အီရန်ခရီးသည်တင်လေယာဉ် ပျက်ကျပြီး လိုက်ပါသူအားလုံး သေဆုံး

ဖေဖော်ဝါရီ ၁၈၊ ၂၀၁၈
M-Media

– အီရန်လေကြောင်းလိုင်းတစ်ခုမှ ခရီးသည်တင် လေယာဉ်တစ်စင်းမှာ ယနေ့မနက်ပိုင်းတွင် ပျက်ကျခဲ့ပြီး လေယာဉ်ပေါ်တွင် လိုက်ပါသွားသည့် ခရီးသည် ၆၆ ဦးစလုံး သေဆုံးခဲ့သည်ဟု သိရသည်။

Iran Aseman လေကြောင်းလိုင်းမှ လေယာဉ်ဖြစ်ပြီး မြို့တော်တီဟီရန်မှ ယာဆူဂ်ျမြို့သို့အသွား တောင်များထူထပ်သည့် ဒေသတွင်း ပျက်ခဲ့ခြင်းဖြစ်သည်ဟု ISNA သတင်းဌာနက ဖော်ပြခဲ့သည်။ အီရန် လခြမ်းနီအဖွဲ့က လေယာဉ်ပျက်ကျသည့်အချိန်တွင် မြူများဆိုင်းနေသည်ဟု ပြောကြားခဲ့သည်။

အဆိုပါလေယာဉ်တွင် ခရီးသည် ၆၀ နှင့် လေယာဉ်အမှုထမ်း ၆ ဦး လိုက်ပါသွားသည်။

စက်ပိုင်းဆိုင်ရာ ချို့ယွင်းမှုကြောင့် လေယာဉ်ပျက်ကျနိုင်ချေကို လေကြောင်းလိုင်းက ပယ်ချခဲ့ပြီး ဆိုးရွားသော ရာသီဥတုကြောင့် ပျက်ကျခြင်းဖြစ်သည်ဟု ပြောကြားခဲ့သည်။

သို့သော်လည်း အဆိုပါလေယာဉ်မှာ ပြီးခဲ့သည့် သီတင်းပတ်များတွင် စက်ပိုင်းဆိုင်ရာ ပြဿနာများကို ကြုံတွေ့ခဲ့ရသည်ဟု ဒေသတွင်း မီဒီယာများက ဖော်ပြခဲ့ကြသည်။

Ref: Aljazeera