သော တိုင်းသားလူမျိုးများစာရင်း ဖြစ်နေပါတော့သည်။

တိုင်းရင်းသား လူမျိုးများစာရင်း အကြောင်းပြောလျှင် ”တိုင်းရင်းသား” အဓိပ္ပာယ် ဖွင့်ဆိုချက်ကို ပြဌာန်းရန်လိုအပ်ပါသည်။ ၂၀၀၈ခုနှစ်၊ဖွဲ့စည်းပုံအခြေခံ ဥပဒေတွင်လည်း”တိုင်းရင်းသား”အဓိပ္ပာယ် ဖွင့်ဆိုချက် မပါဝင်သဖြင့်၊၎င်းအခြေခံဥပဒေကိုပြင်ဆင်သည့် အခါ”တိုင်းရင်းသား”အဓိပ္ပာယ်ဖွင့်ဆိုချက်ကိုထည့်သွင်းပြဌာန်းရပါမည်။၎င်းအခြေခံ ဥပဒေတွင်”တိုင်းရင်းသား”သုံးနှုန်းဖေါ်ပြထားသော်လည်း၊အဓိပ္ပါယ်ဖွင့်ဆိုချက် မပါဝင်ခဲ့ပါ။၂၁ရာစုပင်လုံညီလာခံတွင်လည်း၊” တိုင်းရင်းသား” အဓိပ္ပာယ်ဖွင့်ဆိုချက်ကို  ဆွေးနွေး ဆုံးဖြတ်သင့်ပါကြောင်း အကြံပြုအပ်ပါသည်။

ဦးခင်မောင်ချို(တရားလွှတ်တော်ရှေ့နေ)

 

ဆက်စပ် ဆောင်းပါးဖတ်ဖို့

“တိုင်း” “ရင်း” “သား”၊ Social Construction နှင့် Critical လူမှုရေး သိပ္ပံ သုတေသန