ထရမ့်ရှုပ်ခဲ့သည့် အပြာမယ်တစ်ဦးကို ၎င်း၏ရှေ့နေက ငွေပေးနှုတ်ပိတ်ခဲ့

ဖေဖော်ဝါရီ ၁၄၊ ၂၀၁၈
M-Media

– အမေရိကန်သမ္မတ ဒေါ်နယ်ထရမ့် အရင်ကရှုပ်ခဲ့တဲ့ အပြာမယ်တစ်ဦးကို သူ့ရဲ့ ကိုယ်ပိုင်ငွေ ပေးခဲ့တယ်ဆိုတာ မှန်တယ်လို့ ထရမ့်ရဲ့ ရှေ့နေ မီခေးလ် ဒီ ကိုဟင်က မနေ့မှာ နယူးယောက်တိုင်းမ်စ် သတင်းစာကို ပြောကြားလိုက်ပါတယ်။

အမည်အရင်း စတီဖနီ ကလစ်ဖို့ဒ်လို့ခေါ်ပြီး စတော်မီ ဒန်နီယဲလ်လို့ လူသိများတဲ့ အဲဒီအပြာမင်းသမီးက ထရမ့်ဇနီး မီလာနီယာ သားဖြစ်သူ ဘာရွန်ကို မွေးဖွားပြီးတဲ့နောက် သူမနဲ့ ထရမ့်တို့ ဇာတ်လမ်းတွေဖြစ်ခဲ့တယ်လို့ ၂၀၁၁ ခုနှစ်က အင်တာဗျူးတစ်ခုမှာ ပြောကြားခဲ့ပါတယ်။

ဒီလိုမျိုး နောက်ထပ်မပြောဘူးဆိုတဲ့ သဘောတူညီချက်တစ်ခုကို လက်မှတ်ထိုးဖို့အတွက် ထရမ့်ဟာ ကန်ဒေါ်လာ ၁၃၀၀၀၀ ကို ကလစ်ဖို့ဒ်ထံ ၂၀၁၆ ခုနှစ်မှာ လက်သိပ်ထိုးပေးခဲ့တယ်လို့ ဇန်န၀ါရီလမှာ အမေရိကန်မီဒီယာတွေက ဖော်ပြခဲ့ကြတာပါ။

ထရမ့်က အဲဒီ အပြာမင်းသမီးနဲ့ ဘာဇာတ်လမ်းမှ မရှိဘူးလို့ ငြင်းဆိုခဲ့ကြောင်း ကိုဟင်က အရင်က ပြောကြားခဲ့ဖူးပါတယ်။

ဒါပေမယ့် မနေ့က အင်တာဗျူးမှာ ကိုဟင်က ၂၀၁၆ ခုနှစ်အတွင်း ကလစ်ဖို့ဒ်ကို သူ့ရဲ့ ကိုယ်ပိုင်ငွေပေးခဲ့တယ်ဆိုတာ ၀န်ခံခဲ့ပါတယ်။

ဒါပေမယ့် ဒီကိစ္စမှာ ထရမ့်ထောင်ထားတဲ့ အသင်းအဖွဲ့တွေ၊ ထရမ့်ရဲ့ မဲဆွယ်ရေးအဖွဲ့တွေ မပါဝင်ကြောင်း၊ အစိုးရစောင့်ကြည့်ရေးအဖွဲ့တစ်ခုက ရွေးကောက်ပွဲကော်မရှင်ကို ဒီကိစ္စတိုင်ကြားတဲ့အချိန် သူ့အနေနဲ့ ဒီအတိုင်းပဲ ထွက်ဆိုခဲ့ကြောင်း ထည့်သွင်း ပြောကြားခဲ့ပါတယ်။

“ကလစ်ဖို့ဒ်ကို ငွေပေးခဲ့တာဟာ ဥပဒေနဲ့ ညီပြီး မဲဆွယ်ရေးအဖွဲ့က ကူညီတာ၊ အဲဒီကပိုက်ဆံတွေကို သုံးတာမျိုး မဟုတ်ပါဘူး”

ဒါပေမယ့် ဘာ့ကြောင့် ဒီငွေကိုပေးတာလဲ၊ သူပေးတာကို ထရမ့်က သိလားဆိုတဲ့ မေးခွန်းတွေကိုတော့ ကိုဟင်က ဖြေကြားခဲ့ခြင်း မရှိပါဘူး။

၂၀၁၁ ခုနှစ်က Touch မဂ္ဂဇင်းနဲ့ အင်တာဗျူးမှာ ကလစ်ဖို့ဒ်က ၂၀၀၆ ခုနှစ်အတွင်း သူနဲ့ထရမ့်ရဲ့ ဆက်ဆံရေးဟာ အိပ်ရာပေါ်အထိ ရှိခဲ့တယ်လို့ ပြောကြားခဲ့ပါတယ်။

အဲဒီသတင်းကို အခုနှစ် ဇန်န၀ါရီလအတွင်းမှာ Wall Street ဂျာနယ်က ထပ်မံဖော်ပြခဲ့ပြီး ဒီကိစ္စကို ထပ်မပြောဖို့ဆိုတဲ့ လျှို့ဝှက်သဘောတူညီချက်နဲ့ ကလစ်ဖို့ဒ်ဟာ ပိုက်ဆံတစ်ချို့ ရခဲ့တယ်လို့လည်း ဆိုပါတယ်။

ဒါပေမယ့် ကလစ်ဖို့ဒ်ကတော့ အဲဒီအချိန်မှာ ဒီသတင်းတွေကို ငြင်းဆိုခဲ့ပြီး သူနဲ့ထရမ့် ဘာမှ မဖြစ်ခဲ့ဘူးလို့ ပြန်လည် ပြောကြားခဲ့ပါတယ်။

Ref: BBC